السلام عليكم , مش عارفة ابدأ من فين بس مشكلتي محتاجة حل سريع عشان اللي بيدفع التمن أولادي التلاتة , انا عشت طفولة زي الزفت مع اب صارم وشديد وشرس جدا وأم مغلوب على أمرها وعمرها ما كانت بتدافع عني خصوصا لما يضربني على سبب انا مش عاملاه .. دايما كان بيعاقبني ودايما بيضربني حتى لو اتخانق مع امي ييجي يعاقبني انا .. انا لية اخ واحد واخت واحدة بس اكبر مني بكتير والغريب انهم ماكنوش بيحاولو يدافعو عني عشان نفس السبب همة كمان ماكنوش بيخلصو من لسان ابوية وايده الطويلة , ده غير انه كان غني جدا بس حارمنا جدا كان مشهور ببخله , المهم اول عريس جالي قلت اخلص واخرج من البيت وطبعا ما حاولتش اتعرف عليه بسبب الظروف اللي كنت فيها قلت لنفسي مهما طلع راجل وحش هيبقى ارحم من ابويا .. لكن المصيبة انه طلع نسخة مصغرة منه بس في موضوعات مختلفة , قلت لنفسي اهي عيشة وخلاص لغاية ما ربنا يسهل ويا إما يموت أو انا احاول اطلب منه الطلاق ,, لكن الوقت فات ولقيت نفسي حامل في الطفل الأول وبعده على طول الطفل التاني الفرق بينهم سنتين وبعد ما ربنا رزقني بيهم قلت همة اللي هيعوضوني عن كل اللي فات لكن الغريب اني ابتديت مع الوقت يجيلي احساس ناحية أولادي غريب خصوصا لما يتشاقو او يعيطو فجأة بفقد اعصابي خالص واحس اني بني آدمة تانية بنزل عليهم ضرب لدرجة في مرة كسرت ايد ابني الكبير اللي عمره دلوقتي 5 سنين وياما ضربتهم وكل مرة لازم حد فيهم يحصل له حاجة وكان لما جوزي يرجع ويعرف اللي حصل ينزل هوة كمان فية ضرب ومرة من المرات من كتر ما ضربني لما زعل على الولاد جابلي نزيف في العين من جوة بسبب لكمة جامدة جدا وكان عايز يعمللي محضر في قسم الشرطة لكن الجيران اتدخلو وحاولو يصلحو بنا ويوصوني على أولادي بس انا بعد ما بضربهم بدقايق بحس اني راجعة من حلم او كنت في حالة عدم وعي مش قادرة اشرح الإحساس قوي بس ببقى في حالة مش طبيعية .. المشكلة دلوقتي ان واحد من ولادي جالة مرض مش فاهماه ولما سألت دكتور أطفال جاري قاللي حرام عليكي الولد ده لازم يتعرض على دكتور أمراض نفسية عشان الأعراض اللي بتجيله شكلها ليها صلة بالحالة النفسية .. الأعراض دي عيارة عن تبول لا إرادي بتجيله اول ما يشوفني وحالة رعشة جامدة من كتر الخوف لدرجة ان سنانه تفضل تخبط في بعض ويفضل كدة قاعد على سريره لما يطمن اني نمت يقعد بعدها يعيط عياط جامد قوي ده غير انه مضرب عن الأكل ولما اغصب عليه يرجع فورا اللي اكله لغاية ما فيوم جاله جفاف واضطرينا نعلق له محاليل وبعد ما يتعافى شوية يدخل في حالته تاني حالة سكوت دايما او عياط دايما ده غير اللي جاله في الفترة الأخيرة جاله حاجة زي حساسية جلدية عبارة عن قُرح مش راضية تخف بأي طريقة , الصراحة الولد حاسة انه بيموت بالبطئ والولد التاني في السكة هوة كمان لأنه للأسف بيتعرض مني لنفس السلوك وجاله برضه بلاوي كتير من ضمنها السكر اللي صابه في السن ده , انا دلوقتي عايشة في جحيم لا عارفة اعمل ايه مع ولادي ولا مع نفسي , مش عارفة هل انا مجنونة ولا مريضة نفسيا ولا طبيعية بس الظروف اللي ضدي ؟ وهل فيه امل ولادي يبقو كويسين ولا خلاص .. مش عارفة كمان اعمل ايه في جوزي ؟ ملخبطة جدا ارجوكم شوفولي حل . م . ك فضفضة لم أجد ما أكتبه .. الأمر يحتاج إلى متخصص فلا أستطيع أن أقول أنك مظلومة وضحية لما تعرضتي له من سوء معاملة والدك فأهدر حق أطفال ليس لهم ذنب فيما تفعليه بهم .. الحل هو ذهابك فورا إلى عيادة طبيب للأمراض النفسية .. ادعو الله المغفرة . نيفين حجازي للمشاركة والفضفضة راسلنا على : هذا البريد محمى من المتطفلين. تحتاج إلى تشغيل الجافا سكريبت لمشاهدته.
