أرجوكم ساعدوني.. أنا متجوّزة من أربعة شهور فقط، وزوجي خاطبني وسافر، وعرفنا بعض عن طريق التليفونات، وثالث يوم جوازي نده لي باسم واحدة تانية، ولقيت بعد كده أخته بتكلّمه بتقول له إن فلانة دي اتصلت بيّ وعرفت إنه اتجوّز .. وعرفت ساعتها إن كان فيه بينهم قصة حب، بس هي سابته عشان ظروفه المادية كانت مش كويسة، ولما اتحسّن وضعه المادي طلبت إنها ترجع له، وهو رفض بعد قصة حب 6 سنين، وقال لي إنه ما يأمنلهاش على اسمه ما دام ماوقفتش جنبه في محنته، وإن أنا أخدته كده زي ما هو على بعضه من غير ما أفكّر في أي أمور مادية، وزعلت بس عديت الأمور عشان كنت لسه في أول أسبوع من جوازي. وبعد شهر رجع جوزي للبلد اللي بيشتغل فيها، واستنيت لحد ما يبعت لي، بس فضلت عايشة الشهرين دول في شك، خصوصا بعد ما حصلت مشكلة بينا؛ بسبب إنه غلط في اسمي، وقال لي إنه مش هينفع يمسح كل ذكرياته اللي كانت قبل الجواز، وبعدها بفترة طويلة طلبت منه "الباص ورد" بتاع إيميلاته؛ ردّ عليّ وقال لي مش عايزك تشوفي حاجات تتعبك نفسيا، لما تلاقي بعض الجمل والعبارات اللي كنت باقولها للبنت دي وقلتها لك!! سألته طيب إنت محتفظ بالحاجات دي ليه؟!! قال لي عادي مابحبش أمسح ذكريات كانت ليّ. وسافرت له من أسبوعين، وغصب عني بافتح موبايله أبعت رسالة لأهلي لقيته باعت رسالة ليها قبل جوازنا ب3 شهور، بعت لها قصيدة لفاروق جويدة بيحبها، وقال لها أخبارك إيه طمنيني عليكِ، ولما اتصلت بالرقم لقيتها بتقول لي أنا فلانة اللي هو اسم البنت اللي نده لي بيه ثالث يوم جوازي. أنا مابقتش باصدّقه في أي حاجة، ودايما باسأل نفسي إزاي واحد يقدر ينهي قصة حب في 4 شهور!! بالله عليكم ردّوا عليّ أنا حاسة إني مخنوقة؛ خصوصا إني مش مصدّقاه في حبه ليّ خصوصا بعد ما لقيته بعت لها رسالة أيام خطوبتنا، بعد كل الحب والرومانسية اللي كان معيّشني فيها يبقى أصدّقه دلوقتي؟ ب . ع فضفضة دققي فيما سأكتبه لك ولا تعطي لشكوكك الفرصة لتصبح المحرك الأساسي لحياتك , الأمر ليس أكثر من رجل يمر معك بمرحلة نقاهة من قصة تحولت إلى فعل ماضي وإن حدث إتصال بينهم , وإن كان زوجك غير راغب في الزواج منك ما كان فعلها , وإن كان يحبها أو يحترمها بالقدر الذي تتصورينه أنت لظل بجوارها حتى وإن تركته هي , زوجك كان صريحا جدا معك حتى إن كانت صراحته صارخة , لا تلوميه بل بالعكس فما فعله معك يشبه الدعوة لمشاركته ألمه من إنسانه باعته في لحظة ضعفه , فعل ذلك دون وعي منه بهذا المعنى بل كان دافعه الالم النفسي وقد إستغاث بك لكن ما حدث داخلك كان على عكس ماتمناه لذلك وقع الصدام بينكم , إدخلي معه في مشكلته وكوني طرفا إيجابيا بدلا من الخسارة الجماعية التي سيتسبب فيها عدم تقديرك للأمور , إلقي غيرة النساء جانبا وتذكري لو أن والدك وليس زوجك هو صاحب المشكلة .. كيف كنت ستديرين معه الحوار ؟ .. بالغضب أم بالحيلة ؟ .. بالأدب أم بالتعدي ؟ .. بالخروج من حياته أم بالدخول فيها بشكل أوضح ؟ .. هذا هو الحل .