مفيد فوزي : أسعد الله أيامكم بالخير والطمأنينة وجنبنا شرور الداخل قبل الخارج ، فاتت سنة بكل ما فيها من حلاوة أو مرارة، ويمضى دائما نهر الحياة بلا توقف، أحداث وحوادث وأسماء فرضت نفسها فرضا على عدسات " حديث المدينة" ، وعلى طريقة مذيعي نشرات الأخبار "هذا تذكير لأهم ما جاء في حصاد عام مضى" فاصل مفيد فوزي : جاء الشتاء مقتحما فهل استفدنا من دروس العام الماضي عندما دكت السيول بيوت الآمنين أم أننا نعيش الكوارث مرات فاصل من حلقة "سيول أسوان" 5/ 2/ 2010 مفيد فوزي : الجزء ده كان أيه مواطن من مضاري السيول: الجزء ده حوش مفيد فوزي : لكن ده كل حاجة الميه غطتها مواطن من مضاري السيول: المراتب كلها الميه غطتها يعني ده لو نايمين العيال كانوا فطسوا من الميه ، الميه غطت بتاع متر ونص مفيد فوزي : متر ونص مواطن من مضاري السيول: آه وأكتر كده وآدي العلامة على الحيط ، والأود ،الكنب، أنا فارش 4 كنب غرقوا بمساندهم بالتكايات اللي عليهم، مرتبتين عالسرير بسريره بمرتبته غرق مفيد فوزي : قوليلي التعويض اللي قال عنه الريس خدتوه مواطنة: حاليا لحد الآن لأن في بعض الناس بتدخل تزايد، في حصر للبيوت عشان التعويض يبقى على الواقع مفيد فوزي : خليني أعيد الجملة تاني "في بعض الناس بتدخل تزايد" قولي للناس يعني ايه مواطنة: في ناس بتدخل مهياش في البلد ولا لها مكان هنا تروح داخلة وكاتبة اسمها أنها متضررة من السيول فبيحصل لبس ، لكن انا صاحب المكان المتضرر مبيوصلش، لكن لأ طلع لجان على بتحصر على الطبيعة عشان ميبقاش في أي ملابسات مفيد فوزي : ايه مشاكلكوا مواطن : مشاكلنا ان احنا هنا من ساعة الحادثة اللي حصلت مفيد فوزي : حادثة السيل مواطن : آه هنا المحافظة وقفت معانا تمام لكن بعد زيارة الريس مشفناش أي مسئول غير حضرتك اللي جيت النهاردة مفيد فوزي : بعد الريس ما سافر مواطن : آه من بعد ما سافر محدش سأل فينا خالص والجماعة بتوع الشئون الاجتماعية اهتموا بالدور الأول بتاعهم أنهم عملوا زيارة عشوائية للبيوت مفيد فوزي : وبعدين مواطن : وبعدين قدموا لنا إعاشات عشوائية برده لكن بعد كده الناس اللي تستاهل مبيدوناش إعاشات مفيد فوزي : حين يذهب رئيس الدولة بنفسه ليرى على الطبيعة ما جرى وليس من تقرير مقدم له فالمشهد له مغزى عميق.. الالتفات الجاد للصعيد وهناك في الصعيد ذهبنا الى إسنا المنسية فهل لا زالت منسية من حلقة إسنا – الأقصر 1/ 6/ 2010 مفيد فوزي : أنا في إسنا اهو وعايز أعرف بالضبط ايه المشاكل اللي انت كمواطن إسناوي بتعاني منها افتح قلبك مواطن : المشاكل مشاكل ميزانية يا أستاذ مفيد بصراحة وبكل وضوح مشاكل ميزانية بحتة مفيد فوزي : يعني ايه مواطن : إن الدولة متناسية بعض المراكز وبعض القرى في ميزانيتها فبالتالي عضو مجلس الشعب والأعضاء المحليين لا يستطيعوا الإنفاق مفيد فوزي : مفيش حد مسئول جالكم شاف مواطن آخر: هي مجرد لما المحافظ ييجي أو أي شخصية تيجي يبدءوا النضافة بس ومجرد ما يمشي يرجع الوضع لما هو عليه، دي بقالها اكتر من 15 سنة واقفة على الحال ده طبيب من اسنا: لكن بصراحة في الفترة الأخيرة مهتمين بنا جدا مفيد فوزي : انتوا شاعرين بده مواطن : آه أنا كطبيب مفيد فوزي : هل هو أقوال لم تتحول إلى أفعال مواطن : لأ ده أفعال مفيد فوزي : انت معاك الموبايل بتاعك يمكن حالة مستعجلة مواطن : ده مدير المستشفى مفيد فوزي : سمعني بيقولك ايه مواطن : د. أيمن ازيك انا باتكلم مع حديث المدينة تيجي تتكلم معايا مفيد فوزي : هاتوه ، د. أيمن انت عندك شجاعة انك تقول عن الوضع الحقيقي لك في المستشفى هنا دون خوف ودون تردد ولا تخاف من وزير الصحة، متخفش تييجي تقول، تعالى قوللي اوجه القصور ايه فاصل مفيد فوزي : في أسوان قابلنا طبيب مصري كبير يحمل لقب سير من ملكة انجلترا ومهموم جدا بقلوب المصريين وخصوصا قلوب الأطفال الذين لا يملكون الإفصاح عن آلامهم، د. مجدي يعقوب من داخل الحلم فاصل من حلقة مجدي يعقوب 9/ 7/ 2010 د. مجدي يعقوب: طبعا ده واجب عليا لأن أنا طبعا مصمم ان اخدم شعب مصر والمركز ده لازم يكون في حضور مستمر لعلاج الأطفال والناس المحتاجة حتى مش مهم مفيد فوزي : حر أو برد واللا تلج مش مهم أنت بالنسبة لك دي مسألة محسومة، طمني على قلوب المصريين د. مجدي يعقوب: قلوب المصريين فيها تعب كبير مفيد فوزي : سببه ايه د. مجدي يعقوب: سببه ان احنا عندنا التشوهات الخلقية موجودة كتير يمكن اكتر من أي حتة تانية في العالم ولازم تعالج باستمرار مفيد فوزي : ماله أب: عنده اختلاف في الشرايين عملية كبيرة وقالوا محدش يقدر يعملها في العالم غير د. مجدي يعقوب أم : ابتدا يزرق خالص مفيد فوزي : هيعمل عملية جراحية يعني أم : ايوه فتح قلب مفيد فوزي : عنده اد ايه أم : عنده سنتين مفيد فوزي : بكره تعملي العملية وتبقي زي الفل وبعدين تكبري وتحلوي وتفتكري انك في يوم من الايام جيت مركز أسوان للقلب وروحت عند الدكتور مجدي يعقوب وبس مفيد فوزي :كان لنا اهتمام شديد بها خصوصا اذا شاءت الأقدار أن تعاني ألما وعفوا دخلت مستشفى كان من الضروري أن نتوقف عند طبيب التخدير ولكن هل نحن قسونا على طبيب التخدير هل يعاني من شيء هل له هموم فاصل من حلقة التخدير طبيبة تخدير: الجرعة الزائدة في البنج ما هم معندهمش فكرة البنج ده ايه فاحنا لو حنتكلم ان البنج ده سرنجة ما هو العيان مبيشفش غير الجراح ، العيان بيروح للجراح يقوله تعبان من أي حاجة ، عمره ما قاله من اللي هيبنجه أو مين اللي حيشوفه طبيب تخدير: أراه كما يراه غيري اسمه فن التخدير مفيد فوزي : أقدر أسأل سؤال باعتبارك كيل طب الأزهر، ايه الحرام في التخدير طبيب تخدير: الحرام في التخدير هو الحرام في الطب إن أنا أساعد طبيب أنه يعمل حاجة حرام مفيد فوزي : فهمني يعني ايه طبيب تخدير: يعني إن أنا ابنجله مريضة أو أشاركه في تخدير مريضة مثلا هيعمل لها إجهاض غير مباح لسبب غير طبي ده يبقى حرام طبيب تخدير: الجراح اذا مكنش معاه طبيب تخدير على كفاءة وتفاهم مع الجراح الأمور ما تمشيش كويس داخال غرفة العمليات طبيب تخدير: أقول لحضرتك كلام احنا بنسمعه كتير يقولك ده خد جرعة بنج زيادة، الكلام ده مش موجود في الطب، مفيش حاجة اسمها جرعة بنج زيادة أو جرعة قليلة، في قواعد للتخدير والتخدير ده علم كبير وواسع وبيتقدم ويتحدث زي أي علم آخر أو أي تخصص آخر مفيد فوزي : هل يموت الإنسان في مصر بسبب التخدير أحيانا طبيب تخدير: ممكن طبيب تخدير: احنا متحملين المسئولية بتاعتنا كاملة بس احنا محتاجين دعم من أجهزة كثيرة مفيد فوزي : أنا أعتقد بكل تواضع أن الاستغراق في شاشة النت والفيسبوك هو استغراق من قبل الشباب في عالم افتراضي "مخدر" أعيد الكلمة مرة أخرى "مخدر" وللإنترنت جرائم فاصل من حلقة جرائم الانترنت 26/ 3/ 2010 مسئول: هناك اتجاه قوي لدى وزارة الداخلية لإنشاء ادارة متخصة لتأمين هذه التعاملات على شبكة الانترنت مفيد فوزي : عمرها اد ايه الادارة مسئول:حوالى 8 أو 9 سنين سيدة: طبعا الانترنت مش زي رقابة حياتك الخاص مش زي الرقابة على تليفوناتك مش زي التصنت على التليفونات لأ ، ده شيئ معلن عليه ايه بقى هذا الوحش الخرافي، عليه ما يسمى بظاهرة المدونات، دي ظاهرة في اجمالها ظاهرة ايجابية جد طلعت كتاب واثمرت عن أفكار سياسية جديدة وطلعت وجوه شابة وفيها تواصل وفيها وفيها، لكن لو افترضنا ان 80 % منها ايجابي، ال 20 % كارثة مفيد فوزي : أبرز ما في الجرائم الالكترونية ايه؟ تشويه الرموز وتشويه الناس مسئول: آه طبعا تشويه الرموز وتشويه الناس وجرائم السرقة وسرقة البنوك كل دي جرائم انتشرت وكان لسه في قضية قريب اللي هي بين أمريكا والمصريين وبعض الدول العربية، اللي هي الشبكة اللي اتقبض عليها بالفعل وكان أغلبهم من المنصورة مفيد فوزي : ممكن تتبعها على شبكة النت مسئول: طبعا عندنا ادارة الوثائق والمعلومات في مصر إدارة قوية جدا، بس الناس معندهاش وعي تروح تشتكي فين،الانترنت يمتد في فراغنا ، بمعنى إن الأولاد والبنات لأن معندهمش نظم ، معندهمش شلة زي زمان، في حاجات كتيرة أوي تآكلت، الانترنت معليهوش أي رقيب، فبالتالي أنت تفاجئ إن الولد الصغير بيكلمك ، الشاب يعني بيتكلم عن حاجة انت مش متخيل ايه اللي هو بيقوله لكن هو عادي جدا ، انا اللي متخلف مفيد فوزي : قضايا الشارع ليست وهما افتراضيا ولكنها حقيقة، مثلا ناقشنا الأسعار النار فاصل من حلقة جنون الأسعار 8/ 10/ 2010 مفيد فوزي : حضرتك بتشتري بامية؟ بتشتريها بكام مواطنة: خمسة جنيه مفيد فوزي : وقبل كده كانت بكام مواطنة: كانت رخيصة ب 4 و 2 مفيد فوزي : وايه اللي غلاها مواطنة: غلاها الدنيا، القوطة بقت ب 10 جنيه مفيد فوزي : الدنيا بقت غلا مواطن: أظن واضحة قوي مفيد فوزي : أنا آسف في السؤال، سؤال غريب شوية، تفتكر ايه سبب الغلا تفتكر المرتبات ثباتها واللا ايه مواطن: الجشع مواطنة: مفيش رقابة عليهم مفيد فوزي : وهو الرقابة ايه عايزة مفتش الأسعار مواطنة: حد يتابع يشوف الأسعار يشوف لو هما بيزودوا من عندهم تاجر: الزرع ده لما الميه عليت هي اللي عملت ارتفاع السعار ده كله مفيد فوزي : كان بكام البصل قبل كده كان بجنيه وربع جنيه وكان ب 30 قرش مش 3 جنيه تاجر طيور: انت جاي تتكلم دلوقت في الطماطم، لأ، اتكلم في الفراخ احنا بيوتنا خربت، حنعيش ازاي وندفع ضرايب وتأمينات وكهربا ونعلم عيالنا ازاي ، نعيش ازاي، مش عارفين مواطنة: وزير التموين ينزل ويشوف الناس بتشتكي ازاي، مينفعش، الطماطم تختلف ايه عن زمان لما كنا بنشتريها ب 2 جنيه وجنيه ونص دلوقت ب 10 جنيه ليه مواطنة: انا موظفة حضرتك بآخد 600 جنيه وجوزي برده ، يعني كله 1200 جنيه، بادفع ايجار 400 جنيه، ميه ونور 50 أو 60 جنيه وطبعا بقيت الحياة أعمل ايه، عشان اعمل شوية محشي دلوقت، حلة المحشي بتكلفني 100 جنيه مواطن: المشكلة الوسطاء، كيلو القوطة اللي حضرتك بتشتريه ب 10 جنيه بيطلع عندنا من الغيط بجنيه وربع لأن في 4 ، 5 وسطاء، لو لغينا الوسطاء حيوصل هنا ب 3 جنيه مفيد فوزي : ناقشنا إمكانية مقاطعة اللحوم فاصل من حلقة مقاطعة اللحوم 9/ 4/ 2010 جزار: حضرتك سبب غلا اللحمة ان الثروة الحيوانية بتاعتنا هنا في مصر ضعيفة مفيد فوزي : يعني ايه جزار: يعني العجول اللي بتتربى قليلة مفيد فوزي : يعني عددها قليل، لماذا قل عددها جزار: نا في مصر بندبح الاناث ، اللي هي ممكن تتعشر وتجيب وتولد عجول آخر: أزمة الأعلاف، ازمة العمالة، 100 سبب، المثلث بتاع اللحوم كله في مصر بايظ، الفلاح مبيربيش، الحمى القلاعية اللي خربت الدنيا، التصدير، بيدبحوا البتلو ويصدروه، يصدروا اللحمة بتاعتنا السليمة ويجيبوا اللحمة المعاقة يأكلوها للشعب ويجيبولهم الأمراض. مواطن: مافيا كبيرة، لامة الفيوم بحالها لامة الصعيد والشرقية أما حرام، اقتصاد! عايزين حد مسئول يقول كفاية كده تخريب احنا مش ناقصين الشعب المصري غلبان, مطحون بالعربي، لمصلحة مين ناس تغنى وناس في الأرض مطحونة حرام مواطن: قاطعنا اللحمة شهر ، جت اللحمة انخفضت، دلوقت اللحمة ب 50 جنيه و 60 جنيه، أنا بآخد كام عشان اجيب كيلو لحمة ب 50 جنيه مواطنة: لأ طبعا منقدرش نستغنى عن اللجحمة لكن ما دام غالية كده حناكلها ازاي مفيد فوزي : طب ما هو في ناس بتقول قاطعوها عشان ترخص مواطنة: آه دلوقت باجيب فراخ وسمك مفيد فوزي : الفراخ غليت مواطنة: آه غليت مفيد فوزي : والسمك مواطنة: يعتبر غلي برده مواطن: هل يا ترى العمل يتكامل من ناحية واحدة، الحكومة ، الشعب، الرقابة مفيد فوزي : ناقشنا قضية المرور، العذاب اليومي الدائم فاصل من حلقة.....أزمة المرور وتجربة وزير نقل سابق د. عصام شرف: فكرة نقل الوزارات، هو الأفضل أقول توزيع الخدمات على مناطق جغرافية مختلفة، يعني فكرة وزارة بذاتها ومكتب الوزير مهياش المشكلة، انما اشوف الجهات اللي بتقدم خدمات كثيفة الزباين هي دي الي نبدأ نوزعها ضيف: ي عاصمتين في سيرك، عاصمة منهم قلب القاهرة وهي العاصمة الخديوية ، العاصمة الأوربية التي أنشأها إسماعيل باشا على مساحة 16 كم مربع والعاصمة العثمانية، دول مقدرش أخرج براها ، دول عاصمة، المباني اللي فيها مبانيها ، شوارعها، ميادينها مفيد فوزي : حتى خنقة مرورها متخرجش منها ضيف: لأ مش حاخشها أصلا، عشان كده باقول عاصمتين في سرك، نييجي بقى لهموم مدينة نصر والتجمع الخامس وغيرها دي بقى عايزة محافظ معين ، العاصمة الداخلية دي بقى "عمدة" زي حتة في الدنيا" مير" ، زي مير أوف ويستمنستر يختلف عن محافظ جريتر لندن، فالمفروض يبقى عندنا هذه العاصمة دي المخ بتاع البلد بيدخلها الناس اللي لها فعلا مصالح ، يدخلها السائح آمن ، يدخلها رجل الأعمال الأجنبي آمن مفيد فوزي : أمال الربكة بتحصل ازاي من 18 مليون في النهار و 14 مليون بالليل ضيف: من الهجرة اليومية اللي جاية من رخص المواصلة اللي بتنقل ناس لها لزوم . فاصل مفيد فوزي : ولم ننسى الأدب ولا صناع الوجدان فذهبنا الى بيت العقاد في أسوان فاصل من حلقة ذكرى العقاد بأسون 9/ 3/ 2010 تسجيل قديم للعقاد عباس العقاد: هممت بالانتحار لعدة أسباب ولذلك أعتقد أن الإنسان لا يمكن أن يقدم على الانتحار لسبب واحد، بل تتجتمع عدة أسباب ويضاف إليها سبب مفاجئ ينتهي الى غاية الطاقة حتى يفكر الإنسان نهائيا في الانتحار، تجتمع الأسباب العاطفية والنفسية والاجتماعية، تجتمع أسباب يمكن أهمها فقد الثقة بالنفس مفيد فوزي : عباس العقاد كان قامة طويلة، يعني انا فاكر مقدرتش في حياتي اقوله قوم اقف عشان اشوفك نجاة العقاد/ ابنة شقيق العقاد: قامة طويلة وعريض الجسم ووجهه وسيم جدا مفيد فوزي: إذا سمحتي لي، يعني الضريح نفسه ليس عاديا نجاة العقاد: لأن حاقول لحضرتك حاجة مفيد فوزي: والدك كان نفس الشيء نجاة العقاد: ايوه حتى والدتهم جدتي كانت طويلة وعريضة والأستاذ العقاد سماها " المشدة" وهي رئيسة العمل في العهد العثماني مفيد فوزي: ا استراح العقاد لأنيس منصور نجاة العقاد: أحد تلاميذه المخلصين ومازال، كلن كل جمعة يرتاد الصالون وكنا بنشوفه واحنا أطفال مفيد فوزي: لكن على قدر ما أسلوب العقاد أنه معقد نجاة العقاد: انا باعترض على اللفظ ده، العقاد مش معقد في لفظه، لني كنت باسمع لما الناس يقولوا له أسلوبك صعب علينا كان بيقول أنا باحب ارتقي بمستوى القارئ لأعلى مش عايز اكتب له أسلوب يهبط بمستواه الفكري والعقلي مفيد فوزي : وذهبنا الى خميلة الشاعر نزار قباني صائد الكلمات فاصل تسجيل قديم مع نزار قباني نزار قباني :المرأة يجب أن تثور دائما لأن ما في حد بيخلصها، الرجل لم يعطيها شيء إطلاقا، هي شركة محدودة الأسهم يملكها الرجال فقط وهو لا يعطي إذا لم تأخذ المرأة اللقمة من بين أسنان الرجل فهو آكلها آكل اللقمة وآكل المرأة معا مفيد فوزي : انت بهذا المنطق تحول المرأة الى مظلومة المظلومين هل هي بالفعل كذلك نزار قباني : جدا وهناك من يدعي العكس مفيد فوزي : واين الحقيقة نزار قباني : طبعا مع المرأة مفيد فوزي : لم يسقط منا أبدا سهوا النجوم الذين امتعونا يوما ما، منزلناش الستارة، مقفلناش عليهم ، مخدناش النجوم الحاليين، مبهروناش، استحضرنا الذاكرة الى الذين امتعونا يوما ما، هذه قيمة الامتنان وكنا نتساءل بالعدسات أين هم الآن فاصل لقاء مع الفنان محمد نوح محمد نوح: كانت حالة القلب عندي سيئة جدا مفيد فوزي : اعتقد القلب من صدمات الحياة محمد نوح: آه ، بس الحمد لله تغلبت عليها، والحمد لله أنا راضي ومبسوط وولادي كويسين والحمد لله، كده أموت وانا مرتاح مفيد فوزي : صوابعك متاكلكش على البيانو محمد نوح: معدش في القوة مفيد فوزي : بمعني محمد نوح: بمعنى مبقاش في توافق عضلي، يعني امسك العود معرفش أعزف مفيد فوزي : الأصابع دي نعمة من الله انها تبقى محمد نوح: متوافقة عضليا مفيد فوزي : لكن ودانك بعافية محمد نوح: وداني برده اتأثرت زي عنيا ، يعني انا قدرتي على الرؤية مش مفيد فوزي : أنا لاحظت وانت جاي تقعد مشكورا قلت هو فين محمد نوح: لأ ما انا مش شايف كويس، جالي جلطة على العين فاصل مفيد فوزي : مين لغاية النهاردة بيكلمك ويسأل عنك شريفة فاضل: من مين مفيد فوزي : من نجوم الزمن اللي احنا فيه شريفة فاضل: لالا الواحد لما بيبقى مش في الفن كله بيروح منه مفيد فوزي : خالص شريفة فاضل: ما عدا واحد، صلاح عرام ما زال بيسأل عليا من حين لآخر، ومحمد سلطان مفيد فوزي : بطلوامزيكا الاتنين شريفة فاضل: طبعا صلاح عرام كبر وسلطان انا ماباشفلوش حاجة مفيد فوزي : لكن بيكلمك شريفة فاضل: من حين لآخر مفيد فوزي : لما بتخشي مكان عام الناس بتعرفك شريفة فاضل: آه وساعات ابقى مش عاملة مكياج خالص ولابسة نضارة وكده وفي ناس بيعرفوني مفيد فوزي : بيسعدك شريفة فاضل: طبعا فاصل مفيد فوزي : أستاذ محمود أين فرقة رضا لآن محمود رضا : فرقة رضا مقرها حاليا في مسرح البالون وهي تتبع وزارة الثقافة مفيد فوزي : ماذا تبقى منها محمود رضا : والله كنت من يومين كده حضرت البروفات بتاعتهم، كويسين مفيد فوزي : مبشرين محمود رضا : مبشري بس محتاجين المساعدة من الوزارة فاصل مفيد فوزي : وبعد هناك خلف عدسات حديث المدينة نجوم في الظل هم المركب والربان والدفة، الحكيم الصامت مهندس الصوت حمدي محمود، الهمام المصور نبيل عبد المنعم، الصاعقة المصور حمدي إمام، الدبابة الحنونة المصور ماجد برنابة، والمعاونون: عباس عبد المنعم الضابط المتنكر، محمد عيسوي الأخرس الثرثار، الهادئ دائما مدير الإنتاج عمرو وهناك أيضا الأكاديمية اللماحة الدكتورة رغدة محمد عيسى والشطورة أسماء النجار واللهلوبة هانم الشر بيني، لا يمكن أن أنسى الذين يعملون وراء الكاميرات وهم المرتب الوسيم عماد الشامي والطيب الحزين مصطفى عبد الباقي وهناك أيضا رجل المهمات الصعبة وليد الشرقاوي والمخرج الذي يمكن أن أقول عنه الفنان بلا فوضى أحمد معوض ولأني من جيل الامتنان فلا يمكن أبدا أن أنسى واحدة من مؤسسي "حديث المدينة" الراحلة نادية كمال وكان معكم مفيد فوزي