أنا باوجه كلامى لسيادة وزير النقل والحكومة المبجلة (حكومة هات)، باقترح عليك يا سيادة الوزير إنك تخلى التذكرة ب5 جنيه، بس بشرط حضرتك تجيب العيلة وسيادة الوزراء وعائلتهم وتركبوا المترو ده لمدة أسبوع، أتحداكم إنكوا مش هتقدرو تروحوا وترجعوا فيه يوم واحد. حضرتك طبعا شايف إن الخدمة المقدمة لعامة الشعب الفقرة الغلابة خدمة لا تقدر بثمن (الجنيه)، والصراحة إنت عندك حق ومش هخبى على سيادتك إحنا متبهدلين خدمات وهقولها طبعا الخدمات خدمة خدمة :- أولا: خدمة الدخول: المكن كله شغال ومافيش أى حاجة عطلانة خالص خالص ولا براميل مانعرفش إيه لازمتها، بندخل فى سلام ونطلع يا سلام مبسوطين آخر انبساط. ثانيا: خدمة انتظام مواعيد المترو: حضرتك يا سيادة الوزير عقبال ما تغمض عينك وتفتحها تلاقى المترو جه (يعنى تأييلة كدا ما تتعداش الربع ساعة). ثالثا: خدمة الركوب المريح: إحنا بنبقى مرتاحين جدا جدا يا حكومة جوه المترو لدرجة إننا مابنحبش ننزل فى محطتنا، أنا ببقى مريحة على اللى قدامى واللى ورايا عليا كده وبندوس على بعض كمان، راحة بقى ما فيش زيها. رابعا: خدمة التهوية: طبعا ده حاجة لا تقدر بثمن، إحنا بنبقى مش عارفين ناخد نفسنا من كتر الهوا والروايح الجميلة، الهوا شديد جدا ولو مكيف بنتلج من التكييف وبنضطر نلبس شتوى فى عز الصيف. خامسا: خدمة الأعطال: أول ما المترو يعطل بينزلونا على الرصيف الاحتياطى وبيتصلوا بأقرب محطة فيها رصيف طوارئ يبعتولنا مترو فاضى. ههههههههههههه هو حضرتك صدقت يا فندم، دي أحلام اليقظة اللى بتدور جوه كل مواطن غلبان صاحى الصبح رايح شغله بالمترو طالع عينه مانامش من الديون اللى عليه، ويا دوبك حق التذكرة فى جيبه، بيشوف الأمرين فى النص ساعة ولا الساعة اللى بيركب فيها المترو، قبل ما تفكروا تغلوا التذكرة شوف حال الناس اللى بتتبهدل كل يوم علشان ياخدوا ملاليم بيقدروا يركبوا بيها المترو (أبو جنيه) اللى كله بهدلة ومحتاج عضلات علشان تقاوم قوة الدفع جوه المترو، وحضراتكم ماتقولوش إحنا جبنا عربيات مكيفة، حضرتك المترو لحد دلوقتى فيه عربيات مهكعة حتى مافيهاش مروحة تخفف عنه الحر والهم والمكيف اللى متكربس ناس على بعضها ولا بتحس بأى تكييف من كتر ما هو زحمة، يا ترحموا الناس يا تنزلوا تركبوا المترو بدالهم أو تدوهم خدمة آدمية حقيقية. #لا_لزيادة_تذكرة_المترو
