علق مدحت شلبى، المذيع الرياضى، على حضور مانويل جوزيه "المدير الفنى السابقى لفريق النادى الأهلى" مباراة القلعة الحمراء الأخيرة فى الدورى أمام دجلة، بأنه لايجوز واتفق معه مجدى عبد الغنى كابتن الأهلى السابق. وكان مانويل جوزيه المدير الفنى السابق حضر برفقة خالد مرتجى عضو مجلس إدارة النادى الأهلى، مباراة وادى دجلة الأخيرة فى الدورى والتى انتهت بفوز الأحمر 1/0 بهدف للسيد حمدى. وقال شلبى:" غير لائق بأن يصطحب مرتجى مانويل جوزيه ويجلسان فى المقصورة الرئيسية، ويجلس حسام البدرى تحت فى المقصورة الأمامية، إحنا مصريين وعندنا حساسية وأتذكر عندما حضر مانويل جوزيه للقاهرة وفطر فى بيت خالد مرتجى وكلنا قلنا إنه من الاستحالة أن يدرب جوزيه الأهلى مرة أخرى فى ظل تألق حسام البدرى مع الفريق وفى النهاية مشى البدرى ودرب جوزيه". واتفق مجدى عبد الغنى معه بقوله: " جوزيه لديه علاقات فى إدارة النادى الأهلى وجماهيره ولكن كان من الدبلوماسية أن خالد مرتجى عضو مجلس إدارة النادى الأهلى ومحسوب عليه عاوز يتفرج على الماتش هو وجوزيه يروحوا يتفرجوا على كافتيريا أو فى فندق أو فى بيت مرتجى ولكن فى المدرج لا، أنا مش بتكلم على جوزيه أنا بتكلم على عقلية المصريين مش هيقبلوا دا فى ظل أن فيه ناس بتقابل جوزيه دلوقتى وبتقوله أنت هتمسك الفريق". واختلف أيمن يونس كابتن الزمالك السابق معهم فى الرأى " كل واحد ليه رأيه الخاص وأنا رأيى أن مشاهدة جوزيه اللقاء فى الملعب أو فى مكان آخر طبيعية ولا أحد يملك أن يختار له المكان الذى يشاهد فيه اللقاء ومحدش يقدر ياخد مكان البدرى الآن، البدرى استطاع بدون اللاعبين الكبار اللى يقدروا يعملوا الفارق على أى فريق إنه يكون موجود لحد دلوقتى، البدرى اللى بأقل الإمكانات قدر يفوز بالبطولات، الراجل جاى يخلص فلوس ليه عند الأهلى ويقعد مع الناس اللى بيحبهم ويتفرج على النادى اللى بيشجعه يبقى براحته". أخبار مصر - البديل