رُعاة البقر ... عالم خاص ,وملئ بالمخاطر , وبالظلام , عالم يعتمد على القلوب الجريئة , والعيون التى لا تعرف النوم , عالم حيوانات يقوده البشر تحت سماء الرزاق ذو القوة المتين , عالم الصبر و البحث عن لقمة العيش ,عالم البحث عن الستر والبحث عن المرعى أينما كان , عالم الترحال والتجوال و الخيام والبدائية , عالم آخر حاولنا التقرب منه والتعرف من أصحاب هذا العالم كيف يعيشون ... وماذا يتمنون ؟ تقابلنا مع احدى راعيات البقر وتُدعى " أُم محمد " التى أكدت أن مهنة رعى الأبقار مهنة صعبة ولكنها جميلة ... حيث قالت أن هذه المهنة تجعلنا نتنقل من مكان إلى آخر بحثاً عن طعام للأبقار ... وأضافت الراعية أن مهنة رعى الأبقار هى بصراحة " أكل عيش " وهى مالنا الذى نمتلكه ... وخير طبعاً ... بنشرب لبنها ونبيع منه ونبيع كمان نتاج الأبقار ونعيش منه انا وزوجى وأولادى ... وأشارت إلى أنهم هنا اليوم بمحافظة البحيرة وكمان يومين هنروح مكان تانى فى محافظة تانية ... احنا بنلف الجمهورية كلها طنطا والمحلة والمنصورة وكفر الشيخ كله كله وف الآخر بنررجع بلدنا فى الشرقية ... ثم ابتسمت الراعية وقالت احنا بلديات الرئيس محمد مرسى ... وعن رأيه فيه قالت هو راجل " حلو " وأحلى من مبارك ... بس انا عاوزاه بصراحة " يوسعها " على الناس شوية ... الناس عيشتها ضيقة وسكنها كمان ضيق زى حالاتنا بالظبط عندنا السكن ضيق عشان كدة عايشين " رحالة " عاوزينه يوسعها علينا الله يوسع عليه ! وعن كيفية المعيشة ,أشارت " الراعية " إلى أنها وأسرتها تنام داخل هذه " الخيام " مع العجول الصغيرة زى ما حضرتك شايف أما البقر الكبير بيكون قدام الخيمة ... أما فى الشتا بنجيب فرش بلاستيك وبنفردها على الخيمة كلها عشان تحمينا من الشتا , ثم أخذت الراعية " تنهيدة " كبيرة ثم قالت " مش قولتلك يا بيه عيشتنا صعبة , بس أكل عيشنا نعمل ايه . " ثم اختتمت بقولها ربك كريم وأرضه واسعة , بعد اذنك بقى عشان نجهز للرحيل من هنا لمحافظة تانية أشوف وشك بخير .
