ممتاز القط بصراحة أنا خايف أوي من حكاية المظاهرات والمطالب الفئوية.. وخوفي الاكبر انه يجي يوم نلاقي فيه الرئيس مرسي هو ونائبه ومساعدوه ومستشاروه عاملين مظاهرة وواقفة احتجاجية هما كمان.. اشمعني ماهو مفيش حد احسن من حد والريس قال انه ريس لكل المصريين.. يبقي لازم ينزل معاهم يشاركهم وقفاتهم الاحتجاجية. لكن ياتري الريس ورجالته هيقفوا فين؟!! قدام قصر الاتحادية.. يعني قدام مكاتبهم ولا قدام مجلس الوزراء ولا مجلس الشوري او الشعب.. وياتري مطالبهم هتبقي ايه وايه الشعارات اللي هيكتبوها. طبعا مطلبهم الوحيد هو ان كده مينفعش.. البلد بتقع من الاضرابات وحكاية الكادر اللي بقت موضة.. صحيح هي بتعبر عن حالة الناس اللي بقت كرب قدام الغلا الفاحش.. لكن البلد كلها واقفة. اشارة مرور مصر كلها عطلانة واذا كانت الحرية والعدالة علمتنا اننا نطلع نقول رأينا.. لازم كمان نعرف واجباتنا.. احنا بصراحة بنشل الريس ورجالته وفي النهاية مش هو بس اللي هيدفع الثمن.. لكن كلنا هندفع.. وكمان معانا ولادنا واحفادنا.. والغريبة انك تسمع واحد بيقول فين القروض اللي جابوها فين الفلوس اللي انسرقت.. وواحد تاني بيقول انه انتهي. عصر الطاعة لامريكا وغيرها وان الكلمة كلمتنا دلوقتي ومحدش هيقدر يتحكم فينا.. طيب جميل قوي.. لكن حد يقولنا ازاي.. نستلف عشان ناكل.. نستلف عشان نزود الكادر والمرتبات نستلف عشان بصراحة نعيش.. وساعتها الخايب بس هو اللي يقول ان قرارنا بايدنا واننا لانقبل الضغوط.. والله العظيم حرام اللي احنا بنعمله في بلدنا.. ولازم نعيد من تاني كل حساباتنا.. مواردنا مش قليلة ولكن احنا بنهدرها في التراب بسلوكنا واخلقنا واحساس كل واحد فينا انها فرصة ياخد حقه.. زمان قلت ومليت من الكتابة ان مصر مش محتاجه مهاتير محمد ولا واحد ذي اردوغان ولكنها محتاجه لشعب زي شعب مهاتير وشعب اردوغان. محتاجين نصحي من النوم لان الثورة مش معناها ان كل حاجه شبيك لبيك. صدقني يادكتور مرسي لازم تعمل مظاهرة تقول للناس فيها ان كل حاجة بايديهم وان احنا سوي سوي.. لازم تعمل مظاهرة تصحي الضماير اللي نامت وهي بتحلم بالمليارات اللي هتدحدف علينا من السما.. اعمل مظاهرة واوعي تخاف.. عصرالخوف انتهي.
