فتح في الفترة الأخيرة عدد كبير من محلات العصير في القاهرة، و من الصعب أننا نجرب كل الأماكن في وقت قصير و نختار أحسن مكان بيقدم العصاير الطازة اللي أحنا بنحبها، بس بفضل مستخدمي Trustious دايما بنقدر نجمع أكبر عدد و أحسن الأماكن اللي موجودة في القاهرة Top Fruit: المكان ده على طول بيطور نفسه، المنيو بتاعه فيه اختيارات كتير، عصاير، جرانيتا و سمووثي، كل ما ممكن تتخيله، مش كده بس أنت كمان ممكن تعمل العصير بالفواكه اللي أنت تختارها. أسعاره معقولة. شوف المنيو و الصفحة بتاعتهم من هنا . ممكن تلعب مع صحابك و كل واحد يشتري عصير و ميقولش مكوناته ايه و كل واحد يجربه و يخمن هو مكون من إيه؟ La Fraise: واحد من أحسن الأماكن اللي موجودة في القاهرة. اختيارات العصاير كتيرة، السمووثي و الشيكولاته عنده حلوة جدا. ديه الصفحة بتاعتهم. ساعات بيبقوا زحمة جدا، و بيقفلوا في أوقات الصلاة. جرب عنده الميلك شيك الشيكولاتة Lychee: محل صغير موجود في الزمالك، المحل الديكور بتاعه كله مكون من الخشب. المنيو بتاعه مختلف، العصاير الميكس عنده حلوة جدا، من أحسن الأماكن اللي بتقدم عصاير طازة. لو هاتطلب عصير فيه فاكهة مش في الموسم بتاعها، مش هتلاقيه للأسف. المنيو و الصفحة بتاعتهم من هنا. أسعاره غالية شوية، تقريبا 20 جنيه للكوبايه، المكان نضيف و منظم، الخدمة كويسة و جودة العصاير حلوة و غير كل ده عنده عصير قصب :D. أشرف فرغلي: غني عن التعريف، أول سلسلة محلات عصير عرفنها، أبتدي بعصير القصب و بعد كدة المانجة، و بيعمل عصير البوريو بالأيس كريم. فرغلي عنده فروع كتير في القاهرة، لو عاوز تعرف فروعهم دوس هنا. العصاير على طول طازة، ممكن تشرب في كوباية زجاج أو بلاستيك لو عاوز.الفخفخينا بتاعته جامدة. العربي: موجود في هليوبليس، أشهر واحد بيعمل بوريو في مصر وكان أول واحد يعمله. أبتدى محل صغير لغاية لما شهرته بقت زي فرغلي. العصاير عنده طازة. لازم تجرب عنده عصير البندق بالفانيليا. دي الصفحة بتاعته، لو روحت هليوبليس حاول تعدي عليه تجربه. أبو ليلة: موجود في المقطم، ناس كتير بتحب المكان ده جدا، مش بس سكان المقطم. حاول تروح تجرب العصاير بتاعته. رأي الناس في العصاير بتاعته أنها تحفة. عنوان المكان في اللينك ده. محدش عارف سر المكان ده أيه و أزاي بقى من أحسن و أشهر امحلات العصير في القاهرة. City Drink: واحد من أشهر محلات العصير في مصر، خصوصا فرع الدقي. نضافة المكان مش أحسن حاجة بس من أمتى الحاجات دي بتفرق معانا :D. العصاير بتاعته طعماها حلو، لو كنت قريب من هناك حاول تجربه و تكتبلنا Crazy Juices: مكان جامد في القاهرة الجديدة. بيعملوا عصاير ميكس حلوة جدا، المنيو بتاعتهم شبه منيو Top Fruit. الخدمة كويسة، وفيه قعدة بره المحل عشان تقدر تستمتع بالعصير و الجو في نفس الوقت. الأسعار بتاعته معقوة جدا، كوباية العصير الكبيرة تقريبا من 8-10 جنيه.
