أبويا الله يرحمه ..رغم انه ماقاليش.. بس قالِّلى شُفته صلَّى..قلت اصلِّى شُفته علَّى..قلت اعلِّى شفته وسط الحزن غنَّى..قلت اغنى الله يرحمك يابا أول إيدين تتمد بالكتاب ليّا أول شعاع تنوير إنكتب ليّا. ألأرض يابنى فى المبتدا كرويه والناس خلقهم ربُهم سواسيّه والدنيا أربع فصول..والشهر تلاتين يوم والعمر أغنيه ! يعنى الحياه ف كلمتين..بنعيشها أغنيه فيه ناس كتير بتغنى..وصوتها مش مسموع وناس تقول الأغانى متغمّسه بدموع وانا مش يسوع ولا الغُنا ممنوع لكن بقول اللى احسُّه واللى بيه موجوع واغنى كلمة حق لو حاموت م الجوع وبموضوعيه ياولدى.. هو ده الموضوع. وكتير كتير يابا ومنك اتعلمت وخدتنى فى البرد فوق صدرك ونمت وكنت كائن مغمّض وفى المنام فتَّحت وعرفت أنزل لفوق وعرفت أطلع لتحت مش بهلوان لكن..الدنيا بحر غويط ولو مابعرفش اعوم..أنط ليه ف محيط وباختصار يعنى..لازم ابقى حويط. ورفعت إيدك للسما وعنيك بتترجَّى أحس وافهم واحب ..من قبل ماتهجَّى ألخوف طريق ملعون. الراجل مابيخافشى.. وان كنت صاحب حق.. الحق مايموتشى وان حد قالك ياولدى.. فى الدنيا فيه عفاريت إياك تصدّق وإلا تبقى عبيط لوقلب سكنه الخوف ده يبقى قلب جبان والدنيا دى ياابنى مخلوقه للجدعان أما ضعاف النفوس واللى بيحنوا الرؤوس والخوافين..والضعفانين..والخوانين.. دول أصلهم حيوان. آدم صحيح من طين..لكنه كان إنسان المولى أمر الملايكه يسجدوا لآدم.. وانا وانت إيه ؟ والخلايق دى.. بنو آدم يعنى انت يابنى كبير.. ماتخافش غير منٌّه والعُسر بعده اليسر..جاى الفرج منُّه أدركت معنى الأمان..وقدرت احٍس الأمانى وعرفت الِم الحروف وابنى ف جدار المعانى وقبل ماانطق كلام.. لقيتنى باكتب أغانى وبقيت بلاغى القمر..واصاحب النجمات واشيل فى قلبى الندى.. يسبقنى ع الورقات واقول حبيبى هجرنى واقول عرابى مات ! يمكن بقيت انا شاعر واقدر أخُط المشاعر..لكن فى كلمة حق.. علمنى ابويا ومات. الله يرحمك يابا. الغربه يابنى ضنىَ.....أصبر وماتكلِّش ولوتناك الريح......إثبت وماتملِّش ولو تخاف الذل......إرحم وماتذلٍّش والحب زى العمر.. بيزيد مابيقلِّش وانا يابا عشت بحب. حابب أكون حاجه.. بس اكون ازاى ؟.. وانت اللى علمتنى ..ماخافش م اللى جاى الله يرحمك يابا الدنيا عندك كِتاب مع إن على حد علمى..علامك الكُتَّاب عارف تاريخ الفراعنه والتتار والروم وغاندى قالك حكايته.. وعيشتها باليوم وصاحبت كل المِلل.. ماصابكش مره المَلل وعرفت مين اللى ضحى .. واللى مات مسموم سارتر وهيجل.. أفلاطون وهُوجُو وآتارى ماركس إبن عمة شُو وكنت يوم اشتراكى.. والسجن مش عوَّره علشان عشقت جمال ..وفرحت بالثوره وعشت عمرك مناضل وابن مصر أصيل.. وكنت يومها ابن نكته..وابن نهر النيل حبيت محمد رفعت..وعشقت صوت الست.. وسمعت سيد وبيرم وبيتهوفن والتِّتْ.. والحكمه طلت ف صوتك.. تقدر تقول وتبٍّت.. وكان ف قلبك عالم وكان يساع قلبك لابيه دخلت التاريخ..ولا التاريخ كتبك.. وعملت إبنك تاريخك عايش على مذهبك ومهما شاف م الحياه ..مقدرش يوم يغلبك وحاعيش يابويا اقراك وحاعيش يابويا اكتبك الله يرحمك يابا الله يرحمك يابا...........الله يرحمك يابا.
