وجه الإعلامي خالد أبو بكر، رسالة للإعلامي الإخواني محمد ناصر، قائلًا: "أنا مش هشتمك زي ما شتمت عليا ولا هعايب ولا هتكلم زيك"، لافتًا إلى أنه كان يعرف محمد ناصر عندما كان متواجدًا في مصر. وتابع "أبو بكر"، خلال تقديم برنامج "الحياة اليوم"، المذاع على فضائية "الحياة" مساء اليوم الأربعاء: "يا ناصر إنت عارف كويس جدًا إنك مش راجع، إنت بتفكر هتعمل إيه، وإيه هيحصل لولادك"، وأضاف مستنكرًا: "أنت تؤيد الإخوان، هو أنت ليك في أفكار الإخوان أصلًا". واستكمل الإعلامي: "لن استخدم نفس أسلوبك في حوارك عن الكثير من الإعلاميين وعن الكثيرين ممن كنت تعرفهم في مصر"، مضيفًا: "أنت عارف إن بيدور داخلك صراع الخوف من بكره، نحن هنا نتحدث وننتقد رئيس الدولة ونعارض ما لا يعجبنا وبنقول وبنتكلم ولكن قاعدين في بلدنا، إنت قاعد معندكش بكره، إحنا هنا بنتخانق وبنتناقش وبنعمل كل حاجة ولكن شغالين". وأضاف: "مشكلتك الحقيقية هو إنك أصلًا تُستأجر للحديث عن الإخوان، وأنا متأكد إنك مش مقتنع بيهم ولا بوجودهم، وفي نفس الوقت بتفكر في بكره إللي متعرفش ليه ملامح". واستطرد: "أنا عارف إنك هتتريق على كلامي، ولكن وإنت جاي تنام هتفكر بيهم وبين نفسك وإنت بتفكر بولادك خلي بالك الدايرة بتدور بسرعة، واوعى تفرح في إللي بتعمله في ولاد بلدك دلوقتي، بلدك إللي انت مش هتشوفها تاني، ولا إنت عارف بكره هيحصل فيه إيه، ربنا سبحانه وتعالى هو الأعلم".
