الناس والأحزاب

نهى توفيق: مشاهدينا الكرام اهلا بكم وحلقة جديدة من الناس والاحزاب مازلنا نبحث مع حضراتكم الدور الاجتماعي للاحزاب المصرية لدعم البرنامج الرئاسي بما هو معروف ببرنامج النهضة من خلال المشاركة الفاعلة في الدفع بالمواطنين وتبني بنود هذا البرنامج وتحديد سلوك يومي وشخصي وصولا الى مستقبل افضل لهذا البلد مشاهدينا معنا اليوم الدكتور حفظي زايد رئيس حزب السلام الاجتماعي لتوضيح دور الاحزاب في هذا الشان اهلا بحضرتك بداية مشاهدينا الكرام نشوف راي الناس في دور الاحزاب في الشارع المصري في هذا التقرير ونعود اليكم بعد قليل
فاصل
مواطن1: لها دور بس يكون الدور بتاعها منطقي فيه احزاب عايزة تكوش على كل حاجة احنا عايزين كل الاحزاب تكون في صالح الشعب وفي صالح المجتمع تحاسب رئيس الجمهورية على اخطائه ما يكونش فيه تناقض ما يكونش فيه خداع ما يكونش فيه غش ما يكونش فيه نفاق
مواطن2: اهم حاجة يظبطوا الشباب ويشغلوا الشباب لكن الي احنا شايفينه دا مفيش الشباب كلها تعبانة
مواطن3: انا بصراحة ما بتعتقدش في الاحزاب اللي هي مش مؤثرة قوي يعني فيه احزاب طالعة للشهرة وفيه احزاب مؤثرة
مواطن4: كل حزب ليه راي واكيد راي صالح
مواطن5: الفترة دي المفروض كلها تتوحد في خدمة البلد بدون مصالح شخصية لحد
مواطن6: يكون الحزب بيخدم البلد وبخليها راسية ونفتخر بيها لان حضاراتنا 7 الاف سنة
مواطن7: هو فيه عدم خبرة سياسية في مصر كلها مش في الاحزاب بس فيه 5 او 6 احزاب هما اللي هيمشوا البلد بعد كده
مواطن8: الاحزاب دي كلها نشات بعد الثورة ومحدش بيسمع عنها وما بنشوفش ليها اي دور لا سياسي ولا اجتماعي محدش شايف منها اي حاجة المفروض الاحزاب دي بيبقى ليها دور فعال بتنزل الشوارع بتنزل تشوف ايه المشاكل سياسيا واجتماعيا بيعاونوا حتى رئيس الجمهورية في مشاكل البلد لكن احنا ما بنشوفش حاجة منهم نهائيا
فاصل
نهى توفيق: نعود مشاهدينا الكرام بعد هذا التقرير في راي الشارع المصري حول دور الاحزاب دكتور حفظي احمد زايد رئيس حزب السلام حضرتك سمعت كل التعليقات التي ذكرت فيما يتعلق بدور الاحزاب المصرية هناك من رغب ان تكون الاحزاب في خدمة الشعب المصري وما تبذله يكون في صالحها وهناك راي عايزين الاحزاب تشغل الشباب وراي اخر بيقول المطلوب من الاحزاب انها يكون ليها دور قوي ونستشعر وجودها في الشارع المصري يعني كلها مطالبات الشارع المصري بيتمنى من الاحزاب تواجد قوي سيادتك كرئيس حزب السلام الاجتماعي شايف دور الاحزاب ازاي
د.حفظي زايد: الاحزاب المفروض تدعم الرئيس مش هنقول 100 يوم لان 100 يوم دي مدة غير كافية وفيه برنامج وفيه حزب معندوش استعداد انه يشارك في حملة للنضافة وحملة للمرور دي هنعتبرها حملات يمكن هتاخد شوية وقت لكن في نفس الوقنت كل واحد فينا بيتمنى ان تتحول البلد دي لبلد نظيفة مشكلتنا ان الاحزاب اللي موجودة حاليا او اغلبها في ماعدا جماعة الاخوان منظمة اما الباقي بيدور على مكان مش لاقيه حتى .. يعني الاحزاب اللي موجودة النهاردة في الوضع الحالي بتحاول تتجمع وتاتلف وتندمج اذا كنا عايزين نقوي دور الاحزاب دي في الشارع وبنطالب الاحزاب دي متواجدة في الشارع فيه دور على الدولة ودور على الاحزاب .. دور الدولة انها تدعم الاحزاب دي ودور الديموقراطية يبقى لازم ندعمها ماديا وفنيا وندعمها بكل الوسائل لكن ان احنا نسيب الاحزاب ونقول الاحزاب دي كارتونية وضعيفة ومالهاش تاثير في الشارع بالقطع هي مالهاش تاثير في الشارع لان معندهاش موارد مالية وبالتالي ماهياش قادرة تؤثر في الشارع اذا كان زي حزب الحرية والعدالة
نهى توفيق:حزب الاغلبية
د.حفظي زايد: حزب الاغلبية لكن الدولة مش زي كل دول العالم بتهتم بالاحزاب اي حزب النهاردة لو الدولة خصصت جزء هامشي في الميزانية 200 او 300 مليون جنيه مصري عشان تدعم الاحزاب وكل حزب ياخد له 3 مليون عشان يعمل دعايته ويكون كوادره وياخد مقرات لكن مش ممكن الحزاب هتعيش حياتها وانا النهاردة هعمل مؤتمر الم من اعضاء الحزب كل واحد 100 جنيه ولا 50 جنيه ولا معاه واللي مامعهوش
نهى توفيق:طيب هو ايه دور الاحزاب في الشارع المصري ازاي يقدر يخدم المواطن المصري بشكل مباشر يعني ناس في التقرير بيقولوا انا مش حاسس ان احناعندنا احزاب مش حاسس ان الاحزاب بتعملي حاجة احنا عايزين الاحزاب تشغل الشباب هو فعلا الاحزاب من المفترض انها تشغل الناس ايه الدور المنوط بيه الاحزاب عشان يبقى المفهوم واضح
د.حفظي زايد: المفروض الاحزاب انها تشارك في الحياة السياسية والفكر دا يترجم لواقع عملي النهاردة اللي بيحصل مش كده خالص عشان يكون فيه ديموقراطية
نهى توفيق:فيه تعدد افكار فيه تعدد افعال
د.حفظي زايد: لو احنا النهاردة خدنا الرئيس مرسي رجل منضبط رجل تاريخه يشهد له رجل الحقيقة محدش يقدر يختلف انه انسان وطني ومخلص ولكن هل انا النهاردة لما اعمل اجتماع لاحزاب ادعي فيه 10 احزاب واسيب 40 حزب ما ينفعش اذن انا فيه انتقاء لشخصيات واحزاب معينة لو انا عايز افعل دور الاحزاب يبقى لازم اعمل ورشة عمل زي ما اتفقنا مع الرئيس انه كل شهر بنجتمع مع الرئيس بنطرح المشاكل اللي في البلد ونتشاور فيها والفكر يبقى فكر جماعي لكن اللي بيحصل دلوقت في الاجتماع الاولاني اللي حضرناه مع الرئيس بعد انتخابه مابقاش فيه اجتماعات بقى فيه 3 او 4 او 5 هما اللي بيحضروا والباقي ما بيحضرش.. الله..!! يعني هوا على راسه ريشة ودا معرفش ايه..!! لازم يكون فيه تفعيل للاجتماعات دي واطرح القواعد واسمع الرددود مش ممكن لكن راي المجموع .. دور الاحزاب انها تشارك برايها في اصلاح البلد ونطرح قضية معينة ازاي نصلح التعليم ازاي نصلح الاقتصاد .. هو انا مشكلتي النهاردة انه يطلع على الفضائيات س او ع يقولوا احنا هيجيلنا .. انا عايزاقتصاد بلد عايز بلد ينمو اقتصاديا مش عايز النهاردة يجيبوا ذعر انه الجنيه هيحصل له هبوط نفسي النهاردة ان انا اسمع اه فيه مشروع قومي نتبناه كلنا مين اللي هيحط المشروعات دي على قامة التنفيذ رئيس وحكومة واحزاب
نهى توفيق:لكن افهم من كلام حضرتك ان المعوق او المكبل لحضراتكم في التنفيذ في اي مشروع او في اي حملة ايا كانت هي المادة هي عدم توفر الامكانات المادية اللي بتستطيع من خلالها ان تنزل الى الشارع المصري
د.حفظي زايد: المادة جزء رئيسي جدا لعمل احزاب مش ممكن ان الكلام بيتقال ان الاحزاب كرتونية لان الدولة هي اللي هتتعمل كده الاخوان المسلمين النهاردة في الحكم يا اما يقووا الحياة الديموقراطية يا نرجع تاني على الحزب الوطني
نهى توفيق:اه .. على الدولة ان تدعم الاحزاب
د.حفظي زايد: طبعا .. انا النهاردة اديكي مثال النهاردة لما يطلع رئيس حزب الحرية والعدالة وقال احنا هننزل على كل المقاعد في الانتخابات اللي حاية طب انت النهاردة رئيس جمهورية من الاخوان وحكومة مشكلة من الاخوان اذن النهاردة انتوا في الشارع اقوى اذن لما تخش النهاردة لو خدت 30% او 40% على الانتخابات الالي فاتت .. لا .. دا انت النهاردة هتاخد 50 او 60% بالاسلوب اللي انت عايزه دا هل دا هيصلح الحياة الاقتصادية استحالة
نهى توفيق:كلامك دكتور حفظ بيرجعنا مرة تانية الى الازمات اللي بنمر بيها كهربا بنزين وخلافه من ازمات انا افهم ان الاحزاب مالهاش دور حاليا ..
د.حفظي زايد: الاحزاب مالهاش دور ودورها مهم ولا يؤخذ رايها بالظبط كأن فيه شئ انا مش مرتاح له وهو انه لابد ان نشارك في حل الازمات ولابد ان يكون فيه اجتماعات دورية ادعمها ماديا النهاردة داخلين على انتخابات محليات فيه 50 الف بني ادم موجود في المحليات دول .. ال50 الف حزب الحرية والعدالة والاخوان المسلمين هيخشوا ياخدوا 40 الف من ال50 الف ويسيبوا 10 الاف ما ينفعش .. يا اما كل حزب هما يقعدوا يقولوا وهما المسئولين على المحك النهاردة هما عايزين ياخدوا ال50 الف يتفضلوا ياخدوا ال50 الف لكن لو هما عايزين فعلا تجربة ديموقراطية وتفعيل للاحزاب .. بعد 4 سنين الرئيس مرسي النهاردة راجل هيقعد 4 سنين في الحكم انا منتظر منه انه في نهاية الاربع سنين يكون اهم شئ يعمله ان الحياة الحزبية والديموقراطية تم تقويتها .. هيتم تقويتها اذا كان هو حريص بالفعل واذا كان مؤمن بالفعل بانه يقوي الحياة الديموقراطية دي يبقى هيقف ويساند الاحزاب واذا مساندة الاحزاب دي هي قوى دافعة انا النهاردة اسمع انه فيه قرض جاي من صندوق النقد البنك الدولي ومجموعة يقولك القرض دا قرض حسن وقرض فيه فايدة وقرض وهي دي القضية ..؟ مش ممكن القضية اللي احنا فيها هل احنا في احتياج لقرض واحتياج لمساعدة ولا احنا نقدر نوفر موارد من الداخل عشان البلد .. انا مش عارف .. هل اتاخد راينا .. ما اتاخدش راينا .. هل قعد الرئيس مرسي مع الاحزاب واتناقشت معاهم وخدت قرار ولا الاحزاب دي هامشية واذا كانوا عايزين الاحزاب دي هامشية ومالهاش دور خلاص هما يقودوا المسيرة والاحزاب تعارض انا دوري فقط ان انا اعارض الحكومة دي والرئيس وانا مش عايز كده انا عايز اكون مستشار حسن وليا راي
نهى توفيق:طيب كحزب السلام الاجتماعي اكيد لحضراتكم اراء في الازمات اللي بنتعرض ليها حضرتك هنا كرئيس حزب ايه الدور اللي بتعمله هل بترفع مذكرة للرئيس مرسي هل بيبقى فيه اجتماعات دورية عايزة اعرف كحزب
د.حفظي زايد: بتيجي موضوعات من الرياسة فيه موضوعات كذا كذا عايزين رايكم فيها ايه .. مشكلة القرض اللي موجود ما اتاخدش راينا فيه احنا بنتكلم في شئ غير واقعي احنا بنقول ديموقراطية احنا لا ننتمي للديموقراطية بالمرة .. الديموقراطية معناها الراي والراي الاخر هي المسالة مش ان انا اعارضك او تعارضني .. المسالة ان انا يبقى ليا راي في بلدي انا هكون سعيد بالمشاركة انا مصري
نهى توفيق:يعني حضرتك بتؤكد على تضافر الجهود واخذ المشورة والراي ودعم موقف الاحزاب ما بين الحكومة وما بين الاحزاب
د.حفظي زايد: محتاجة طبعا وهو دا الكلام المفروض والكل بيدور على حاجة النهاردى فيه انتخابات جاية كيف يسيطر عليها لمصلحة البلد وهم البلد والارتفاع بمستوى البلد مرحلة عاشرة وليست مرحلة تانية لو احنا بندور على البلد يبقى لازم تنقعد ونناقش ازاي نرفع من قيمة بلدنا الاقتصادية اذا مكناش هنقعد ونحاول نرفع من قيمة بلدنا وبلاش التوجهات والتدخلات انا بسمع كلام غريب اسنان ادولة يعني ايه اسلام الدولة مش فاهمها يعني ايه ..؟ الجميع موحد بالله ولكن فيه افراد شاة بتطلع احنا عاوزين نحارب الافكار الشاذة والفكر المنحرف ان كان في الاعلام فكر منحرف انا ضد التخوين في كل المجالات انا مصري وانت مصرية وانت بتحبي بلدك وانما بحبه مفيش واحد فينا بيحب بلده اكتر من التاني انا حريص على البلد دي زي ما انت حريص
نهى توفيق:مفيش حد يقدر يزايد على حد
د.حفظي زايد: دا اللي اقصده .. الزم النهاردة كلنا نشارك في بناء بلد تشارك اساسا بالفكر والفكر دا هييجي منين.. منين من الاجتماعات وانا معنديش امكانيات مادية تدعم الاحزاب ومعنديش اماكن في المحليات الدولة والحزب الحاكم النهاردة اللي بنقول انه على المحك النهاردة هيحاسب على هذا بعد سنوات ان هو اثرى الحياة الحزبية وبعد سنين هنقول الحزب دا وقف موقف شجاع واثرى الحياة الحزبية وطلع احزاب قوية وعندنا اغلب الاحزاب بتفكر في الاندماج احنا بقالنا سنىة ونص بنكون احزاب فجاة هنقول ان العشرين او ال30 حزب دول ضعاف
نهى توفيق:فكرة الائتلافات
د.حفظي زايد: مش ائتلافات دا فيه حزب هيلغى من على الخريطة ويروح لحزب تاني مشكل من 30 او 40 حزب لانه الاحزاب دي مش قادرة تقاوم معندهاش الامكانية المادية
نهى توفيق:ودا بيحصل فعلا حاليا فكرة الاندماجات
د.حفظي زايد: ليه..؟ لانه الحزب التاني معندوش فرصة والتاني معندوش فرصة مع اختلاف الايدلوجيات هل دي فكرة هتكون ظاهرة ..؟
نهى توفيق:طول الوقت المفروض يبقى فيه راي وراي اخر
د.حفظي زايد: انا كنت اتمنى من الحكومة او رئيس الدولة ان يحافظ على بقاء الاحزاب ازاي ويديها الفرصة في المحليات ويديها الدعم المادي وياخد رايها اذا عملنا كده مش هنسمع النهاردة حاجة اسمها احزاب كارتونية ومش احزاب كارتونية .. لا.. هنفاجئ بعد 4 سنين انه فيه 20 حزب قوي منهم 5 اقوى ولكن فيه 20 حزب بيعملوا او لهم دور وينزل حزب يروح للمحافظات ويعمل مشروعات في المحافظات لكن دا محتاج دعم مادي كبير
نهى توفيق:دكتور ماهو ممكن حد يقولك دلوقت الدولة خارجة من ثورة والاقتصاد ضعيف بشكل او باخر
د.حفظي زايد: زي ما بتحط ميزانية للتعليم تحط للاحزاب
نهى توفيق:ماهو فيه اولويات نخاول ننهض بالبلد الاول
د.حفظي زايد: الديوقراطية عشان نبني ديموقراطية للديموقراطية اسس اهم مافيها جزء مادي ما تجيش تقولي ما انت معندكش ناس ماهوانا معنديش دعم ما هو انا معنديش فلوس ومعنديش امكانيات ..
نهى توفيق:طب ما احنا نخلي الحكومة تاكل الناس وتشرب الناس وتشغل الناس عن انها تدي دلوقت الاحزاب مثلا دعم مادي
د.حفظي زايد: ابدا الدعم المادي مش عشان اعمل بيه عيش .. ابدا .. دا عشان اعمل مؤتمرات اعمل مناظرات اعمل منشورات اطلع اعمل نشر الفكر الديموقراطي اقول اهدافي انا عايز ايه انزل للناس الشارع النهاردة واقول انا عايز كذا انا عايزاقعد مع الناس واقولهم
نهى توفيق:طيب فكرة الامل اللي حضرتك قلتها دلوقت الناس حطت امال كثيرة جدا وامال كبيرة جدا فيما يتعلق بخطة المئة يوم كحزب السلام الاجتماعي ماذا ترى او ماذا تحقق من هذه الخطة على ارض الواقع ككشف حساب حضرتك كرئيس الحزب كجهة معارضة جهة المفروض انها متابعة ما يحدث ماذا تحقق وماذا لم يتحقق وهل هذا الامل قريب المنال ولا بعيد المنال
د.حفظي زايد: شوفي يا استاذة احنا ماشيين بالنظام العشوائي يوم يالا ياجماعة احنا هنعمل نضافة فيطلع رؤساء الاحياء والمحافظين كرسوا المجهود وهاتوا كل المعدات بتاعتكم علشان الكناسين ييجوا ونحقق ذلك.. مستحيل .. الخطة معناها خطة ومعناها برنامج معناها معدات معناها مصانع تدرو القمامة معناها عربيات معناها فكر معناها الادارة انما ياللا بينا نعمل مش هيحصل نفس الكلام في المخابز مستحيل هيحصل نطلع رغيف ب10 صاغ مش كده الفكر مش كده كل الدنيا البوتاجاز هو انا اسيب مبارك اعيش في نظام تاني اعيش برضه في ازمات هو البلد دي مش هترتاح بقى من الازمات اللي فيها الماساة اللي بنعيشها انه مفيش خطة لازم افكر اعمل فيه دراسات ..؟ فيه دراسات الموضوع كله هل فيه نية صادقة للتنفيذ هي دي ماساتنا لكن ان انا اطلع بروباجندا ويتقال ان انا هقف مع الرئيس .. هنقف مع الرئيس ازاي..؟ هل احنا قعدنا مع الرئيس وشرحنا خطة وشرح لنا الخطة .. لم نجلس مع الرئيس .. انا امنيتي اني الاقي البلد نضيفة والمرتب يرتفع من 1200 جنيه الى الفين جنيه في مصر
نهى توفيق:وقتنا انتهى يادكتور لكن هاسالك سؤال اخير اجابته بنعم او لا هل انت متفاءل بانتهاء ال100 يوم باصلاحات نعم اولا
د.حفظي زايد: انا اتمنى ان تنتهي ال100 يوم والاربع سنين باصلاحات ولو عملنا اصلاح في منظومة النضافة خلال الاربع سنين دا يبقى كويس ولو وصلنا ان الناس الدعم يوصلها هبقى سعيد
نهى توفيق:لا اسمحلي دكتور حفظي احنا مش عايزين ننسى ال100 يوم لانه احنا لو نسينا ال100 يوم هننسى الاربع سنين برضه لازم يكون فيه متابعة
د.حفظي زايد: هتابع ايه هل فيه خطة عشان اتابعها..؟ لو عندي خطة او برنامج موجود بيقولي النهاردة هنعمل ايه كان ماشي الحال
نهى توفيق:لكن اسمحلي برضه لازم يكون فيه امل على ال100 يوم لازم يكون عند الناس انه يكون فيه اصلاحات موجودة لانه طول الوقت الناس عايزة تستشعر هذا الامل
د.حفظي زايد: اذا مكانش عندنا خطط يبقى هندور على وقت طويل قوي لغاية ما ربنا يوصلنا لناس تحط الخطط
نهى توفيق:شكرا دكتور حفظي زايد رئيس حزب السلام الاجتماعي شكرا لحضرتك على هذا اللقاء ومشاهدينا الكرام اعتقد ان الامل اكيد موجود في تغيير حال البلد سواء في الاجور او تحسين رغيف العيش او تحسين احوال البلد في اي جزئية او في اي تفصيلة اعتقد انه العامل الاساسي هو رغبة الناس في التغيير ورغبة الناس في ان يعيشوا بكرامة وبانسانية على هذه الارض مشاهدينا الكرام بشكر حسن المتابعة لحضراتكم وان شاء الله الى لقاء قادم في برنامج الناس والاحزاب