بعث احمد ماهر مؤسس حركة 6 ابريل المتهم بالتخابر و العمالة و التمويل لصالح دول اجنبية ، برسالة من داخل محبسه بسجن طرة . و جاء نص الرساة على النحو التالى :
شوية تلقيح كلام : حاجة كوميدية فعلاً إنك تلاقي ناس كل شغلانتها التشويه يشتكوا من التشويه !!! يعني كنت مستني إيه ؟؟ طالما عندك الغاية تبرر الوسيلة , وطالما إنت مش نضيف وعندك عادي تشوه الناس و تخوض في سمعتهم , و ناسي إن العالم فيه ناس زيك في مقدار إنعدام الأخلاق أو الضمير , و يقدروا يعملوا فيك اللي عملته في الناس . كان مضحك جدا بالنسبالي إني ألاقي واحد محتال ونصاب , وكل اللي عمله في حياته واللي خلاه معروف وبيطلع في التليفزيون يزايد ويتكلم عن تمويل وعمالة مؤسسي 6 إبريل , و إنه تلاقيه بيشتكي إن فيه ناس تانيه بتقوم بتشويهه !!!! .. يا حرام . يا كبد أمك ياخويا .. أومال مستني إيه !!! .. ذوقوا مما صنعت أيديكم . والزبالة فيه أزبل منه ، و زي ما عملت فى الناس , هتيجي ناس تانية تعمل فيك اللي عملته . علشان تطلع في التليفزيون والناس تعرفك , بنيت مجدك على الكذب والخوض في الأعراض وتشويه الناس اللي علموك وكبروك وعرفوك يعني إيه سياسة .. ويعني إيه شارع .. و إزاي تتكلم , لكن هل هتتوب ؟؟!! .. أشك . والآخرين أنصار نجم النجوم اللي زعلانين ومستغربين إن الناس الوحشين بيشتموا النجم الكبير , وبيقولوا عليه خلايا نائمة و إخوان وطابور خامس بعد كل اللي عمله وبعد كل مجهوده لخلع مرسي !! ولكن نسيوا إنهم في طريقهم لخلع مرسي وما بعد خلع مرسي شوهوا كل من كان يختلف معهم ولو في تفصيله صغيرة , ولو حتى في كيفيه خلع مرسي ، أطلقتم التهم على كل من إختلف معكم في تفاصيل وقولتوا عليه خاين وعميل !!! طيب ليه مستغربين إن فلول مبارك ومجاذيب السيسي بيقولوا عليكم اللي انتم قولتوه علينا ظلماً قبل كده ؟؟!! والدروس المستفادة بعد كل هذا الهري إن أوعى تعامل الناس بخسة ونذالة حتى لو عاملوك بخسة و نذالة . و إوعى تشوه حد شوهك أو تقول عليه حاجة محصلتش زي ما عمل . ربنا كبير ولو إنت مظلوم هيجيبلك حقك . لكن لو عملت زي الناس القذرة واللي معندهمش ضمير , هتبقى زيهم ومش هيبقى فيه فرق بينك وبينهم . عامل الناس بالقيم اللي بتنادي بيها , ومتبقاش منافق تأمر الناس بالبر وتتكلم عن حرية وديمقراطية و إنت وسخ , وبتحارب خصومك بقذارة , ومقتنع إن الغاية تبرر الوسيلة القذرة . الغاية النبيلة لا تبرر الوسائل القذرة , فكك من الإشتغالات اللي بتقولك ممكن تشوه حد علشان تزيحه من طريقك وتحقق حاجة أسمى , ده إسمه عك . أصلاً اللي خلى الثوة تنهزم – ثورة 25 يناير – إن كتير من الثوار كأفراد ومجموعات مكانوش نضاف في تعاملهم مع بعض . الثورة باظت بسبب القذارة , و التخوين , و التشويه , و مؤامرات الثوار على بعض . أتمنى إن الناس تدرك إن القذارة ما بتجيبش غير قذارة ، والمبادئ لا تتجزأ ، والإنتقام مضر وغير مفيد , و هيلوثك لو كنت كويس . ربنا يحفظنا من شهوه الإنتقام , و يبعدنا عن إستخدام الأساليب اللي مش نضيفه , لأن ده اللي جابنا ورا و ضيع الثورة .
