بما إن الموضوع زاد عن حده فآن أوان الكلام - مازال المصريين الغلابه بيتعاملوا معاملة الكلاب في المصالح الحكومية بل وأكثر مما قبل يبدو أن فتوات المصالح الحكومية شوكتهم قويت وبقوا يتكلموا بعنطزة غريبة وناقص يلطشوا المصريين بالقفا - قدام عيني واحد إتشتم وإتقالوا إنت مبرشم يالَه وللا إيه " كان صعبان عليا جداً وشكلة غلبان جداً وإتقال له عليك غرامة خمستاشر ألف جنيه ولما قال في إندهاش كام ؟ قال له الموظف إيه مابتسمعش إنت شكلك مبرشم يالَه وللا إيه - بدأت المشكلة لما جالنا وصل كهربا بقيمة 6000 جنيه أيوه ياأفندم ستة آلاف جنيه مصري وده بالرغم من إن كل الفواتير إللي قبله مدفوعة ومافيش أقساط * ملحوظة : كل الفواتير السابقة لهذا الوصل واللاحقة ليه مرتفعة * ملحوظة تانيه : ده بالرغم من إن النور بيقطع بشكل مستمر ! - رحنا إتظلمنا قالوا نعمل فحص للعداد وخدوا العداد يعملوا له فحص - بعدها قالوا سليم وعشان نسترده لازم ندفع المبلغ كله وكمان بدون تقسيط !!! - قدمنا شكوى وأثناء ماإحنا مستنيين الرد - ولاد الحلال بتوع مباحث الكهربا جُم البيت وعملوا محضر سرقة تيار كهربائي ليه ؟ علشان العداد مش موجود طب وليه العداد مش موجود ؟ علشان بيتعمل له فحص طب بعد ماإتعمل له فحص مارجعشي ليه ؟ علشان الشركة مش عايزة ترجعه غير لما قيمة المديونية " الوصل آبو 6000 جنيه يدفع كامل ومن غير تقسيط كمان " * مش بس كده دول كمان عايزين يدوني عداد تاني بيشتغل بكارت شحن لما الكارت يخلص النور يقطع ! ليه مش بيقولوا العداد سليم !!! ياسلام يعني متضررين من فاتورة قيمتها مبالغ فيها يجي لنا محضر بقيمة خرافية ! دي بجد بقى أيام سوده طب وبعدين - قبل وبعدين عايز أوضح شوية حاجات البيت إللي إحنا قاعدين فيه عبارة عن منزل صغير على أدنا تقريباً 45 متر يعني مكتب أي مسؤل أكبر منه البيت ده دورين والدورين شغالين على عداد واحد " دي تُعَد مخالفة لشروط التعاقد وغرامتها حوالي 100 جنيه " خصوصاً وإن إحنا إللي متضررين مش الشركة لأننا بنُصَنَّف ضمن شريحة مرتفعة ويمكن علشان كده الفواتير كانت بتيجي مرتفعة - لكن بدل مابتوع المباحث يعملوها مخالفة عملوها محضر سرقة تيار مع إنهم 1- مادخلوش البيت لعدم وجودي فيه 2- وبالتالي ماعملوش معاينة 3- ومفيش أي دليل يثبت صحة إدعاءهم 4- المحضر إللي عملوه لا أنا ولا والدي مضينا عليه يعني محضر من جانب واحد نكمل وبعدين رحت عملت تظلم في مباحث كهرباء بنها موظف محترم كلمني وهو بيشخط وقال لي إنت سارق كهربا قلت له لأ مش سارق كهربا والدورين على عداد واحد - قال لي إثبت كده هات أي حاجة من الشركة تثبت إن الدورين على عداد واحد قلت له كفاية الفواتير المرتفعة إللي إحنا أصلاً متضررين منها قال لي إنت سارق وهتدفع واحد وعشرين ألف جنيه - قلت له إزاي أنا سارق والمخبر بتاعك جيه ومالاقانيش ومادخلش الشقة ولاعمل معاينة ولا أنا مضيت على المحضر أصلاً ولاشفت وش حد من إللي عملوا المحضر ده - هو كده خش لرئيس المباحث لو مش عاجبك .. وبعد ماإتلطعت حوالي ساعة وشوية قدام مكتب الباشا المقدم رئيس المباحث دخلت له وحكيت له الموضوع بإختصار وتعاطف معايا وقال لي ماتقلقش وتعالى لي يوم التلات وربنا هيسهل - خرجت وأنا مطمن وحاسس إن الدنيا لسه بخير وإن الراجل هينصفني ولما رحت تاني ماقابلنيش أصلاً فعرفت إني كنت غلطان في إحساسي السابق لحد ماقابلت مسؤل كبير محترم في شركة الكهربا سمع الموضوع وقرا شكوتي كلمة كلمة وقال لي : الناس دي بتستهبل غلطانين والقاريء ماكانشي بيجي عشان كده جايبينلك فاتورة ب 6000 في شهر واحد وكمان عملوا لك محضر سرقة وإنت أصلاً مش سارق وهم أصلاً مادخلوش وإنت أصلاً ماكنتش موجود وجايبين عليك غرامة 21 ألف جنيه معلش دول ناس كلاب قلت له لأ مش هم إللي كلاب الظاهر إن هم شايفينا إحنا كلاب علشان كل ده يحصل معانا ونسكت وقال لي الموضوع ده مش هيتحل غير لو وصلت الموضوع لكل المسؤلين الكبار وللصحافة والإعلام وإداني تليفون حد من المسؤلين دول " بس مش حد كبير قوي " وقال لي خلي حد كبير يكلمه وبالمناسبة قال لي إن اللي حصل ده مش عادي وإن حد إبن حلال زاقق عليا ولاد الحلال دول " أنا بصراحة كلمت مسؤل كبير قوي وحكيت له على الموضوع يُعتبَر أكبر مسؤل في البلد ومستنيه يتدخل ويحله ورغم مشغولياته الكتير أنا واثق إنه مهتم بالموضوع ومش ناسيه لو حد يحب يساعد ويكلم مسؤلين تانيين حتى لو أقل من المسؤل إللي أنا كلمته يبعت لي وأنا أبعت له الشكوى كاملة بأرقام المحاضر بإثبات إن الوصل سبب المشكلة ده متلفق وتقدير جزافي وبإثبات إن العداد كان بيتعمل له فحص بكل حاجة على الإيميل وإللي مايقدرش يساعد على الأقل يعمل شير للموضوع .. الشاعر رمزي بشاره [email protected]
لو عايز تعرف مين هو المسؤل إللي أنا كلمته إدخل هنا
