* الدقهلية تستعد ل 25 يناير تحت شعار ” لو خايف علي مصر .. إحنا مش اقل من تونس “ كتب - اشرف جهاد و مني باشا : قال مركز نصار للقانون والمحاماة وحقوق الإنسان قيام قوات الأمن بالإسكندرية بإلقاء القبض على ثلاثة من نشطاء حركة 6 إبريل بتهمة بتوزيع بيانات في ميدان الساعة تدعو المواطنين على المشاركة في مظاهرات يوم الغضب “25 يناير”. وأوضح المركز أن النشطاء الثلاثة وهم: محمد مرسي, وإسلام الجندي, وهيثم الرملي محتجزين حاليا بقسم شرطه المنتزه أول . من ناحية أخرى وجه مجموعة من شباب النشطاء في محافظة الدقهلية رسالة إلي المواطنين للمشاركة في يوم الغضب علي التعذيب والفقر والبطالة يوم 25 يناير القادم في مدينة المنصورة دون تحديد المكان إلا في اللحظات الأخيرة جاء في الدعوة التي انتشرت كما انتشرت أولي دعاوي النزول إلي الشارع علي شبكة التواصل الاجتماعي ” الفيس بوك ” لو خايف على مصر .. لو عايز حقك .. انضم لينا .. وشارك وكفاية سكوت بقه لحد كده إحنا مش أقل من تونس.. نزل عشرات الآلاف جابوا حقوقهم كلها ووصلت لدرجة إقالة رئيس الجمهورية وهروبه من البلد .. إحنا عايزين حقوقنا .. مش عايزين بطالة وطوابير عيش وطوابير أنابيب وشباب مش لاقي يتجوز .. في نفس الوقت اللي فيه حرامية في بلدي يسرقوا المليارات ويهربوا .. وبيشتروا أراضي ومصانع الشعب برخص التراب عايزين اللي قتل خالد سعيد يتعاقب واللي قتل السيد بلال يتعاقب واللي أتسبب في موت المصريين في إسكندرية ونجع حمادي يتعاقب وعايزين وزير الداخلية يستقيل .. عايزين أي شخص عذب مصري يتحاكم .. عايزين قانون الطوارئ يتلغي .. مش عايزين قمع في مصر .. عايزين نكون أحرار عايز أعرف أعبر عن رأيي في بلدي .. عايز مخافش من أمن دولة ولا ضابط شرطة .. عايز يتم معاملتي بآدمية واحترام بغض النظر عن جنسي ولا لوني ولا ديني ولا حالتي المادي.يللا يا شعب قوم وفوق! يوم 25 يناير لازم نوري العالم كله إننا مش شعب خانع ولا شعب جبان” علي الجانب الأخر وصلت عدد من رسائل المحمول إلي عدد من الأرقام تدعوهم للمشاركة يوم 25 يناير نصها ” لازم تشارك يوم 25 يناير عشان ولادك من بعدك “و”كلنا نازلين يوم 25 عشان نجيب حقنا وانت كمان لازم تشارك ” الجدير بالذكر أن الرسائل وصلت بشكل عشوائي لعدد كبير من الأرقام كما قام عدد من الشباب بتوزيع بوسترات للدعوة ليوم الغضب كما أطلق علية تحت عنوان أنا نازل يوم 25 أجيب حقي بالإضافة إلي مطالبات للمواطنين بالمشاركة وطالب القائمون علي الدعوة بثلاثة مطالب الأول رفع الحد الأدنى من الأجور ل 1200 جنيه عملا بأحكام القضاء وصرف إعانات للعاطلين عن العمل والثاني إلغاء العمل بحالة الطوارئ وإقالة وزير الداخلية وإخراج كل المعتقلين بدون أحكام قضائية والثالث حل مجلس الشعب وإعادة الانتخابات مع ضمان نزاهتها وتعديل الدستور لمنع ترشح أي رئيس لأكثر من فترتين رئاسيتين
