السلام عليكم استاذة نيفين يارب تكوني بخير واحشاني جدا انا نفسي اشوفك اتكلم معاكي علي الطبيعة مش علي الميل عندي كلام كتير جدا نفسي اقولة صعب يتقال كتابة بس مش عارفة هل دة متاح ولا صعب ياريت لو حضرتك تبلغيني هل فعلا ممكن اقابلك ولو حتي في الجريدة ولا مش ممكن ... المهم انا هدخل في الموضوع .. مشكلتي ان والدتي تعبانة جدا واخواتي متجوزين وانا الوحيدة اللي قاعدة معاها اقامة كاملة بحكم ظروفي الاجتماعية وبشتغل لكني للاسف تعبت من كتر ما بنزل معاها للدكاترة والمستشفيات والسهر بالليل هية صحتها علي قدها جدا صحيح هية امي وغالية علية جدا ومليش غيرها لن انا كمان سني مش صغير وبمر بظروف صحية صعبة مخلياني مش طايقة نفسي وامي طلباتها كتير وانا شغلي مضايقني بقيت مش عارفة الاحق بين الشغل وبين امي وبين الدكاترة بتاعتي انا كمان ونفسيتي بقت زفت من كتر ما شايفاها تعبانة قدامس ومش قادرة اعملها حاجة وضميري تاعبني من احساسي من ضيقي منها دي امي برضه لكن انا صحيا تعبت واخواتي شايلين ايدهم من كل التفاصيل دي خالص معرفش ليه اكنهم مش شايفين الهم اللي انا فيه ياريت تنصحيني اعمل ايه مع اخواتي واعمل ايه مع امي ونفسي وشكرا علي حسن استقبالك لكل رسايلي نهي فضفضة محررة الصفحة .. نيفين حجازي يا نهي .. انتي لا هتعملي حاجة مع اخواتك ولا مع والدتك .. انتي تحمدي ربنا علي نعمة الام حتي لو كانت كوم عضم دي دعوتها بس تساوي الدنيا باللي عليها .. اوعي يشغل بالك اصلا تعبك .. تعب ايه اللي بتفكري فيه قدام تعبها فيكي وانتي طفلة مش انا اللي هفكرك بالكلام دة .. لانه لينا كلنا .. امهاتنا كلنا قد ايه تعبوا فينا ؟ .. يا نهي انتي ربنا رقاكي لما اختارك تكوني جليسة امك وانتي اللي تراعيها دة انتي يابختك عن اخواتك .. تصوري بعد الشر اذا والدتك دي جرالها حاجة والبيت فضي عليكي من حسها فيه هيكون وضعك ايه حتي وهية تعبانة .. فكري كدة ثانية ! .. هتتمني لو العمر يرجع وتخدميها العمر كله بس ترجع .. يا نهي امهاتنا دول واسطتنا عند ربنا انا مش محتاجة اقولك الكلام دة .. دي البصة في وش امك تساوي الدنيا .. دعوتها تساوي امانك وانتي نازلة من بيتك ومن الناس وغدرهم .. امك دي واصلة الخير بينك وبين ربك اللي علشان خاطرها ربنا راحمك من كتير لغاية انهاردة ويمكن مش عايز يعاقبك علي الكتير علشان خاطرها .. ولما امهاتنا بيروحوا كل حاجة حلوة بتروح معاهم .. حاولي تحسي بحلاوة وجودها مش بمرار خدمتها مع اني مش حاسة ان في خدمة الام اي مرار اصلا .. اشمعنا وانتي صغيرة هية كانت بتخدمك بحب حتي وانتي كبيرة كانت بتخدمك بحب لغاية ما صحتها راحت .. انتي ليه وازاي كدة ؟ يا نهي فوقي قبل ما فراقها يحرق قلبك لا قدر الله يا حبيبتي انا خايفة تيجي عليكي اللحظة دي وتعيشي حرقتها الله لا يقدر وتعيشي ندم ما بعده ندم دة الام في البيت بركة من عند الله كبيرة مش بنعرف نعمتها الا بعد فراقها طيب وليه ؟ .. ربنا يديم علينا جميعا نعمة الاهل والام تحديدا ويبارك لنا فيهم يارب اللهم امين وما يحرمناش من رضاهم علينا يارب اجري علي امك واقعدي تحت رجليها واتمنيلها الرضا ترضي قبل فوات الاوان لا قدر الله .. اسفة علي لهجتي معاكي لكن دة اقل شي اقدمة لامك في غيابها .. ربنا يباركلك في عمرها وصحتها ويهديكي ليها ويجعلك نصيب في دعواتها ليكي . للتواصل مع محررة الصفحة اضغط هنا
