مساء الخير أستاذة نيفين معلش انا بتقل عليكي بس انا خلاص مش قادر على القرف اكتر من كدة ، ارجوكي انصحي خطيبتي وهية بالمناسبة من قرائك أنها ترحمني لوجه الله .. إحنا قربنا نتجوز واتفقنا على كل حاجة ما عدا الشبكة هية مصرة أنها تشتريها في حدود 80 الف بمعنى أدق الشبكة اللي عجبتها ومصرة عليها بالمبلغ ده وأنا كان عرضي او حدودي لا تزيد أبدا عن 45 او خمسين بطلوع الروح اقسم بالله وأنا مش محرج اني احطها أمام الأمر الواقع برسالتي دي لأني قلتلها لكن بالذمة ده كلام يعني نختلف على شبكة ؟ وحجتها ان أختها لما اتجوزت جوزها جبلها شبكة بنفس المبلغ تقريبا طيب جوز أختها ده راجل ربنا يوسع عليه عامل شغل خاص بيه ومن زمان وبقى له اسم في السوق إنما انا موظف لكن مش كوحيتي انا في منصب ممتاز ودخلي والحمد لله ممتاز برضه يبقى ايه المشكلة ارجوكي قوللها كلمتين هية بتقتنع بآرائك للقراء بشكل عام يمكن ربنا يحك في كلامك البركة وخطيبتك تهبط شوية ونتجاوز في سلام .. شكرا أساتذتي الفاضلة وآسف على طول الرسالة . مجدي فضفضة محررة الصفحة .. نيفين حجازي يا خطيبة أستاذ مجدي ارجوكي تفكري بشكل افضل لان مبدأ المقارنة في حد ذاته مش مريح ومش صح ولو بداتي حياتك بالمنطق ده يبقى احب أطمنك ان حياتك هيبقى فيها مشاكل كتير انتي في غنى عن نوعيتها وعنها ده غير حاجة تانية مهمة وهية ان لو الأستاذ مجدي مش قادر يجيب الشبكة بالمبلغ ده دلوقتي ايه المشكلة انه يكبرهالك بعدين لما ربنا يكرم ده غير ان المبلغ اللي هوة مقرره مش قليل أبدا ده الناس دلوقتي بتتكلم في جواز ساده وبالعافية ده إذا نفع أصلا قولي الحمد لله انتي بتتكلمي في رفاهيات على الأقل في المرحلة دي .. أرجو ان كلامي ما يكونش تقيل عليكي بس والله لو انتي حبيتي خطيبك المفروض يبقى عندك بالدنيا مش بالشبكة .. والله انا محرجة وأنا برد على أمور المفروض أنها بديهية جداً .. اسفة على حدة لهجتي لكن والله ده حق ربنا هوة فيه حد دلوقتي عارف ولا قادر يتجوز أصلا . [email protected]