الأولتراس اقتحم التمرين ليه!؟ هقولك ليه! طبعًا الأستاذ مجدي عبد الغني "صاحب الضربة الأولى في كاس العالم 90" والأستاذ مصطفى يونس أخبرونا عن إن أهالى شهداء "بورسعيد" تمّ تعويضهم ماليّاً ... هنعمل إيه تاني يعني!؟ الدوري ده فلوس ناس، وحقوق الرُعاة .. وبيوت مفتوحة! تبقى إيه المشكلة بقى!؟ أقولك أنا إيه المشكلة: عارف الواد القلبوظ منكوش الشَعر إللي اسمه "أنس"؟ المشكلة في أمّ الواد ده! لما بتشوف صورته، بينور قدام عنيها عدد ضخم من الخواطر: بتشوف صورته وهو نازل يوم الماتش، وهي بتحاول تقوله إن البلد مش أمان وبور سعيد بعيدة، بس "أنس" مُصمم ينزل. لمّا بتفتكر، بتلوم نفسها إنها ما منعتهوش!!. الستّ الساذجة لسّه بتعيّط رغم إنهم ادوها فلوس كتير!! بس أصل في مشكلة بسيطة: إنها بتقوم كل يوم من النوم عشان تروح تحضنه، بس بتلاقي السرير فاضي، وبتفتكر إنه مات، وإنها مش هتعرف تلمسه تاني!!. لما بتشوف شَعره المنكوش، بتفتكر إنها كانت بتغلب معاه كل كام أسبوع عشان يروح للحلاَّق! هي بس عاوزاه يرجع تاني، ومش مهم يحلق شعره!! هي بس عاوزه تشوفه كمان مرّة وخلاص!!. بتقعد تنتظر النوم يمكن تحلم بيه!! بس النوم مش بييجي، لحد ما تقع من طولها، تفقد الوعي، وتشوف "أنس" وهي نص نايمة ونص صاحية، بس بتشوفه مدبوح وبيجري خايف وهي بعيد مش عارفة تقوله إنها هنا عشان تحميه! يمكن لو كانت معاه كانت تعرف تحميه أو حتى يدبحوها معاه!!. بس يا سيدي! المشكلة كلها في الستّ دي!! بصّ! خُد نصيحتي، واقتل الستّ وخلينا نبدأ الدوري ونشجّع مِتعب، ونقول "أرقص يا حضري!!" .... إيه ده! هو "الحضري" ساب الأهلي؟ غريبة! أصل الواد "أنس" ماسبش الأهلي !.
