روى سامي جوهر الشهير ببرعي حاجب المحكمة بمسرحية "شاهد ماشفش حاجه"، قصة مشاركته في المسرحية، التي جاءت بالصدفة. وقال سامي في حواره ببرنامج «معكم» المذاع على قناة «سي بي سي»: "الحكايه بدأت لما رحت مع شوقي شامخ المسرح عشان أشوف المسرحية من الكواليس، وأنا واقف في الكالوس، الزعيم كان بيطلب حاجه ساقعه من عامل البوفيه، فالعامل انشغل وانا اللى كنت واقف، وكنت ماسك الحاجه الساقعه للزعيم عشان لما يطلبها، لأن الجو في المسرح كان بيبقى حر جدا، فكان بيطلب حاجه ساقعه في وسط المسرحية. وتابع سامي: "كنت لابس في اليوم ده ومتشيك جدا، فلما دخلت بالحاجه الساقعه للزعيم قفشني، وقال وزير الحاجه الساقعه ده ولا إيه، ومن يومها طلب الزعيم إني أدخل كل يوم المسرح وأعمل معاه نفس المشهد، وهو بدأ يخلق حوار امتع بيه الناس، ومن هنا كانت مشاركتي بالصدفة في المسرحية".