غاب شهريار في رحلة صيد لمدة شهر فعاد متلهفا لحكاوي شهرزاد - احكيلي ياشهرزاد من حكاوي ألف ليلة وليلة عن أحوال العباد والبلاد، بس لو حسيت في كلامك أي اشتغالة هارجعك تاني شغالة، أنا راجع من الصيد هلكان ومش عايز حكاوي مورستان.. عايزك بقي ترمي الكتب القديمة وتعملي لوك جديد عليه القيمة، سيبك من تخاريف التوك شو المليانة عك وخديني أبوس إيدك لعالم تويتر والفيس بوك - يحكي أيها الملك السعيد ذو العرش المجيد أن أحوال البلاد الواقعية قد فاقت كل الحواديت الخيالية حتي أن الأدباء والشعراء توقفوا تماما عن التأليف واكتفوا برصد الواقع المخيف. - يا لطيف يا لطيف - زي ما بئولك كده يا مولاي حتي رجال الدين الحنيف توقفوا عن الفتوي والتعريف بعد صدور كتاب القول اللطيف من فتاوي ايناس بنت الدغيدي والشوباشي بن شريف. - ايناس بنت الدغيدي والشوباشي بن شريف؟ هل هما من علماء الأزهر الشريف. - لا يا مولاي شريف بن الشوباشي مفكر من أصحاب الألباب يطالب حريمنا بخلع الحجاب، أما اللهلوبة ايناس الشقية فتريد لشبابنا الحرية الجنسية بعد أن عانوا سنوات طويلة من كبت الحرية، وقد خرجت علينا ذات صباح لتقول كلاما غير مباح. - بلاش ألغاز يا شهرزاد وقولي بسرعة كلام ايناس من غير قال ولا عاد قبل ما يفوت الميعاد وفي ثوان تلاقي السياف برقبتك قد عاد. هيء هيء هيء مكسوفة منك يامولاي، أصل الست ايناس قالت كلام حساس ماينفعش يدخل بيوت الناس، تصورعايزة تحط الكبريت جنب الجاز وتخلي الشباب يخلفوا صبيان وبنات من غير جواز! خلاص متكمليش خلينا نتكلم عن حاجة تانية..هو انتي ليه في السياسة مابتتكلميش؟ حتي السياسة يا مولاي بقت خيالية، مبارك وولاده أخدوا براءة في عشرميت قضية، وأسرة البرنس جمال، الأميرة فريدة والملكة خديجة الجمال ركبوا في الهرم جمال وهاتك يا تصاوير آخر جمال وشربوا مياه غازية وقزازتين ميه معدنية. باقولك إيه سيبك من السياسة كلها وجع وأنين، مفيهاش حاجة تسر العين، وطالما كلامك جنون في جنون بلاها سياسة وكلميني مثلا عن الرياضة أوالفنون. اسكت يا مولاي عندي ليك خبر إنما إيه الزمالك يا مولاي الزمالك! بلاش تفكريني وحياتك ع اللي جرالي من تشجيع الزمالك، طبعا عايزة تقوليلي انه هالك وطريقه للمركز التاني سالك؟ لا يامولاي لا، الزمالك بقي حاجة تانية ويكون مغلوب فيغلب في ثانية! ياشهرزاد بلاش تخاريف، وكلام سخرية وتسخيف، تاريخنا في تشجيع الفريق ده مخيف، مش ممكن يفلح ولو جابوله الاشكيف. طب اقولك علي سر خطير؟ فوز الزمالك بالدوري السنة دي احتماله كبييير! - أنا ممكن أصدق ان مبارك وولاده براءة، واسمع فتاوي الدغيدي والشوباشي الخالية من البراءة لكن الزمالك ياخد الدوري فقلبي الصغير لا يمكن أن يحتمل آآآه آآه مولاي مولاي رد عليا يامولاي (وهنا أدرك شهرزاد الصباح فسكتت عن الكلام المباح ونادت مسرور السياف وثلاثة خدم أقوياء الأكتاف لحمل الجثمان بعد أن أصبح الملك في خبر كان !)
