التحديات فى مصر كبيرة ونحتاج تكاتف جهود الجميع الغرب فشل فى السيطرة على مستودعات السلاح فى ليبيا فوقعت الفوضى علاقتنا مع أمريكا إستراتيجية وعلى واشنطن تفهم حقيقة الأوضاع فى مصر نقوم بعمليات كبيرة في سيناء حتي لا تتحول إلى قاعدة للارهاب لن نعيش على مساعدات الخليج .. ويجب تطوير منظومة الدعم أكد المشير عبد الفتاح السيسى المرشح الرئاسى أن مصر قادرة على ضبط حدودها كاملة رغم امتدادها لمسافات طويلة ولن تسمح بأى فرد أو جماعة تنتهك سيادتها او تهدد حدودها . وقال السيسى فى حوار كامل مع وكالة رويترز للأنباء أن الشعب المصرى صبور جدا وعظيم جدا وقادر على تحمل كل الصعاب فى سبيل رؤيته لبلده تحرز أى تقدم فى كافة الأصعدة وفى كافة المجالات . وأكد السيسى أن مشكلة جماعة الإخوان مع الشعب المصرى وليست معه لأن الشعب لفظ الجماعة بسبب ما ارتكبته من جرائم وقتل وتخريب فى حق أبنائه ومنشآته. وحمل السيسى الدول الغربية مسئولية حالة الانفلات الأمنى الموجود فى ليبيا والذى يهدد حدودنا الغربية لأنها اكتفت بمرحلة التخلص من القذافى وتجاهلت السيطرة على مخازن ومستودعات الأسلحة المنتشرة فى ليبيا خاصة وأن الدولة الليبية الوليدة كانت تحتاج للمساعدة فى ظل غياب قوات الجيش والشرطة . وفيما يلي نص المقابلة التي أجرتها رويترز مع عبد الفتاح السيسي المرشح الأوفر حظا في انتخابات الرئاسة المصرية التي تجري هذا الشهر. فى البداية ما المدة التي تعتقد أنك ستحتاجها لكي تحدث فرقا حقيقيا؟ وما هي توقعاتك للجدول الزمني قبل أن يبدأ الناس في رؤية تغير حقيقي؟ المصريون يتطلعون إلى حاجات كتيرة جدا. خلال ثورتين كانوا بيتطلعوا إلى العيش والحرية والعدالة الاجتماعية. المصريين عايزين يعيشوا ده. أنا محتاج أقدم لهم الأمن والأمان والاستقرار والتنمية الشاملة. 100 يوم مش كفاية لأن حجم التحديات اللي موجودة في مصر كثيرة جدا وفي البرامج اللي موجودة في الدول الغربية الأمور أكثر استقرارا بكتير في كافة المجالات عن الواقع المصري أنا متصور إن في خلال سنتين من العمل الجاد والدؤوب ممكن أن نحقق شكلا من أشكال التحسن اللي المصريين بيتمنوه ويتطلعوا إليه. هل هناك زعيم في الماضي في مصر أو أي مكان في العالم تحاول أن تقتدي به؟ هل ترى أن عبد الناصر نموذج جيد لما تريد أن تكون عليه ؟ كل عصر وكل مرحلة لها من يقودها وينجح فيها والوقت اللي احنا فيه ده ظروف مختلفه جدا عن عصور أخري. احنا محتاجين نشتغل بجد لخدمة المصريين. ما مدى أهمية تصويت الناخبين لفكرتك عن النجاح في الانتخابات؟ احنا نجحنا في أول خطوة من خريطة الطريق والدستور وده كان دستور رائع جدا جدا ويحقق كتير من الأماني اللي المصريين بيتمنوها في حياتهم ومستقبلهم وحجم المصريين اللي نزل كان بالملايين لكن احنا محتاجين في الانتخابات القادمة يبقي أكتر كمان من اللي نزلوا في الدستور. علشان يختاروا بملء إرادتهم من يقودهم في المرحلة القادمة. هل هناك مستوى معين للمشاركة في التصويت تعتبره نجاحا؟ أتمني ان كل المصريين ينزلوا. احنا عندنا فوق ال 50 مليون ناخب أتمني ان هما كلهم ينزلوا دي فرصه للتعبير عن إرادتهم. إذن فأنت تتطلع لنسبة 100 في المئة؟ أتمنى. الولاياتالمتحدة شريك إستراتيجي لمصر منذ مدة طويلة. ما هو تقييمك الحالي لوضع العلاقات مع الولاياتالمتحدة؟ وما الجوانب التي تود أن تتحسن؟ علاقتنا بالولاياتالمتحدةالأمريكية علاقة استراتيجية مستقرة وثابتة وليس معنى إنه في وقت من الأوقات حصل حالة من الارتباك ده معناه إن احنا منقدرش نكمل ده لا طبعا دي علاقات مستقرة واحنا محتاجين، العالم دلوقتي علاقاته كلها علاقات متداخله ومتشابكة ومفيش مجال ان يبقى في علاقات لدولة على حساب دولة أخرى احنا محتاجين في مصر ان نتعاون مع كل الدول لأن حجم التحديات في مصر ضخمة جدا محتاجه دعم ومشاركة الجميع فيها. تم فرض تجميد جزئي للمساعدات العسكرية فهل تتوقع رفعه عندما تصبح رئيسا؟ خلينا واضحين انا متفهم المعايير الغربية والأوروبية والأمريكية طبعا فيما يخص تجديد وتعليق المساعدات. رغم ان ده ليه رد فعل سلبي جدا لدي الرأي العام المصري كل الوقت ما بيمر بتتضح الصورة اكتر للجميع والناس بتدرك والعالم بيدرك إن اللي حصل في مصر ده كان إرادة الشعب المصري. وماكانش يقدر الجيش يتخلي عن شعبه والا كانت هتحصل حرب أهليه احنا مش عارفين كانت هتوصل الى أي مدي احنا متفهمين الموقف الأمريكي وبنتمني ان يتفهم الأمريكان موقفنا. هل هناك شيء تود أن تقوله للرئيس أوباما عن اتجاه مصر ربما يفيد في تغيير وجهات النظر هناك؟ نحن نخوض حربا ضد الإرهاب والجيش المصري يقوم بعمليات كبيرة في سيناء حتي لا تتحول سيناء إلى قاعدة للارهاب تهدد جيرانها وتتحول مصر الى منطقة غير مستقرة ولو مصر مش مستقرة يبقي المنطقة مش هتبقي مستقرة وافتكر إن ده مش في صالح الأمن والسلام في العالم كله احنا محتاجين الدعم الأمريكي في مكافحة الإرهاب محتاجين المعدات الأمريكية لاستخدامها في مكافحة الإرهاب مش بس سيناء احنا النهارده بنشتغل بنؤمن حدودنا حدود ممتدة جدا من اول البحر المتوسط لغاية عمق الاتجاه اكتر من 1200 كيلو علي الحدود الليبية وزيهم مع السودان. غير الحدود البحرية اللي بتمتد إلى أكثر من 3000 كيلو كل هذا يحتاج تأمين حقيقي في وضع إنتوا شايفين المنطقة مرتبكة إزاي. بخصوص ليبيا هناك حالة عدم استقرار شديدة في ليبيا هل ترى في ليبيا تهديدا؟ مش بس في ليبيا احنا لازم نكون مستعدين لانتشار خريطة الإرهاب في المنطقة وأنا أتصور ان فيه دور للغرب في ذلك. هم لم يستكملوا مهمتهم في ليبيا. كان المفروض أن يتم تجميع السلاح اللي منتشر في كل مكان حتي تستقر الدولة ويبقي في حكومة لأن ماكانش في قوات مناسبه وكفاية من الجيش أو الشرطة علشان الدولة دي تستقر وتدخل في عملية الديمقراطية الحقيقية. دلوقت في أمر ثاني هياخد وقت كبير قوي لو سبناها بالطريقة ديه والمجتمع الدولي وعلي رأسه الغرب اللي هو شارك في هذه العملية وانا شايف انه كان لابد ان هو يستكمل مهمته بانه هو يحقق استقرار داخل ليبيا بتجميع السلاح وبتطوير وتحسين القدرات الأمنية في ليبيا قبل ما يتخلي عنها. تحدثت عن حل سلمي في سوريا فهل تعتقد أن سوريا ستكون أفضل حالا إذا بقي الرئيس الاسد في منصبه؟ أنا تكلمت على ان الحل السلمي هو الحل المناسب وهو وحدة سوريا لأن هذا لصالح أمن المنطقة حتى لا تتحول سوريا الى منطقة جاذبة للعناصر الإرهابية والمتطرفة. هل ترى أن هناك حلا يمكن أن يسوي المشكلة ولا يكون الأسد طرفا فيه؟ الامر يحتاج حوارا ومباحثات كثيرة لأن هو أخطر من إن احنا نقول في رأي بعينه إنما نبقي شايفين ان علي الاجمال لازم يكون أمامنا وحدة الاراضي السورية حتي لا تتعقد المنطقة أكتر. ما هو حال العلاقات بين مصر وإسرائيل الآن؟ وكيف ترى تطورها في ظل رئاستك؟ ج - احنا علاقتنا مع إسرائيل ومعاهدة السلام دي معاهدة مستقرة بقالها أكثر من 30 سنه وقابلت كثير من التحديات وهي مستقرة وثابته واحنا بنحترمها وسنحترمها وبالمناسبة الاسرائيليين عارفين كده كويس لكن الجديد اللي احنا بنتكلم فيه ان احنا شايفين ان فيه فرصه حقيقية لسلام يفتح ويجهز المنطقة ويدخل المنطقة في عهد جديد في سلام وتعاون بين الدول. ده اللي أنا شايفه. لكن أنا عايز أقول إن السؤال على التزامنا بمعاهدة السلام تجاوزته الاحداث خلاص. ده موضوع مستقر لدى كل القيادات ولدى الرأي العام في مصر. محتاجين نبني عليه ومحتاجين نشوف دولة فلطسينية محتاجين نتحرك في السلام اللي تجمد بقاله سنين طويلة هيبقي في فرصه حقيقية للسلام في المنطقة واحنا مستعدين للعب اي دور يحقق السلام والاستقرار والتقدم في منطقة الشرق الأوسط. هل لديك خطة لبناء الاقتصاد المصري؟ ج - لازم نعترف أن الوضع الاقتصادي في مصر صعب مش بس في خلال ال 3 سنوات الماضية والمصريين كانوا بيتطلعوا إلى حياة أكثر استقرارا من الواقع اللي احنا بنعيشه احنا بنتكلم على أكتر من 50 بالمئة من الشعب المصري بيعانوا من الفقر وفي حجم كبير من البطالة. ببساطة مدخلنا خلال هذه المرحلة في برنامجنا هو توفير فرص عمل للمصريين. هو ضبط الحد الاعلى والحد الأدنى للمرتبات في مصر والحد الادنى في مصر يعتبر ضئيل جدا وقليل جدا علشان يحقق مستوي اجتماعي مناسب. والدعم الذى تقدمه الدولة يجب أن يتم توزيعه بعداله حقيقية الاغنياء يمكن بينالهم من الدعم أكتر من اللي بينال الفقراء احنا محتاجين نوزع ده البرنامج ببساطه خالص بيتكلم على إنه هو نخرج من النسبة المحدودة جدا اللي المصريين قاعدين عليها علي الارض دلوقت في مصر 6 % أو 7 % محتاجين نمتد و نتمدد على الارض المصرية أكتر من كده. وندي فرص عمل أكبر من كده. وندي كمان فرصه للاستثمار المصري والعربي والاجنبي. لكن بصراحة أنا الكلام بأوجهه للغرب وبأوجهه للاصدقاء كلهم مصر تحتاج الى مساعداتكم خلال هذه المرحلة حتي تخرج من دائرة الفقر التي تعاني منها. هل ترى استمرار دور الجيش في ضمان استخدام أموال الخليج في الاقتصاد؟ احنا محتاجين كل مؤسسات الدولة تساهم في تطوير وتنمية المجتمع وتقدمه للامام أي مؤسسة لديها القدرة أن تقوم بهذا الدور . هل في الوقت الحالي الجيش هو أفضل مؤسسة لهذه المهمة؟ الجيش مشغول كتير قوي في مكافحة الإرهاب في سيناء وعلي حدودنا الغربية وعلي حدودنا الجنوبية إنما لو في فرصه إنه يساعد في أعمال هندسية بطرق هيتم الاستفادة من هذه الامكانيات. بالمناسبة يعني في كلام علي إن الجيش يمتلك 40 بالمئة و 20 بالمئة من اقتصاد مصر وده مش حقيقي ولا يزيد عن 2 بالمئة من الاقتصاد وهذا الاقتصاد اللي بنتكلم عليه هو عبارة عن المواد التي يوفرها الجيش لمتطلباته من أغذية وملبوسات. هل ترى سبيلا لخفض الدعم؟ احنا في وضع مؤلم الآن مع ظروف هذا الدعم وتوزيعه علي كل حال لكن احنا مش هنقدر نضغط علي الفقراء أكتر من كده لكن ممكن يتم استخدام وتوزيع وترشيد الدعم أكتر يجب أن يصل الدعم للفقراء وليس وكمثال علي الدعم اللي بياخده الاغنياء او القادرين لو مواطن يمتلك فوق ال 2000 سي سي حجم الدعم المقدم ليه في الوقود في مصر اللي هي في ظروف اقتصادية صعبه قد تصل الى 3 أو 4 الاف جنيه شهريا وبغض النظر هو بيستخدم مدى استخدامه الواسع للعربية نفس الكلام للكهرباء المواطن الوحيد اللي ما بيستفدش بالدعم بشكل جيد هو المواطن الفقير. معندهوش عربية احنا محتاجين نتحرك ونرشد الدعم ده بحيث ان هو يروح للفقراء فقط علشان ميبقاش مؤلم. هل عندك أي خطط لخفض نفوذ رجال الاعمال الذين كانوا مهيمنين في عهد مبارك؟ احنا دولة عايزة تشتغل فى اطار القانون والدستور وعايزين نتعامل فى هذا الاطار ونعظم هذا الدور دلوقتى ومستقبلا ومش عايزين يكون فيه إجراءات تخوف اى حد لكن كمان محتاجين يبقى فيه إجراءات توفر فرص متكافئة للجميع. ما الذي سيجذب الاستثمار الدولي الى مصر في السنوات القليلة المقبلة؟ ان مصر دولة كبيرة وموقعها متميز جدا فيها عمالة ضخمة دولة شابة وحجم الشباب الموجود بمصر ضخم جدا قادر على العمل قادر على العطاء وسوق كبير جدا ممكن الاستثمار فيها يبقى ناجح جدا جدا جدا لموقعها وسوقها وهي كمان مدخل لافريقيا بكل ما تعنيه هذه الكلمة ففي فرصة حقيقية واعدة للاستثمار فى مصر نحن سنتحترم التزاماتنا وسنوفر المناخ المناسب والقوانين المناسبة لتحفيز الاستثمار. هل تعتقد انه يجب تعويم الجنيه المصري تعويما حرا؟ هل هو عقبة أمام الاقتصاد؟ فى الحقيقة كل ما موقفنا الاقتصادى يتحسن كل ما سعر العمله سيتحسن والعكس صحيح وباختصار شديد نحن محتاجين إجراءات لتحفيز الاقتصاد وضخ اموال كثيرة جدا فى شرايينه عشان يحصل تحسن حقيقى يشعر به المواطن ويهدأ ويستقر ومصر تدخل فى مراحل افضل من اللى هيا فيه دلوقتى. ما عدد السنين التي تتوقع ان تواصل فيها دول الخليج مساعداتها؟ استمرار مساعدات الخليج ليست أمرا جيدا بصراحة واتمنى ان ينتهى فى أسرع وقت مش أنا بس اللى بيفكر كده كل اللى المصريين هل ترى أن الوضع المثالي عامان أم خمسة أم عشرة أعوام؟ هذا سيتوقف على النتائج اللى احنا هنتحرك عليها. تحدثت عن القضاء على الاخوان فهل تعتقد أنك تحرز تقدما؟ انظروا إلى خريطة التطرف والإرهاب فى العالم كله وستجدوا ان هذا الامر أصبح مستهجن وغير مقبول من معظم دول العالم .. فكرة القتل والتخريب والتدمير اللى موجودة فى دول كتير أعتقد ان أنتم تتفهموا ان هذا امر الإنسانية لا تقبله والحضارة ما تقبلوش والمنطق ما يقبلوش. هل الدول الغربية أصبحت تفرض قيودا شديدة على السماح للمصريين وشعوب أخرى من الشرق الأوسط بالذهاب لجامعات الغرب؟ بمعنى آخر قيود بعد أحداث 11 سبتمبر؟ هذا جزء من الموضوع خلينا نتكلم على 27 دولة أوروبية. لو كل دولة أوروبية قدمت لمصر 30 طالبا كل سنة يعنى هيكون 2200 طالب سيكونوا موجودين فى الجامعات الأوروبية. ولو 10 بالمئة من جامعات أمريكا اعطت رقم مماثل سنجد ان العدد ضخم إذا كان التعليم يسير مع الامن فهل من المعقول حظر نشاط الاخوان المسلمين؟ المشكلة ان هما فقدوا الصلة مع المصريين وفقدوا التعاطف مع غالبية المصريين. وده أمر لازم انتو تكونوا منتبهين ليه. العنف غير المبرر تجاه المصريين ده أفقدهم أي شكل من أشكال التعاطف. مش بس كده. ده كمان ماخلاش ليهم فرصه للمصالحة الحقيقية مع المجتمع. وده الواقع اللي احنا بنتكلم فيه. إجراءات زى التعليم وزى محاربة الجهل والفقر وايجاد فرص عمل للناس والثقافة بكل ما تعنيه كلمة ثقافة من فنون وآداب حتى تصحيح الخطاب الدينى ده جزء من المعالجة. لكن فيه قانون وفيه دولة قانون لازم كلنا نحترمها وهما لو احترموا القانون ونفذوه ما افتكرش هيبقى فيه مشكلة. المشكلة مش معايا بصراحة المشكلة مع الشعب المصري وانتم موجودين هنا فرصة عظيمة بطالبكم واقولكم انزلوا كلموا المواطن المصرى العادى البسيط واسألوه. هتجدوا انه غاضب جدا ورافض جدا أي شكل من اشكال المصالحة. هل يمكنني أن أسألك عن محاكمة أعضاء الاخوان المسلمين. صدرت أحكام كثيرة بالإعدام في المحاكم. هل تعتقد أن العملية القضائية نزيهة وهل تؤيد هذه القرارات؟ انا عارف الثقافة الغربية وعارف منطق الإنسانية عندكم واتفهمه في الاول انا مواطن مصري دلوقتي انا مش مسؤول مصري وارجو ان تقبلوا منى هذا الكلام وتثقوا فيه. انا لن اتكلم عن قضية بعينها لكن عايز اقول ان احنا بنؤسس لدولة قانون ونحترم القضاء واستقلاليته ولا نتدخل فيه. وهذا مهم جدا. وانا عايز اقول لكم انتم مهتمين بالنقطة دي وهذا امر اقدره وافهمه. لكن كمان كنت اتمنى ان انتم تبقوا مهتمين بعدد الضحايا اللى على الجانب الاخر. كيف تتعامل مع التطرف في سيناء وحدود مصر؟ وما هي الخطوات العملية التي ستأخذها إذا أصبحت رئيسا؟ عايز أقول مش هيكون غير مزيد من الإجراءات احنا كنا حريصين على إن سيناء لا تتحول إلى قاعدة للانطلاق بهجمات تهدد جيران مصر لأن هذا ضد سيادة مصر على أراضيها وضد اتفاقية السلام اللى احنا موقعينها. ونحن تفهمنا رد الفعل من جانبهم عندما حدثت بعض العمليات المحدودة ضد الاراضى الإسرائيلية. لكن احنا على الجانب الاخر داخل سيناء قمنا ونقوم بعمليات موسعه جدا لضبط الموقف الامنى والتعامل مع العناصر الإرهابية الموجودة سواء بالقبض عليها او التعامل معها. لكن هناك نقطتين كنا حريصين عليهم. اول نقطة ان احنا ماكناش عايزين نلجا إلى أعمال عنف غير مبررة ومش عايزين يبقى فيه انتهاك لحقوق الإنسان. مش عايزين يبقى فيه قتل للابرياء عشان ميبقاش ده ذريعة لتوسع هذه العمليات. هو ده اللى بيخلى الامر يطول. وبرضه احنا فيه معدات محتاجين ان الولاياتالمتحدةالأمريكية تديهالنا واعتقد ان الامر لازم دلوقتى يتراجع والامر ده يتحقق فى اسرع وقت ممكن. انا بتكلم عن سيناء دلوقتى مش بتكلم عن حدود اكثر من الف كيلو. الجانب الاخر فى ليبيا معندوش الفرصة ان يؤمن حدوده بالشكل المناسب واحنا لدينا التزامات تجاه الامن القومي المصري تجاه امن واستقرار هذا المواطن. هذه نقطة محتاجين مش بس أمريكا تفهمها الغرب والعالم كله يفهمها. وعشان كده احنا بنمد ايدينا لكل دول العالم عشان تساعدنا لأن احنا لازم نكافح الإرهاب بفاعلية وننجح فى هذه المواجهة. تتحدث كثيرا عن احباط الشعب المصري ونفاد صبره. كم من الوقت تعتقد أن المصريين سيمنحونك لاحداث فرق حقيقي في حياتهم؟ المصريين شعب صبور جدا. وشعب عظيم جدا. وافتكر حضارة 7000 سنة. بشرط يجد امل بيتحقق وانجاز على الارض هيبقى عندهم استعداد يصبروا. انا بأدعوا الغرب ان ينظر بعين الاعتبار والتقدير فى التنمية التطوير والدعم الاقتصادى المصرى استكمالا لخريطة الديمقراطية فى مصر ارجو ان هذه الرسالة تصلكم.
