تحدث شوقى غريب المدير الفني لمنتخب مصر الأولمبي عن حقيقة اعتراض لاعبي أولمبي الفراعنة على اختيار محمد صلاح نجم ليفربول الإنجليزي للمشاركة فى أولمبياد طوكيو. قال شوقي غريب عن رفض اللاعبين انضمام محمد صلاح على هامش المؤتمر الصحفي المنعقد حاليا فى استاد القاهرة: "اللاعب لاعب، ولو كان اللاعب هو اللي بيختار يبقى احنا نقعد في بيوتنا، ده منتخب مصر مش نادي عندي 30 لاعب.. تأكدوا من حاجة.. مصر ليها لاعيبة كتير.. ولو حد خد فرص حد.. أنا متأكد إنه هيجيد". وأضاف "مازلت بضرب مثال.. إنه قبل بطولة إفريقيا اتصاب محمد محمود وكريم نيدفيد وطاهر ومرعي، وكانوا من القوة الأساسية، ولا غنى عنهم لكن لولا إننا كنا بنلاعب كل العناصر التانية مكناش هنلاقي بديل". تابع "أول مباراة تعرض ناصر ماهر للإصابة لكن محدش حس بغيابه الماتشات اللي بعد كده، كما أصيب أحمد حمدي ومكانش موجود برضو، وما يمكن اللاعب اللي بيقول ده مش في حساباتي أصلا.. ساعات نشوة الفرح والانتصار بتخلي اللاعب يحس إن الناس بتاخد منه حلمه وفرحته لما الناس واجهتهم بسؤال عن انضمام صلاح". استطرد "مستعد اعمل استبيان على الاختيارات في المنتخب محدش يعرف يحط قائمة ومنتخب مصر فيه تنفيذ أوامر مع حب واحترام وتضحية". وقال شوقي غريب أيضا "اللاعبون الاحتياطيون في قائمة الأولمبياد لن يسمح لهم بدخول غرف الملابس ومسموح بالتبديل خلال الأولمبياد حال حدوث إصابات.. بخروج اللاعب المصاب واختيار لاعب من الأربعة الاحتياطي". واختتم "القرعة يوم 21 أبريل الساعة 11 صباحا في مقر الاتحاد الدولي وهنحضرها أونلاين.. إحنا قرارنا فني باختيار اللاعيبة لكن الموافقة بتاعة اللاعب والنادي ومديره الفني مهمة".
