في أول رد فعل منه، حول ما أثير عن سفر الفنانين لتشجيع المنتخب في روسيا، قال الفنان شريف منير: "وجهت لنا دعوات لحضور مباراة المنتخب المصرى أمام روسيا فى كأس العالم، ذهبنا لدعم فريقنا القومى المصري، فما الخطأ فى ذلك.. تلقينا دعوة مثل أي مهرجان سينيمائي.. عبارة عن طيران وإقامة فقط لا غير.. ولم نتلق أية مكافآت، بالعكس تكلفنا بعض المصروفات". وخسر منتخب مصر من روسيا 1/3 خلال المباراة التي جمعتهما مساء أمس، الثلاثاء، على ملعب كريستوفسكى بمدينة سانت بطرسبرج في الجولة الثانية للمجموعة الأولى لكأس العالم. وأضاف: "كل ده عشان الفريق خسر، فإحنا نتحمل الموضوع يعني، هو إحنا اللي حطينا خطة اللعب؟ هو إحنا اللي لعبنا وخسرنا؟ إحنا كنا واقفين وبنتفاعل جوه الملعب زي كل المصريين الموجودين، وزعلنا لما اتغلبنا". وتابع: "الكورة كده؛ مكسب وخسارة، إيه الغلط اللي عملناه؟ ويتقال علينا مطبلاتية ورقاصين وألفاظ مش كويسة، هو إحنا مش بنمتعكوا برضه؟ إيه الغلط اللي عملناه؟ هي مش فيفي عبده اللي أنا شاركت معاها في مسرحية حزمني كنتوا بتنبسطوا منها؟". وتساءل: "إحنا ذنبنا إيه؟ إحنا رايحين ندعم المنتخب، حطوا نفسكو مكاننا، ولو أنت مكاننا وجت لك دعوة لحضور الماتش، بصرف النظر مين اللي طالع معاك، مش هتطلع؟ أكيد هتطلع". وقال: "اتقال علينا كلام كبير، وإن إحنا طالعين من قوت الشعب، مش حقيقي الكلام ده، ده بند من الدعاية للشركة، وده يشرفنا إننا ندعم المنتخب، أقسم بالله إحنا مانعرف اللاعبية في أوتيل إيه، ولا شوفناهم أساسًا". وأضاف: "الكلام جارح جدًا، معملناش حاجة مشينة، لو كنا كسبنا كنتو شيلتونا فوق الدماغ، أنا حقيقي انجرحت وزعلت، إحنا لما بنروح والله مابناخد مقابل، وأقسم بالله مرة تانية إحنا ماشوفنا اللاعبية ولا نعرف مكان إقامتهم".