وراء الاحداث

د/ عبد المنعم سعيد : مساء الخير .. يعنى حتى شهر مضى كان هناك تصورأن الأزمة الإقتصادية والمالية والعالمية قد أخذت مسارها المعتدل لانه فى بداية الأزمة فى منتصف سبتمبر عام 2008 كان هناك ثلاثة سيناريوهات سيناريوكان متفائلا أن الدول سوف تقوم بإنفاق محفزات كبيرة فى ذلك الوقت إدارة الرئيس بوش قامت بالوعد بإنفاق حوالى 750 ملياردولار ودول العالم المختلفة إنه كما يُقال يتم إطفاء الحريق بكثيرمن النقود والانفاق لكى يتم تعويض البنوك التى كانت لديها مديونية عالية كان فيه تصورأنه يمكن حل الأزمة خلال فترة قصيرة وبالتالى يمكن الخروج منها بسرعة دا كان تصور متفائل .
كان هناك تصور متشائم للغاية أن الأزمة حادة وعميقة وتدخل فى صميم النظام الإقتصادى الأمريكى ومن ثم النظام الإقتصادى العالمى الى الدرجة التى بدأ التشبيه الكبير بأن هذه الأزمة سوف تصبح مماثلة تماما لأزمة الكساد الكبير التى جرت فى الثلاثينات من القرن الماضى .. أزمة ممتدة أخذت ما يزيد عن عقد أدت الى حرب عالمية الى آخر ما هو معروف فى التاريخ .
كان فى مسار ثالث معتدل هذا المسار قال به عديد من الإقتصاديين المرموقين قالوا أن هذه الأزمة سوف يكون لها دورة هذه الدورة تبدأ بتعميق الانكماش الإقتصادى على المستوى الدولى والعالمى بدايةً بالمولايات المتحدة الأمريكية أن عام 2009 سوف يكون عاما سيئأً فى الإقتصاد الدولى ولكن مع نهاية عام 2009 يبدأ الإقتصاد الدولى فى دخول مرحلة من الإستقرار ومع عام 2010 فى الربع الأول سيبدأ بعض بوادر الانتعاش وبعد ذلك يبدأ هذا الانتعاش يأخذ دفقات من التطور المتسارع حتى يصل الى عام 2011 فإذا بالإقتصاد العالمى ينطلق شاهدنا ذلك وربما قدمنا عدد من الحلقات هنا تشير أن هناك بالفعل الإقتصاد العالمى وصل الى قاعه أثناء 2009 وفى نهايته بدأ الإستقرار ثم بدأت بوادر للانتعاش وظهرت هذه البوادر فى أسعار النفط – أسعار النفط عادةً تعتبر من المؤشرات ذلك لان معنى ذلك مزيد من إستهلاك الطاقة – مزيد من استهلاك الطاقه معناه أن الناس معناها فلوس ومعنى الناس معاها فلوس معناها إنه فى طلب على ما تقدمه المصانع .. يعنى ما تقدم من سلع وبطائع وخدمات الى آخره ولكن فجأة من الشهر الماضى بدأت بوادرأزمة تجرى فى دولة أوربية مرموقة متقدمة ضو فى الإتحاد الأوربى هى اليونان وشاهدنا مشاهد لا نشاهدها إلا فى دول العالم الثالث حيث خرجت الجماهير تحرق إيطارات السيارات تتظاهر تحتج بعنف ترمى بالأحجار مؤسسات الدولة مشهد غيرمألوف وإذا بكثير من المعلومات بدأت تخرج الى مساحة الإعلام العالمى ان اليونان بخت أزمة وأن اليونان كذبت على صندوق النقد الدولى وأنا لم تقدم المعلومات الخاصه بتوازنها المالى للبنك المركزى الأوربى وبدأ نوع من التراشك يجرى ما بين اليونان من الناحية وبعض دول أوربا التى قالت أن اليونانيين إذا كانوا يريدون التعامل مع ديونهم الكثيرة فليس عليهم أن يتوقعوا أن يأخذوا من الدول التى تعمل مثل هولندا أو مثل ألمانيا وتحدث بعض الألمان والهلنديون عن أن اليونان تبيع جذورها فجأة وجدنا أن اليونان ليست اليونان فقط ولكن عدد من الدول الأوربية الأخرى أيرلندا البرتغال وهكذا أصبحت الأزمة الأوربية .
العالم كله الان يحبس أنفاسه على هذه الأزمة هل نحن إيزاء أزمة أوربية فقط بعد أن كانت أزمة يونانية فقط أم أن ذلك سوف يمتد الى الإقتصاد العالمى كله .. ذلك سوف يكون موضوعنا فى برنامج وراء الأحداث ويسعدنا أن يكون معنا ضيفنا سعادة السفير جمال البيومى الخبير بالشؤن الاوروبية والإقتصاد الدولى ولكن قبل أن نلتقى مع ضيفنا تعالوا نستمع الى هذا التقرير
فاصل " تقرير"
بينما كان العالم على وشك تصديق أن الأزمة الإقتصادية العالمية قد بدأت فى الانحصار بعد أن أخذت بعض الإقتصادات طريقةا نحو التعافى من أثار تلك الأزمة إذ بأجواء الأزمة تعود مرةً أخرى ولكنها تأتى هذه المرة بسبب الأزمة المالية فى اليونان فاليونان تواجه الان خطر الإفلاس التام بعد أن وصل حجم الدين العام بها الى ثلاثمائة مليار يوروا وهو ما يمثل أكثر من 100% من حجم ناتجها الإجمالى كما وصل عجز الموازنة الى 12,7% من الناتج المحلى الإجمالى بينما النسبة المسموح بها فى منطقة اليوروا هى 3% فقط وهو الأمر الذى يفرض ضرورة توفيرالمساعدات المالية الكبيرة لانقاذها من هذا المصير تبعاته فإضطر رئيس الوزراء اليونانى جورج باندريو الى طلب القروض من الإتحاد الأوربى وصندوق النقد الدولى وبالفعل وافق وزراء مالية وإقتصاد دول منطقة اليورو على حزمة مساعداتٍ بهدف إنقاذ اليونان قيمتها 110 مليار دولار حيث سيتم تأمين 80 مليار دولار منها عبرقر وض ثنائية يتم الحصول عليها من دول اليورو بينما سيوفر صندوق النقد الدولى المبلغ المتبقى .. كما كان على رئيس الوزراء اليونانى قبل كل ذلك أن يعلن عن ضرورة إتخاذ إجراءات تقشفية لم تعهدها اليونان من قبل مثل تخليص المنح والعلاوات لموظفى القطاع العام ورفع ضريبة المبيعات الى 21% ووقف معاشات التقاعد وزيارة الرسوم المفروضة على الدخان والمحروقات والمشروبات وفرض ضرائب كبيرة على السيارات الفارهة والقوارب والمروحيات والطائرات ونتيجة لتلك الإجراءات شهدت اليونان إحتجاجات وإضطرابات لم تعهدها من قبل إذ أضحت شوارع أتينا والمدن اليونانية الكبرى مسرح لتظاهرات أضطرت الشرطه للتعامل معها بالغازات المسيلة للدموع وعلى الرغم من أن اليونان كانت عضوا بالإتحاد الأوربى منذ عام 1981 إلا أن شهادة مولدها كدولةٍ أوربية متقدمة إنتظر لقرابة عقدين من الزمن إذا إنضمت الى منطقة اليورو فى بداية الألفية الثالثه بعد أن تمكنت بمساعدة ما حصلت عليه من المساعدات الأوربية من الإرتقاء على سلم التقدم حتى بات متوسط نصيب الفرد فيها من الناتج المحلى الإجمالى اكثر من 30 ألف دولار وإحتلت المكانة 26 فى ترتيب الدول طبقا لمستوى التنمية البشرية فيها وكان دخول منطقة اليورو شهادة على قوة الإقتصاد اليونانى الى أن جاءت الأزمة المالية فى مطلع العام الجارى تؤكد أن الصورة المزدهرة لليونان لم تكن حقيقة بل كانت تقوم على إسراف مبالغ فى الإقتراض من البنوك بفوائد صغيره حتى تعدى حجم الإقراض فى الدولة 100% من الإدخار وهى حالةٌ تشبه ما جرى فى الولايات المتحدة وأحدث الأزمة الإقتصادية فى العالميه لماذا حدثت الأزمة المالية فى اليونان ؟ وهل يمكن إعتبار تلك الأزمة إمتداداً للأزمة العالمية وما هى أهم تداعياتها على الإتحاد الأوربى ؟ وهل يمكن أن تنعكس فى شكل أزمة عالمية أخرى ؟ وكيف ستؤثر تلك الأزمة على الإقتصاد المصرى ؟ هذه هى أهم التساؤلات التى تناقشها تلك الحلقة من برنامج وراء الأحداث .
فاصل
د/ عبد المنعم سعيد: الأزمة المالية فى أوربا وضيفنا سعادة السفير جمال بيومى أهلا بك سعادة السفير.
السفير/ جمال البيومى : أهلا بك .
د/عبد المنعم سعيد : سيادة السفيرالأزمة العالمية بدت كما لو كانت إنها فى طريقةا الى الزوال وفجأة حصل الانفجار اللى الناس فى الشارع بتحكى عنه أطر سيارات ومظاهرات وإبدت زى ما بيقولوا اليونان سيرتها على كل لسان إيه اللى حصل فى اليونان بالظبط ؟
السفير/ جمال البيومى : هوأولا عايزأقول اليومان تمثل أقل من 3% من إقتصاد المنطقة الأوربية فده حجم المأساه ومع ذلك عندى ثقب فى المكان فهو أنا عندى نظام نقدى أوربى عتمد على كل أعضاؤه – أعضاؤه ينبغى أن يلتزم بمعايير الأمان المالى فعشان أنا أكون عضو كدولة فى منطقة اليوروا لما أنشئ فى سنة 2000 وطالع 2 معايير( 1 ) إن التضخم عندى لا يزيد عن 12,5% (2)عجز الموازنة ممكن إنما لا يزيد عن 3% الناتج القومى (3) الدولة وهو بتعمل عجز فى الموازنة الديون العامه الحكومية لا تزيد عن 60% من الناتج القومى .
د/عبد المنعم سعيد:عجز من الموازنة معناها إن الدولة بطبع فلوس مش كده أوإنها تنفق ؟
السفير/ جمال البيومى : تنفق لان اللى بيطبع البنك المركزى الأوربى فى فرانكفوت .
د/عبد المنعم سعيد: ما يزيدش إنفاقها عن 60 % من الناتج المحلى ؟
السفير/ جمال البيومى : البورونج الإستيدان سواء من البنك المركزى او من أى جهة هى من حقها تستدين هى ما بتطبعش فلوس .
د/عبد المنعم سعيد :إنما ما يزيدش عن 60% لان لو زاد هنخش فى تضخم يؤثر فى بقية أعضاء السوق,سؤالى اليونان ديه بلد أوروبية المفروض إنها جزء من بحيرة التقدم فى أوربا فى الإتحاد الأوربى الأزمة الإقتصادية معانا بقالها سنة ونصف وكل الناس بتقول لازم بقى نمشى مظبوط ويبقى فيه إيه اللى خللى اليونان تستمرفى إنها تخالف القواعد الأوربية ؟
السفير/ جمال البيومى : لأ دا مش بس اليونان دا فيه بؤرمن الضعف لوما كنتش الأزمة العالمية حصلت ما كنتش ظهرت وخد مصر فى العكس الأزمة لما ضربت العالم كانت مصر واقفه على رجلها كويس وفى هذا نشيد بالقطاع المصرفى المصرى كان بالفعل من 2004 حتى بداية الأزمة اقام القطاع المصرفى على قدمية لهذا صندوق النقد يقول لك إن مصر واجهت الأزمة بأفضل مما كان متوقعا لانها كانت واقفه على رجلها .
د/ عبد المنعم سعيد:خلينا على جانب مصر دلوقت اليونان كانت إيه ؟
السفير/ جمال البيومى : تُقاس السلسلة بأضعف حلقاتها اليونان ضعيفه الحكومة كانت بتعمل إنفاق أكثر من إمكانياتها كال لهم (المتش ميتيو آر ريدنج ينظر يور منذ) إنت عايش أكثرمن إمكانياتك المرشح لهذا لما تقرا حضرتك حجم التضخم والانفاق والعجز فى الموازنة فى عدة دول هيبقى عندى أسبانيا مرشحة هيبقى عندى البرتغال إيطاليا عاملة نسبة مديونية عالية جدا
د/عبد المنعم سعيد:هنييجى للجانب الأوربى من الأزمة بس عايز أفصص شوية الجانب اليونانى فى الموضوع يعنى اليونان بلد قائمة على إقتصاد السوق الكلام دا لو ديه بلد قائمة على قطاع عام وكده يبقى إيه اللى يخلى الدولة تستلف الفلوس ديه كلها ؟
السفير/ جمال البيومى : العيب هو أن الإقتصاد الحر خان الامانة وذور فى مراكزه المالية لازم نكون صرحاء فى هذا حتى من بداية الأزمة كلها عباره قامت على أن بنوك كبرى ال 10 بنوك اللى سقطت فى الولايات المتحدة زورت مراكزها المالية والبالونة اللى إتعملت فى الرهن العقارى كله أصيب .
د/عبد المنعم سعيد:هل دا اللى حصل فى اليونان إنها إستمروا فى موضوع ؟
السفير/ جمال البيومى : اللى حصل فى اليونان إن إستمرت فى الانفاق فى حكومة عايزة تنفق ولم تحافظ على المعاييراللى هى ملتزمة بها بمقتضى معاهدة ماستركت اللى هى بتقول مشروطية ماستركت خرج عن قواعد الأمان الإقتصادى والأمان المالى فأنفق جاءت الحكومة الحالية وفقت على هذا .
د/عبد المنعم سعيد :أنفقت على إيه اليونان ؟
السفير/ جمال البيومى : على الأولمبيات مثلا .
د/عبد المنعم سعيد:أنا كنت عايز النقطة دية الأولمبيات كان سبب .
السفير/ جمال البيومى : مع إن الأولمبيون إدولةا 10 بليون يوروا للمساعدة على الأولمبيات وأنا رحت أتينا قبل وبعد الألومبيات لا..لا..لأ دا أخذت يعنى أتدهنت كلها من أولها لآخرها وحصل إنفاق طرفى عينى .
د/عبد المنعم سعيد:ففى البنية الأساسية مطارجديد وا الى آخره .
السفير/ جمال البيومى : حاجات كثيرة ومواجهة وسياحة الى آخره قد لا يكون هذا عيبا فى ظروف عاديه إنما حضل الأزمة القلب غير سليم فما تخليش بقى تُسرف فى الآداء اللى يؤثر على قلب المشاهد .
د/عبد المنعم سعيد:هو سؤالى ليه اليونان إنفجرت فى أبريل وبدأت تبان فى مايو كان عندنا سنة من الأزمة الإقتصادية كل الناس بتتكلم عن الرشاده الإقتصادية العيوب اللى حصلت المبالغة فى الانفاق إنه لازم يبقى فيه مفيش إقراض إلا مقابلة ارصدة يعنى الدروس ديه كانت بتتقال تقريبا كل يوم هل ما فيش فى اليونان؟
السفير/ جمال البيومى : المفروض لو النظام ماشى بعملية رقابة على حركة الأموال والبنوك المركزية – حذ بالك إن فيه بنوك مركزيه فى كل دولة من الدول الأعضاء منطقة اليورو الى جانب البنك المركزى الرئيسى اللى هوفى فرانك فوت هناك بنوك كبرى فى الولايات المتحدة غطت على المركز المالى اليونانى ذورت مركزها بحيث أظهرت أن لديها أرصدة فى تلك البنوك تغطى مثل هذا الانفاق وتبين إن فيه تذوير فالإحتياطى الفيدرالى الأمريكى بيحقق الى الان مع هذين البنكين النهارده فى أخبار اليوم اللى جايه من أوربا هناك تحقيق مع 6 بنوك غطت على المركز المالى الضعيف .
د/عبد المنعم سعيد:حصل تواطؤ بين بنوك أوروبية أمريكية على إن هى .
السفير/ جمال البيومى : حصل تواطؤ مع حكومة اليونان السابقى لتغطية مركزها أمام البنك المركزى .
د/عبد المنعم سعيد:إيه اللى كشف الموضوع بقى ؟
السفير/ جمال البيومى : اللى كشف العجز عن السداد وصلت للحظة مواجهة الحقيقة وتباين إن السيولة فيها مشكلة إبتدوا يسرخوا فيه دول أوربا إنقسمت فيه دول تقول لك ما تسعدوهم إدفعوا لهم 120 مليار أو ما الى ذلك .. الشعب الألمانى اللى هو أكبر إقتصاد فى أوربا النهارده وثانى أكبر إقتصاد فى العالم سبق عنده مشكلة إنضمام ألمانيا الشرقيه والغربية ودفع تكلفه باهظه لهذا مش كل مره جارى أو صديقى وشريكى فى المؤسسة يعمل كارثة وأنا عايش بما ينبغى أن يكون عليه العيش بما يرضى الله ثم ييجى كل شوية واحد يقول لى سلِّفنى فموقف أنجلى ميرك مهم قوى لان النقطه فاصله أنا مستعد أساعدك إنما شعار الساعدات الألمانية على فكرة إن الله يساعد الذين يساعدون انفسهم فمش ممكن هأفضل أديك لتمويل إنفاق أنا مش عارف على إيه إلا إذا وعدت الحكومة اليونانيه أنها تلتزم بضغط الانفاق بشكل كبير حصل هنا بقى إن بقى الحكومة بين شقى الرحا اللى عايزين يساعدوها بيقولوا لها إضغط الانفاق لان ما فيش حل ثانى .
د/عبد المنعم سعيد:هل الانفاق كان فيه جزء منه حكومى يعنى اليونان عندها جهاز حكومى واسع ؟
السفير/ جمال البيومى : طبعا .. طبعا . كل أنواع الانفاق اللى هى ما جبتش عائد لان لوكانت جابت عائد ما كنش حصل دا .. الشق الثانى من المأساه هو الطبقات اللى أقل قدره لانك لم هتقلل الانفاق لتقلل الانفاق على التعليق والصحة وعلى الوظائف وهتقلل المرتبات وتجمد المرتبات فالشارع ثارلان يخشى إن يكون حل الأزمة يبقى على حسابى أنا الطبقى الفقيره بينما اللى إستفاد هم كبار رجال البنوك المذورين وكبار رجال الشركات المذورين الى آخرهذا المنوال دا الوضع فى اليونان .. أزمة كبرى زلزال كبير جاء التوابع ونخشى إن دا ممكن.
د/عبد المنعم سعيد:كيف تحول إذاً الأزمة اليونانية الى أزمة أوربية – يعنى كما إستمعت معنا الى المقدمة أجهزى الإعلام كلها بدأت فى الأول بتتكلم عن المصير اليونانى على أساس إنه حاجه تعبر عن السفه والانفاق غير المسؤل لكن فجأة قال لك دا أوربا كلها أو جزء كبير من أوربا سوف ؟
السفير/ جمال البيومى : فيه أربع دول أوربيه بعد اليونان مرشحة لهذا الوضع إن لم تلتزم فورا بضغط الانفاق لان هو إحنا كلنا لننهل من نفس البحيره اللى بتمول إنفاقنا عندى بنك مركزى هو اللى بيطبع هذه الفلوس وعاملها إنما المديونية هى المشكلة زيادة الانفاق أدت الى تضخم غير مسموح إنك تعمل تضخم فى دولة لان التضخم فى الإقتصاد المنفتح عدوى بينتقل لإقتصادات أخرى فإزَّاى أنا كألمانى وأو كهولندى أو بلجيكى بأكد وأكدح طول السنة عشان أظبط نظامى الإقتصادى وييجى واحد تانى يسرف عضو فى الأسره متلاف فهيبوظ النظام فأصبح صعب أن يكون هناك خلل بمعزلٍ عن بقية أعضاء الجسد فى الجسد الأوربى الواحد بل لا يمكن أفصل أوربا عن الولايات المتحدة الى أن الرئيس أوباما إتكلم ومستشاره للشئون الإقتصاديه إتكلم بحيث إنه برضه فيه قلق أمريكى زى ما حصل قلق أوربى لما أمريكا حظت هذه المأساه .
د/عبد المنعم سعيد:لماذا بدا الأمر كله وكأنه مفاجأة بمعنى إن الكل قاعد مستريح آسيا تصعد الصين شغَّاله وهند كوريا الجنوبية وإنه الإقتصاد العالمى هيطلع ما حدش ليه راقب يعنى الحاجات ديه بتتحسب شهر بشهربيقولوا التضخم قد كدا العجز قد كدا ؟
السفير/ جمال البيومى : لان فيه حاجتين إنعدام الشفافية فمابنش حكومات غطت على سلوك سيئ لبنوكها وعلى الإقتراض وغيره وأيضا أجهزة الرقابة سواء الأوربية أوالدولية كان النهارده بيقولوا عايزين نعمل صندوق نقد أوربى لان صندوق النقد الدولى أيضا أخفق فى الرقابة على حركة الأموال والأموال الساخنة وما حدث من مضاربات فالنهارده يلتزم أمامى صندوق النقد الدولى أحد الحلول بنقول لصندوق والبنك والعالم الثالث هذا أظن خطبة الرئيس مبارك أما مجموعة ال15 بيطالب برقابة دولية على مثل هذا السلوك ما يكسبش الناس لان أصبح كلنا نتأثر بل الحمد الله ما هناك منطقة اليورو عشان نتأثر بهذا القدر الكل بيتأثر بالخلل فى الإقتصاد العالمى إذن نحن مع الإقتصاد الحر لكن ما فيش حاجه إسمها إقتصاد حر يترك لشهوة رجال بنوك مذورين أو ر جال بورصه تلاعبوا بالمواقف .
د/عبد المنعم سعيد:سيادة السفيرإيه هى الدول اللى هى جانحه إذا جاز التعبير بين الدول الأوربية مين الدول اللى هى تنتها زى ما بيقولوا على الصراط المستقيم وكانت بتعمل إيه بشكل مختلف عن الدول الجانحه ؟
السفير/ جمال البيومى : إنت دلوقت أوحيت إلىَّ بحاجه لان سبحان الله الجانحين كلهم متوسطيين .
د/عبد المنعم سعيد:ههههههههههه
السفير/ جمال البيومى : ههههههه البحرالأبيض أصله برضه شواطئ كده ومايوهات فالسلوك ههههه مش سليم سلوك بحرمتوسط اللى هتلاقيهم منظبطين بتوع الشمال يعنى هتلاقى السويد هتلاقى ألمانيا هتلاقى هولندا كل دول ما فيش فرق الفرق هو .
د/عبد المنعم سعيد:فيه أيرلندا كان عندها عجز موازنة حوالى 11,7؟
السفير/ جمال البيومى : لأ أيرندا الحقيقه دولة مجتهده جدا الدولة ديه عملت تقدم خطير منذ دخولها فى الإتحاد الأوربى من دولة زراعية بتاعة بطاطس الى أحسن دولة فى أوربا بتعمل اليكترونيات لكن يبدوا إن فيه مشكله يمكن مش باينه لنا دلوقت إيه اللى حصل فى المديونية اللى حصلت أيضا فى أيرلندا .. المشكله يا دكتور إن النظام .
د/عبد المنعم سعيد:يعنى الحاله فى أيرلندا أسوأ من ناحية اليونان عجزها 9,3 ؟
السفير/ جمال البيومى : آه بس أيرلندا أصغر وأصغر .
د/ عبد المنعم سعيد : لأ المديونية 77% التانيه 124 يعنى صرفت الناتج المحلى كله ههه.
السفير/ جمال البيومى : مظبوط .. دا النبأ اللى مش مطمئن الان فى اللحظة اللى إحنا بنتكلم فيها إن ال 10 دول الأكثر غنى فى العالم مديونه بأكثر من 78 % من ناتتجها القومى الان على بال ما تكلم سداد هذه المدينونيات أو توضب أمورها فى سنة 2014 سيكون كل ال10 الأغنيه مدينين فى 114% ناتجهم القومى .
د/عبد المنعم سعيد:عايزين نشرح ديه ما علهش يا سيادة السفير شوية كلمة مدينين لان المشاهد لما يسمع كلمة مدين يعنى واحد إستلف من واحد إيه المقصود ؟
السفير/ جمال البيومى : لأ الحكومات عايزه تسد الصغة اللى القطاع المالى عملها – البنوك اللى سلفت قروض ر ديئة أو راهنت فى البورصات .
د/عبد المنعم سعيد :فهى مدينه لبنوكها ؟
السفير/ جمال البيومى : فالحكومات بقى مدينه لبنوكها للبنك الدولى صندوق النقد الدولى لدول أخرى الى آخر هذا الخط لان لما إجتمعوا فى واشنطن فى بداية الأزمة الكبرى حطوا 3 آلاف بليون دولار دفعوها الحكومات التزمت بها هتجيبها منين ؟ من دافع الضرائب من ناحية ومن المديونية للبنوك بالعكس مش مديونه لبنوكها بقى دا هو غطت عجز البنوك بعجزٍ يعنى اللى سار مدين مش البنوك وإنما الحكومات ودا خطر هيبقى 114 % من الناتج القومى لأغنى 10 دول فى العالم هو الدين بحيث كل مواطن فى أمريكا وأوربا هيبقى مدين فى 50 ألف دولار قد دخله القومى فى سنتين فعلا عملية مش مظبوطه السبب فى ده إيه إن إحنا إتولدنا ونسمع على إن الجنيه الدهب هو اللى يتداول ثم خرجنا بالجنيه الدهب الى جنيه ورق يغطيه جنيه دهب ثم إبتداءا من 71 حتى الولايات المتحدة خرجت عن هذا النظام وبقى الجنيه الورق أو الدولار الورق يغطيه الثقه ثم بعد ما كنا بنقول البنك المركزى هو الجهة الإصدارالوحيدة للنقود الورقية سبنا جهات أخرى تخلق إئتمان مش بتطبع فلوس صحيح إنما بقى فى جيب حضرتك كريدت كارت بطاقة إئتمان وبقى فيه دفتر شيكات وقروض رديئه أو غير رديئة على حسب ذمتنا المالية ثم عملية الإقتراض المهولة دون ضابط أورابط ثم البورصات والمراهنة فيها بحيث عملنا بلونه.
د/عبد المنعم سعيد: فإبتدت يبقى فيه فلوس وهى مفيش فلوس يعنى هه.
السفير/ جمال البيومى : دا فيه رقم مذهل يقول لك الإقتصاد الحقيقى العالمى الان يساوى 68% ترليون دولار والإقتصاد الوهمى دا يساوى 668 ترليون دولار أكثر حوالى 10 أضعاف يعنى اللى موجود وهما .
د/عبد المنعم سعيد:اللى هو الحقيقى اللى هو يعبرعن منتج زراعى أوصناعى ؟
السفير/ جمال البيومى : سلعى أو خدمى إنما البورصات وا وا وا خلقنا وهم .
د/عبد المنعم سعيد: فيها فلوس عمَّاله تلف .
السفير/ جمال البيومى : فخلقنا إئتمان – خالق الإئتمان كما درسنا كلنا شيئ جميل إن واحد .
د/عبد المنعم سعيد: سيادة السفير هنقف عن النقطه ديه ونكملها بعد فاصل قصير إستأذنك .. نلتقى بعد الفاصل
" فاصل تقرير"
على الرغم من كونها دولة صغيرة بالإتحاد الأوربى إذ يمثل الناتج المحلى لليونان 3% فقط من مجمل الناتج المحلى لمنطقة اليورو إلا أن الأزمة المالية التى تمر بها اليونان قد ألقت بظلالها على دول الإتحاد الأوربى كبيرةا وصغيرها بل إنها إزعجت معظم دول العالم تحسبا لعودة أجواء الأزمة الإقتصاديه العالمية وإذا كان رئيس صندوق النقد الدولى قد أكد منذ شهرين أن الأزمة المالية اليونانية لن تتكرر فى بلدانٍ أخرى فى منطقة اليورو إلا أنه لم ينفى إمكانية تأثر دولٍ أخرى فى الإتحاد الأوربى بتلك الأزمة فأكثر الدول الأوربية المرشحة للتأثر بقوة هى البرتغال وإيطاليا وأيرلندا وإسبانيا وهو الأمرالذى يزعج الإتحاد الأوربى فتكلفة إنقاذ تلك الدول قد تصل الى ترليون دولار. اما الولايات المتحدة فقد عبر الرئيس باراك أوباما عن قلقه الشديد بسبب تلك الأزمة كما كانت تلك الأزمة سببا رئيسيا فى قيام وزيرة الخارجية الأمريكية بأول زيارة على هذا المستوى لليونان منذ عام 1993.. إضافةً الى ذلك فقد فرضت الأزمة اليونانية نفسها على وزراء مالية مجموعة الدول الصناعية السبع الكبرى خلال الإسبوع الماضى تبحث عن خطة لانقاذ اليونان تفادياً لمخاطر تفاقم الأزمة وهكذا سيكون على دول العالم أن تحبس أنفاسها إنتظارا لما ستسفر عنه خطط إنقاذ اليونان .
فاصل
د/عبد المنعم سعيد:الأزمة المالية فى أوربا وضيفنا سعادة السفير جمال بيومى وكنا قد وصلنا الى أصول المسائل بمعنى إيه أصل القضيه التى جرت فى اليونان وفى أوربا سيادة السفير كنت إنت بدأت تتكلم عن قاعدة الذهب والمقابل لها ؟
السفير/ جمال البيومى : إنتقلنا من الجنيه الذهب لجنيه ورق يغطى جنيه دهب لجنيه ورق يغطيه الإقتصاد والانتاج والثقه فى إن الجنيه دا بكره هيفضل محافظ على قيمته ثم إتنقلنا إن المؤسسات المالية والمصرفية بتصدروسائل للسداد والوفاء بالإلتزامات مهياش ورق تبقى شيكات – تبقى كريدت كارد بطاقات إئتمانية الى آخره ثم طلع لنا مسائل الأسواق المالية الفكرة جاءت ظاهرها الرحمه وباطنها العذاب – ظاهرها الرحمه إن المواطن فى أمريكا وأوربا إدخاره الأساسى بيبقى أن يتملك بيته وإثنين يعمل صناديق معاشات وما الى ذلك فتبين إن 80% من المواطنين فى الولايات المتحدة يمتلكوا بيوتهم فاللى فكر قال طيب ما 20% ما نملكهم بس هم مش كلهم يمتلك وسائل الوفاء ودا اللى إعترف ألن جريس باند بهذا الخطأ إن بنك الإحتياط الفيدرالى أو الإحتياط الفائض سمح بتخفيض سعر الفائدة النهارده أذكرك فى عهد الرئيس ريجن إحنا إقترضنا ل 22% فى الدولار النهاره الدولار علامه فصله وزيرزا زيرزا ما أنا عارف يعنى 25 يعنى صفر تقريبا – معظم العملات ديه بقى صفر يعنى حضرتك تقترض مليون ولار وفعلا هتسدد نصفهم لانه بعد شوية الدولار مش هيبقى هو الدولار فأغروا الناس على إنها تقترض .
د/عبد المنعم سعيد :بالمناسبة تخفيف شديد لسعر الفائدة تقصد.
السفير/ جمال البيومى : أيوه صفر فائدة وعمليا لما تييجى على بال ما تسدد على 10 - 15 سنة بتسدد أقل من المبلغ اللى إنت أخذته فى القيمة الحقيقية .
د/عبد المنعم سعيد:لانه بتحسب التضخم .
السفير/ جمال البيومى : الله يسترك .
د/عبد المنعم سعيد: بس فيه ناس بتقول إن الفائدة اصلا غلط يعنى ههههههه.
السفير/ جمال البيومى : إنما دا واقع الحال فيه قصه يا سيدى بطلها مش أنا اللى إخترعت إسمه – إسمه سعيد ههههه .
د/عبد المنعم سعيد: حد تانى هههههه أوعى يكون عمل مصيبة يعنى هههه.
السفير/ جمال البيومى : دا جوجل كاتب .. لأ دا الراجل كان حسن النيه هو عايز يتملك بيت بحسن نيه ساكن فى شقه ب 700 دولار وشاف زميله اللى زيه فى الماهيه ساكن فى فيلا قال له إزَّاى تقدر تدفع قال له لأ دا أنا إشتريت الفيلا كلها قال له إزَّاى قال له بقسط شهر 700 دولار زينوا لهذا السعيد أن يشترى بيتا بقسط شهر 700 دولار بموجب قرض مضى عليه دون أن ينظر فى التفاصيل ال 700 دولار ما تغطيش ال100 ألف وإنما تموَّل عبء الدين يا دوبك الفوائد ما تمولش أصل ألدين وسابوه لما حصل هجوم على العقارات بهذا الشكل إرتفعت إسهما فى البورصه فأصبح البيت اللى أنا إستلفت عشان أشتريه ب100 ألف دولار بقى قيمته فى السوق 150 الف دولار فقال له ما تستلف كمان على 50 الف دولا بل هى وهم ما فيش الراجل لا باع البيت ولا فيه أصول حقيقية فى مقابله البيت اللى كان ب 100 ألف بقى ب150 ألف فتستلف 50 الف قال أعمل بهم إيه قالوا له لان عربيته لونها إسود ما تجيب عربية حمرا فإبتدى إيضا – تانى سوق إنهارت هى سوق السيارات – إستلف يشترى عربية وإستلف عشان يروح يعمل أجازه .
د/عبد المنعم سعيد:بس يا سيادة السفير دان كان أصل الأزمة الإقتصادية السنة اللى فاتت فى سبتمبر بدأت بالطريقة ديه إن العقارات .
السفير/ جمال البيومى : بس اللى عايز أوصله لحضرتك وللمشاهد إن هو مضى كمبيالات ب100 ألف ومضى كمبيالات ثانيه ب 50 ألف البنك يعمل إيه فى الكمبياله ديه بيروح يخصمها فى بنك أكبر منه ليؤمن نفسه وبالبنك الأكبر يؤوح يأمن على هذه السندات فى شركة تأمين وشركة التأمنين أصدرت بها سندات باعتها فى البورصه ثانى والعملية تكررت بحيث البيت الو 100 ألف أستلف عليه 30 مره أد ثمنه لما جاءت لحظة مواجهة الحقيقة إن الأخ سعيد إتفسد أو ما عدش قادر يسدد أوهو ما يسددش أصل رأس المال وعمال يتضخم الفوائد عليه كان لازم كل المراكز المالية ديه تتسوى فهتدفع إزَّاى 30 مره ضعف البيت إستلف على بيت 31 مره أد ثمنه .
د/عبد المنعم سعيد: فالهرم كله وقع ؟
السفير/ جمال البيومى : كارثة من الضخامه بحيث فعلا ساعة ما دفعوا 3 آلاف مليار دولار ما حدش كان عارف حجم الكارثه الحقيقية وربما لا يعلمها الناس الى الان لان ما فيش طريقة لحسابها إنما لو قلت إن فعلا زى ما حضرتك تفضلت إن الأزمة توقفت عن الانهيارمش هننزل أكثر من كده دا فى حد ذاته إنجازلانه هيبعث الثقة ونعود كممولين نخش السوق ثانى .
د/عبد المنعم سعيد: دلوقت إنت بتتكلم حضرتك عن حوالى 3 ترليون دولار تجمعت لهم دول العالم ودفعوهم وبالتالى بدأوا يعادلوا مسألة الديون الى حدٍ كبير فيه دول لم يكن لديها هذه المشكله وعلى العكس كان عندها إحتياطيات كبيرة زى الصين وغيره إستمرت فى النمو وبحثت عن أسواق سواء داخل الصين أو خارجها المهم إبتدى الإقتصاد الدولى يدخل فى دور الإستقرار .
السفير/ جمال البيومى : التوقف عن الانهيار .
د/عبد المنعم سعيد: التوقف عن الانهيار إيه بقى اللى خللى فجأة اليونان وأوربا يعنى هل فيه علاقه هنا ؟
السفير/ جمال البيومى : آه طبعا .
د/عبد المنعم سعيد: اليونان ليه ما سرَّختش من سنة ونصف ؟
السفير/ جمال البيومى : دا بالعكس دا بالتدارى على الوكسة هى هههه بتدارى على العملة اللى عملاها هذه الحكومة مش الحكومة الحالية فبالتالى بالعكس هو فضل زوَّر فى مركزه بمساعدة مؤسسات مالية محترمة هتكون محل مقاضاه ومساءلة الان ولما إنكشف المستور إنكشف - إنكشف المستور ثم حدث على فكره جهود أمريكية كبرى يطالبوا الدول التى لديها إحتياطيات كبيرة زى الصين والسعوية .. السعوية عندها ثانى أكبر إحتياطى بعد الصين بيقولوا لها من فضلك حافظى على الإحتياطى بالدولار وإحنا كمحافظين على الدولارات مش من مصلحتها إنه يجرى له حاجه كناس بتدخل باليورو مش مصلحتنا إن يحصل لنا .. كل أزمة لابد هتتأثرأنا عايز أقول لك خبرغير سعيد هنا الولايات المتحدة لما نشأ صندوق النقد الدولى وقبلنا كلنا إن الدولار والإسترلينى وغيرها يعتبرعملة وفاء دولية تعهدت الولايات المتحدة أن تصدر دولارات بموجب إن 35 دولار لكل وقية ذهب فى البنك الإحتياطى الفيدرالى لما خرجت عن هذا النظام سنة 71 الدولار النهارده مقابل الذهب لان وقية الذهب بقى ب 1107 مش ب 35 يعنى كل من حاز مننا الدولار سنة70 بقى فى جيبه 3 سنت دلوقت من المبلغ دى حاجة كسبها من ورائنا الإقتصاد الأمريكى أكثر من هذا خلينا نتكلم قريب شوية عشان الجيل الحالى يبقى عارف من ساعة الأزمة ما حصلت الدولار تراجع 45% أمام العملات الأخرى كل من كان متدخر دولار سنة 2004 والا 2007 معاه 45 سنت دلوقت فديه أكبرعملية مكسوف أقول سرقة فى التاريخ يعنى لان فيه شعوب زينا زى الصين زى الخليج كل ديه شعوب إدخرت من العملة الدولاريه الكويت نوعت عملتها على فكره ونوعت الرصيد بتاعها لسلة عملات مصرعاملة من زمان قنات السويس تحصل بحقوق السحب الخاص اللى هى سلة عملات إنما أنا ذنبى إيه فى اللى حصل للدولار .
د/عبد المنعم سعيد: بس هى سلة العملات ما هى فيها نفس العملات اللى بينطبق عليها نفس الأمر يعنى سلة العملات مكونة من دولاروين ويورو وإسترلينى
السفير/ جمال البيومى : العلاقه البينية متوزعة
د/عبد المنعم سعيد: يعنى هذه الدول وهذه العملات وبينهم وبين بعض نقط توازن يعنى فى الحقيقة كلها بتتحرك فى مدى معين لان التجارة بين هذه الدول هى أكسب تجاره موجودة على مستوى العالم وإستثمارات بين هذه الدول هى أكبر إستثمارات .
السفير/ جمال البيومى : برضه المسألة غير عادلة فى هذا الموضوع أن الولايات المتحدة تحتل أقل من ثلث الإقتصاد العالمى ومع ذلك الدولار بيستخدم فى 82 % من التسويات الدولية يعنى أمريكا بتقدر تطبع دولار أكثرمن إحتياجها وإحنا بنشتريه بلا مقابل هى تكسب كل ما نشترية من دولارات بلا مقابل نتيجة إن إحنا وثقنا بهذا التعهد الأمريكى أن تحافظ على تثق هو دا الحقيقه اللى أنا إستأذنت عشان أقوله عند أساس الترس لان حصل خلل – طيب دا مقبول لان زى ما حضرتك تفضلت العلاقة البينية بين العملات يعنى محافظ عليها بشكل إن مسألة التغيير فى المراكز أومسألة إختراع بلونه إسمها الرهن العقارى والا السوق العقارى .
د/عبد المنعم سعيد: طيب هوأنا متأثر فى إيه يعنى الرهن العقارى دا حصل فى الولايات المتحدة وأيضا الولايات المتحدة دفعت ثمناً غاليا يعنى إنهيارفى قيمة العملة بتاعتها إرتفاع فى معدل البطالة .
السفير/ جمال البيومى : لأ وبعدين الولايات المتحدة اكبردولة مدينة فى العالم الان دا من أيام الرئيس ريجان زاد طبعا دا وأكبر دولة عندها عجزفى الميزان التجارى فى العالم .
د/عبد المنعم سعيد : وبالتالى لان نتيجة إن الصين وبقية الدول بتصدرلها صادرات يعنى هنا الدول اللى هى عندها الإحتياطى بقى عندها قدرة بتستفيد من السوق الأمريكى فيه تنمية لصناعاتها الخاصه .. يعنى بدون السوق الأمريكى لم يكن ممكننا للصين أن تنموا بما نمت به .
السفير/ جمال البيومى : طبعا طبعا إنما أنا تأثرت كعالم ثالث عن طريقين واحد الضربه اللى قيمة مدخراتها قلة بيها إنما لو حدث كثافة السوق التجارى العالمى أنا بتأثر أيضا يعنى صادرات الصين تتأثر صادراتنا للإتحاد الأوربى لغاية 2008 كانت عاملة أربع مرات من يوم توقيع إتفاقية المشاركة إحنا كنا بنصدر فى حدود 3 مليار وصلنا الى 12 .. 2009 تراجعت شوية نتيجة هذه الأزمة رغم إن إحنا واقفين كويس بس دا يرجع لكسل حدث فى الإقتصاد الأوربى فأصبح وارداته منَّا بتقل وواردتنا منهم قلة كمان نتيجة هذا التراجع اللى موقفنا على رجلينا كويس إن الخدمات فى مصر ما تراجعتش يعنى قناة السويس الحمد لله صحيح معدل الزيارة فى الإيراد قل لكن الإيراد مازال عند معدلاته السياحة بتزيد مش بنفس المعدل إنما بتزيد وإحنا دولة خدمات على فكرة إحنا مش تجاره سلعية بس الأكثر تجارة خدمات فدا اللى موقفنا على رجلينا فهنا بقى لابد ندورعلى حلول فى الإطارالوطنى والإقليمى الإطارالعالمى مازال قدامه شوية وقت .
د/عبد المنعم سعيد: هوفى الحقيقة كنت عايز أوصل لتأثيرات علينا فى الجزء الثالث من هذه الحلقة بس كنت عايزأستكمل بما إن إنت فتحت موضوع العالم الثالث أحنا أخذناها فى الجانب الخساره كان إيه الإختيارالثانى العالم الثالث ربط نفسه بالعالم المتقدم فلما إزدهرت الأحوال بقى فيه سوق واسع لمنتجاته لكن ما هو كان البديل إنه يدى لعالم ثالث آخراللى هو ياإما لا يحتاج الى هذه المنتجات أو ما عندوش الكاش اللى يخليه يدفع .
السفير/ جمال البيومى : جنوب .. جنوب .
د/عبد المنعم سعيد: أو إذا كان عنده الكاش فهوعنده دولاربرضه .
السفير/ جمال البيومى : مشكلة العالم الثالث وديه كنا بنناقشها فى عمان الإسبوع الماضى فى إطار الجامعة العربية إن أنا وإنت بتشكو وأنا بأشكو من التجاره العربية البينية مش بالقدر نأمله دا صحيح إنما مش لاننا ما بنحبش التجاره العربية وإنما لان العرب لا ينتجون ما يستهلكون 70% من وارداتهم لا تنتج فى العالم العر بى – فى الحقيقه كنت حاضر مؤتمر قمة الكويت الإقتصادى وأنا سعيد جدا لان إبتدى يحصل نوع من الانتباه الشديد فى العالم العربى إن مشكلتنا مشكلة تنمية وليست مشكلة تجاره فقط إن أبتدى أنتج ما أستورده بشكل كبير وبالذات فى 3 مجالات بسرعة أنا ما بأنتجش فى صناعة الآلات إزَّاى مصر وسوريا والمغرب ما يعملوش صناعة آلات النسيج .. وسائل النقل الى الان مفيش ترسانة بحرية عربية زى كوريا اللى بتنتج 200 ألف طن مركب أنا عندى إسكندريه بتعمل مش عارف 12 ألف طن حان الوقت نفكر فى ترسانة بحرية ونفكرفى صناعة شاحنات وسيارات وقاطرات والبند الثالث ولا عذر لنا فيه هو بند الغذاء ثالث أكبر بند مستورد فى العالم العربى هو بند الغذاء دا كدا بيفسر لك ليه فيه حرب أهلية فى السودان ليه فيه حرب العراق بيحصل له والصومال ليحصل له كل ديه دول ممكن لوإستتب السلام فيها أن ننتج غذائنا بلا أى مشكلة .
د/عبد المنعم سعيد: هل يا سيادة السفيربما إنك إنت دخلت تقريبا فى شبه توصيف للعلاج هل من الحكمة إن انا أخش الان فى صناعة زى صناعة الآلات أو صناعة السفن أولا هل العالم فى عجزأو فى طلب على إضافة منتج جديد ثانى حاجة هل الانتاج انهارده لآلاتى اللى هى الجديدة هل سوف تجد طلب عليها موجود أم إننا أبحث عن مجالات جديدة لم يدخلها أحد أو دخلها الآخرين ولا يزالوا فى بداية الطريق لكى أحاول المشاركة فيه ؟
السفير/ جمال البيومى : الإثنين صح ولازم أمشى فى الإثنين إنما إن أنا أنتج شيئ وبدورعلى الطلب أنا عندى طلب دا أنا أكبرمنتج بترول فى العالم ليه ما يبقاش عندى أنا ناقلات بترول أنا اللى عاملها فى ترسانه عربية أنا النهارده القمة العربية فى الكويت قررت إن تعمل البنية الأساسية لان انهاردة العلاج ومصر عملت العلاج دا على فكرة إنها تنفق 15 مليار جنيه ووراها 8 ووراها 11 على البنية الأساسية لان ميزة البنية الأساسية أولا طبعا بتعمل نمو إقتصادى إنما بتنزل للطبقات الأقل دخلا هيبقى فيه عمالة بتشتغل انهارده حضرتك وإنت رايح طريق القاهرة الإسكندريه هتلاقى عماله شغَّاله .
د/عبد المنعم سعيد: بتعمل تحفيز ؟
السفير/ جمال البيومى : بتعمل تحفيز وبتنزل إيرادات للطبقات الفقيره وبتخلق وظائف فى الأزمة اللى إحنا فيها إنما مسألة الطلب أنا عايز أديك مثال يمكن حصل من قبل الأزمة إن كوريا بتفكر تنتقل لصناعات أكثر دقه فبتعرض علينا ما تيجى تعملوا إنتوا صناعة الكونتينرز الحاويات وجم عرضوا علينا طيب إحنا هننتج صناعة حاويات والطلب عليها إيه ؟ قالوا إحنا بننتج ثلاث تربع الحاويات فى العالم ومستعدين ننقل لكم نصف هذا الانتاج لان أصبح مقل بالنسبة لنا العمالة فى كوريا أغلى وياسيدى إنتجوا وأنا هآخذ منك كل الانتاج لان هو عايز - زى النهارده لما تيجى شركات عالمية بص حضرتك فى الأدوات الإليكترونية اللى فى إيدينا هتلاقى مالاكات عالمية أمريكية أوربية صنعت فى الصين ليه هو بيعمل كده لان تكلفة صناعتها فى الصين بعماله أرخص هيبقى أرخص والكفاءة لا تقل ففى حركة لنقل الصناعة حركة تنقلات الصناعة من مكان أكثر تكلفةً الى مكان أقل تكلفه هى ديه فكرة المشاركة .
د/عبد المنعم سعيد: سيادة السفير ديه نقطه مهمة جدا يعنى هل فيه نتائج جيده لهذه الأزمة قد يكون ما تذكره هى أحد النتائج الجيده دعنا نلتقى بعد فاصل قصير .. نلتقى بعد الفاصل .
فاصل " تقرير"
لاتوجد إجابة شافية بشأن إحتمالات تأثرمصر الأزمة المالية فى اليونان بل إن الآراء تتضارب بهذا الخصوص فهناك من يرى أن الأزمة لن تؤثرعلى مصرأوعلى علاقاتها بالإتحاد الأوربى فاليونان فى النهاية هى مجرد دولة من 27 دولة فى الإتحاد الأوربى كما أن أزمة اليونان لن تطول على الأرجح بقية الدول الأوربية وحتى فى حال إذا تأثرت الدول الأوربية الأخرى بالأزمة فإن ذلك لن يكون بالشكل الذى يمثل تأثيرا سلبيا على المسارح المصرية مع الإتحاد الأوربى وفى هذا الإطار أكد الدكتور يوسف بطرس غالى وزير المالية أن مصر بعيدةٌ تماما تداعيات الأزمة اليونانية ولن يحدث للإقتصاد المصرى ما حدث لنظيره اليونانى وفى مقابل ذلك هناك من يرى أن الأزمة اليونانية ستؤثر حتما على الإقتصاد المصرى بل إن تأثيرها قد بدأ بالفعل فى بعض القطاعات التى يأتى على رأسها البورصة والسياحة والقطاع التصديرى حيث إنخفضت الصادرات بنسبةٍ تتراوح بين 15 و20 % وأعلن وزير الصناعة والتجارة رشيد محمد رشيد أن الحكومة تعتزم مواجهة تأثير إنخفاض سعر صرف اليورو بالسلب على قيمة الصادرات مؤكدا أن مشكلة تراجع اليورو أثرت على مبيعات جميع دول العالم مع الإتحاد الأوربى .
فاصل
د/عبد المنعم سعيد: الأزمة المالية فى أوربا وضيفنا سعادة السفير جمال البيومى سعادة السفير كنا نتحدث قبل الفاصل حول أن الأزمة قد تقود الى أمور إيجابية وقلت منه إنه الدول بدأت تقول طيب ما تيجى ننتج إحنا حاجات معينة بدلا ما نقعد قاعدين فى إعتماد حتى على الأقل على تبادلات مالية دولية قد تكون خاسره .
السفير/ جمال البيومى : أنا والله حتى بحذر حتى فى السياسه فى الإقتصاد فى حقوق الانسان لازم يبقى لك أجندتك الوطنية أنا أخشى .. أنا لسه قريب قايل الكلام ده فى مقاله يعنى الإستقواء بالآخر دا خطر لان هو له أولويات غيرأولوياتك مهما كان حسن النية مهما كانت الدول ديه ملائكة إعمل أجندتك للتنمية الوطنية بس نعمل وفاق وطنى حول ما نريد أن نفعله ووفاق إقليمى أيضا والخبر الجيد فى وسط الأزمة إن يقول لصندوق النقد الدولى أن مصر واجهة الأزمة بأفضل مما كان متوقعا لان كانت واقفة على رجلها بأقول من ناحية البنوك (2) أن مصر وعدة دول فى المنطقة سارت بما يسمى ( سيف هيفن) ملازن آمن لان بعد النصب اللى حصل فى أسواق أخرى إحنا لا راهنا ولا قامرنا فى السوق العقارى بالعكس فيه خبرين جيدين هنا أعلنوا من سنة لما جاء هنا نائب مدير مايكو سوفت إن مصر بتنموا فيها السوق العقارى فوق ال20% رغم الأزمة العقارية فى أوربا وأمريكا مازال فيه طلب عليها وإنت حضرتك عارف طبعا إن إحنا محتاجين فعلا لمزيد من الإسكان .
د/عبد المنعم سعيد: لأ والإقتراض من البنوك تم فى حدود آمنه .
السفير/ جمال البيومى : والإقتراض كله .
د/عبد المنعم سعيد : إنما أنا عايز ... طيب أتفضل .
السفير/ جمال البيومى : معلهش الرقم الثانى إن تكنولوجيا المعلومات بتزدهر بحوالى 20% أيضا ودا خبر جيد يبقى إذا فيه صناعتين اساسيتين التكنولوجيا والبناء بيتطوروا زائد إن أنا ملاز آمن للإستثمار .
د/عبد المنعم سعيد: أنا ديه بقى عايز أسأل فيها شوية لان الإستثمار اللى جالى ما جاليش كتير يعنى كان فيه متصور وإنت عندك إصلاح فى البنوك وعندك إصلا ح فى التأمين كمان أيضا فى قطاع التأمين حصل إصلاح جيد دا كان يخليك يعنى من ناحية إستقبال رأس المال خلال فترة الأزمة أعلى مما حصل يعنى ؟
السفير/ جمال البيومى : لأ ما هو مفيش رأس مال الحقيقة سايب كده قوى كل واحد معاه رأس مال هتحس إنه قافل محفظته شوية لما تتطضح الصورة لكن الخبر الجيد .
د/عبد المنعم سعيد: يعنى لما يروح البرازيل 22 لما يروح تركيا 16 لما يروح يعنى راحت .. أمريكا راحه أثناء الأزمة 135 مليار دولار إستثمارات أجنبية .
السفير/ جمال البيومى : السؤال هل تراجع الإستثمار فى مصر؟
د/عبد المنعم سعيد: لأ بيزيد برضه .
السفير/ جمال البيومى : لأ بيزيد آه إنما برضه دا متوقف على جهدى أنا .. أنا لازم أنشط أكثر من كده مطلوب إن إحنا نكون .. يعنى هل نحن نتقدم ؟ طبعا نحن نتقدم – هل نتقدم بالقدر الكافى أو بالقدراللى نستحقه بإمكانياتنا ؟ لأ أنا بقول إن إحنا أفضل مما نصور ويصوره إعلامنا انا دائما بكرر الجملة ديه أحنا أفضل بكثير مما يصوره الإعلام المصرى لكننا أسوأ بكثير مما نستطيع أن نحقق أنا عاوز أشحذ الهمم إن نقوم نشتغل شوية وبسرعة لان الجديد مش التقدم الجديد هو سرعة التقدم إنت قعدت أجيال كامله من طيارة الون – الراكب الواحد الى كنا بنقول مصر للطيران البولمان الطائر 50 راكب وفى ال30 سنة عملت ال 850 راكب المركب البابيروز البوردى اللى عملها الفراعنه لغاية 56 أكبرمركب إتحشرت فى قناة السويس 50 ألف طن فى 30 سنة عملنا المليون طن إذن ما يكفيش إن إحنا نتقدم لازم يكون بسرعة ما حناش المتسابق الوحيد .
د/عبد المنعم سعيد: سعادة السفيرعلشان الحلقة ديه مخصصة للأزمة المالية فى اوربا هل ديه حلقة من الأزمة الإقتصادية العالمية ومعنى ذلك أننا لازلنا فى الأزمة وسوف ندخل فى حلقة داخلها جديده اما أننا أمام جمله إعتراضية وهيتدخل الإتحاد الإوربى والبنك المركزى الأوربى 750 مليار يورو ظتقريبا تريليون دولار وبالتالى يحصل نوع من تحفيز الإقتصاد اليونانى والبرتغالى .
السفير/ جمال البيومى : حضرتك عارف إن أنا متفائل ومتهم إن أنا متفائل لكن فى ديه لازم أكون أمين لأ .
د/عبد المنعم سعيد: الامانة مش متناقضة مع التفاؤل هههه .
السفير/ جمال البيومى : آه بالظبط إنما يجب أن نفتح أعيوننا جيدا لان إحنا من شهرين بس فى المركز المصرى الدراسه الإقتصاديه جاء لنا 2 خبراء البنك الدولى .. آخر دراسة إتقدمت لنا كيف نحمى إقتصادات الدول النامية من أزمات متتاليه هتيجى .
د/عبد المنعم سعيد: فكان متوقع ؟
السفير/ جمال البيومى : يعنى المتوقع الان إن ممكن أى دولة أخرى يحصل لها أزمة كبرت أو صغرت .
د/عبد المنعم سعيد: أنا قرات إن فيه حاجة حتى الصين ممكن تتوقع لان
السفير/ جمال البيومى : أيوه ليس أحد بمعزل .
د/عبد المنعم سعيد: قالوا إن ال60% من النمو فى الإقتصاد الصينى راجع للعقارات وأول ما تسمع عقارات بتخاف .
السفير/ جمال البيومى : أيضا ما تنساش إن الصين فى الأزمة متهمة إنها بتستخدم سعر الصرف ودا أنا أتمنى المصريين يسمعوا اللى بنقوله دا لان كلنا بنقول عايزين جنيه قوى لا.. لأ الصين متهمه إنها بتخفض قيمة عملتها 30% عن ما ينبغى أن تكون عشان تكسب الأسواق الأوربية والأمريكية فإذن أنا ما يهمنيش الجنيه يبقى غالى أو رخيص أنا يهمنى الجنيه يكون يمثل حقيقة تعاملات السوق .
د/عبد المنعم سعيد: سيادة السفير إنت بتقول إن إحنا لسه فى توابع الأزمة وأن الخروج من الأزمة لم يحدث بعد وإنه الان ربما حاصل فى أوربا بكره جاير يحصل فى أمريكا الجنوبية .
السفير/ جمال البيومى : وما نفاجأش بأن تحصل حواديت كده فى آسيا فى إفريقيا فى دول أضعف .
د/عبد المنعم سعيد : كيف يكون الإحتياط ؟
السفير/ جمال البيومى : يكون الإحتياط بمزيد من تفعيل دول الحكومات إقتصاد حرعلى عينى وراسى .
د/عبد المنعم سعيد: ما هوالناس بتفهم حكومات ضد كلمة إقتصاد حروفق لنا بين الإثنين .
السفير/ جمال البيومى : لأ ما هوفيه مفهوم خاطئ إن الإقتصاد الحر تتراجع فيه الدور الدولة الإقتصاد الحر الدولة يتراجع دورها فى إنتاج البيجامات أنا أيام عمر افندى قلت ما فيش دولة فى العالم لسه بتنتج بجامات إلا إحنا دور الدولة فى الرقابة – دور البنك المركزى أنا معجب جدا بالبنك المركزى فى إدارته الحالية – البنك المركزى المصرى قايم بدور كويس قوى ولو أعقب على قرار يتخذه إنه يتخذ قرار حرفى محترف كبنك مركزى ولازم نشجعه لان جزء من النجاح إنه هو يأخذ قرار وأنا أشجعه كمواطن طالما إنه فى الخط اللى هو بيقول إنه سليم.
د/عبد المنعم سعيد: سيادة السفير للأسف وقتنا أزف ونشكرك شكرا جزيلا لوجودك معانا فى البرنامج .
السفير/ جمال البيومى : شكرا أنا إستمتعت بالحديث فى البرنامج شكرا جزيلا .
د/عبد المنعم سعيد: والى هنا تنتهى هذه الحلقة من برنامج وراء الأحداث ونلتقى فى حلقة مقبله بإذن الله.