عشان احنا شعب مفتري بطبعه لازم نفكر بعد أحكام إعدام الميت والأسري اللي طلعت إزاي نرجع حق مبارك وصحبته الحلوة اللي حكموا 30 سنة واتسجنوا وخرجوا وما اتعدموش ولا مرة؟. فعلا مبارك ونظامه ما عملوش أي جريمة تستحق الإعدام ؟ ومين دا اللي يحاكمه يا شوية شعب مش لاقي ياكل؟ هوه اللي جوعكم ؟ ما طول عمركم جعانين.. جاب لكم الفيروسات والمرض؟ انتوا آخر ناس تتكلم عن الصحة وانتوا بتاكلوا كل حاجة وأي حاجة عشان المصري معدته بتهضم الزلط.. إيه يعني أما تهضم الفيروسات؟ جاب لكم الجهل ؟ مش ذنبه إن كل واحد فيكم مفكر نفسه أبو العريف وبيفهم في كل حاجة. وبعدين اللي اتعلموا خدوا إيه ؟ اذا كان اللي واخدين دكتوراه متلقحين علي القهاوي ليل نهار يبقي الراجل كان عنده بعد نظر لأن العلام بيجيب فكر وأمراض. مش لاقيين سكن هتلاقوا مقابر تعيشوا فيها ما نفعتش مفيش اكتر من الشوارع والكباري اللي عملها. نيجي بقي لمربط الفرس يعني ايه الراجل ما يتعدمش وهوه قتل المتظاهرين؟ فداه ياخويا هوه ورجالته ال 90 مليون مصري.. ما انتوا متعودين ولادكم يا بيغرقوا في العبارات يا بتولع بيهم القطارات يا بيموتوا من القهر. وبعدين كل اللي ماتوا دول عيال بايظة.. حرية إيه وعدالة إيه؟ دي حاجات خرافية موتت الأخ أفلاطون بالسكتة القلبية... نيجي بقي لحل الفوازير.. هوه مين قتل مين ؟ ومين سرق مين ؟ وليه مبارك ما اتحاكمش علي فساده؟ ومرسي ما اتحاكمش علي كذبه وفنكوش النهضة؟ ومين صاحب حدوتة القصاص اللي بنسمعها كل يوم قبل النوم؟ عاوزاكم كدا تصمدوا وكفاية يا مصريين ان مشرحتنا بقت واحدة ووصلنا بعد 4 سنين ثورة لنتيجة واحدة وهي «الموت علينا حق» .
