كنت ساعتها في الكلية لمّا خرجت مظاهرات في الشوارع تهتف وتقول سيد مرعي يا سيد بيه .. كيلو اللحمة بقى بجنيه .. وكانت أمي الله يرحمها تبعتني للجزار اشتري نص كيلو لحمة ب 33 قرش " كان الكيلو وقتها ب 66 قرش وتقوللي : خلّي الجزار يقطعها لك من " الزند " .. وأوعى تنسي تطلب منه حتتين عضم عشان الشوربة .. نص كيلو لحمة على أسرة مكونة من 8 أفراد .. كل واحد حتة او فتفوتة بالعافية .. بس كانت ماشية .. والله العظيم كانت ماشية وزي الفل .. حلة شوربة وحلة رز وحلة ملوخية وناكل وننبسط ونقول الحمد لله. إنما إيه المناسبة .. وإيه اللي فكرني بحكاية " زند " اللحمة دلوقتي ؟ .. اقول لكم .. الحكاية ومافيها ان المستشار احمد الزند واخداه الجلالة ع الأخر .. ماشي يخبط في الناس ويقول لك يا ارض اتهدي ماعليكي قدي .. ساعة ما الرئيس محمد مرسي اصدر قرار بعودة مجلس الشعب .. شمّر عن ساعديه وبرّق عيونه وقال لك : قدامك يا مرسي " مقلش حتى يا ريس مرسي " .. قدامك يوم ونص " مش عارف ليه يوم ونص بالتحديد .. ليه مش يومين او يوم " .. المهم قدامك يا مرسي يوم ونص .. إما ان تسحب قرارك وإما " .... " .. بين القوسين توعّد وتهديد من اللي قلبك يحبهم .. حاجة كده زي فتوة الحارة في حرافيش نجيب محفوظ .. لا تدفع المعلوم .. لا تدفع عمرك قصاده .. ويشير بصباعه اللي زي النبوت .. وليلة أمك كوبية يا اللي مش حتسمع كلامي .. احنا القضاء الشامخ .. احنا الحصن الحصين .. إحنا اللي كنا بنزوّر الانتخابات قبل الثورة .. إحنا اللي أحلنا المستشار البسطاويسي واحمد مكي للتحقيق عشان كشفوا اللعبة .. إحنا اللي نجّحنا الدكتور مصطفى الفقي في انتخابات 2005 .. واخد عدد اصوات المنافس الإخواني .. وكان الفرق بين الاتنين رهيب رهيب ، إنما الناس اللي فوق عايزة الفقي ينجح ..يبقى لازم ينجح.
احنا اللي قالت علينا المستشارة نهى الزيني : القضاء المنبطح .. عشان هى اللي كشفت حكاية التزوير بتاعت الفقي .. وكانت فتحة خير عليها .. اتشهرت وبقت فلة شمعة منورة .. عشان كده محدش يقرب من القضاء المصري " الشايخ " قصدي االشامخ .. سيبكم بقى من كلام المستشار زكريا عبد العزيز اللي كان قبلي رئيس نادي القضاة .. النفوس شايلة والنفسنة وحشة .. وعليا الطلاق بالتلاتة يا مرسي ان ما اتلميت وعرفت حجمك ، لاجيب عاليها واطيها.. ومعايا صاحبي وحبيبي توفيق بيه عكاشة رمز الوطنية اللي على حق .. سيبك من الحاقدين اللي بيتريقوا عليه ويقولوا عنه مستشار تزغيط البط والوز .. ده راجل فلاح وبيقّدر الناس الكبار .. وبيوطي يبوس ايديهم أحسن ينضرب على قفاه .. أصل قفاه متكلف ومعمول له كرانيش .. ولازم يحافظ عليه ولو وصلت انه يبوس الجزم كمان.
أيوه هو صاحبي وحبيبي وسيدي وتاج راسي كمان .. مش هو ضد الإخوان وضد مرسي تحديدا ، يبقى صاحبي وحبيبي .. مزقوق من مين بقى .. محدش له دعوة .. بس انا مش مزقوق من حد .. انا رأيي من دماغي .. ودماغي انشف من الحجر الصوان .. واللي يرش القضاء بتاعي بالميه .. أرش أمه بالنار .. والدكر فيكم يوريني نفسه.
سيادة المستشار الزند بعد المهلة اليوم ونص اللي حذّر فيها الريس مرسي انه يسحب قرار عودة مجلس الشعب .. لسه الجلالة واخداه على الأخر وبيحذّر كمان مرة .. اذا جاب وزير للعدل غير الوزير المستشار عادل عبد الحميد .. حيبقى فيه كلام تاني .. وقال بالحرف الواحد : إن تولى الوزارة شخص أخر ، سيكون لنا موقف " أنيل " من موقف احمد حلمي في صباحية العيد الصغير .. ويطالب الزند الدكتور مرسي بالاستجابة الفورية بالإبقاء على المستشار عبد الحميد .. اذا كان يريد الاستقرار للبلد .. واذا اختار غيره ، يبقى يا داهية دقىّ .. وانت اللي جبته لنفسك .. خليك حلو واسمع الكلام عشان احبك .. سمعت كلامي في الأول ومعدتش مهلة اليوم ونص الا وسحبت قرارك .. إياك بقى المرة دي تركب دماغك ومتسمعش الكلام .. مش حلو علشانك على رأى محمد صبحي في " الجوكر" .. وعقلك في راسك تعرف خلاصك.
هو فيه إيه يا جماعة الخير .. أخونا الزند ماله كده فاتح ع الرابع ومش همه حد .. لا رئيس حكومة ولا رئيس جمهورية.. وقاعد يهدّد كأنه " الناجي الكبير " بتاع الحرافيش ، والنبوت في ايده ، واللي مش عاجبه حيتلسع لسعة يقول بعدها حقي برقبتي ..
يا عم المستشار .. خف تعوم .. ولما تخاطب رئيس الجمهورية إتكلم باحترام .. بلاش وحياة والدك التحذيرات ديه والعين الحمرا اللي بتبرق لنا بيها .. ما تسيب رئيس الحكومة يختار اللي يختاره .. مالك انت ومال مرسي وقنديل .. اش دخل جنابك في تشكيل الوزارة؟ .. ولا انت مسنود على إيه بالضبط .. مش ممكن طبعا تكون مسنود على عكاشة ، وطمعان في بطتين ووزتين من " عشة " امه .. ده عكاشة ده أخرته سودا .. وابقى قول الواد عفيفي ده قال لي .. وانا اللي مسمعتش كلامه .. مستشار محترم زي حضرتك يصاحب واحد معتوه زي عكاشة ، وتقول له في ماداخلة انت رمز الوطنية المصرية ، وان الفراعين بتاعت امه قناة مصرية اصيلة .. يا اخي عيب .. وعلى رأى المثل تعرف الراجل من مين ؟ .. قال لك من صاحبه .. وعوكشة صاحبك .. يبقى عن قريب اوي بعد ما تطلع على المعاش .. حتعمل مزرعة فراخ وكتاكيت وانت وعكاشة حتفضلوا تصوصوا للصبح ..
الله لا يسيئك يا سيادة المستشار .. اسكت شوية .. الدنيا صيام ومش ناقصة صداع.. خلي تصريحاتك دايما بعد الفطار .. عشان ناكلها من هنا .. وباى باى من هنا .. وبعدين حاول تشوف اسم تاني غير " الزند " .. أحسن المدفع يضرب ومتلقيش حتة فاضلة في جسم جنابك .. كل واحد وبشوقه بقى .. يا كلها مسلوقة مع الشوربة .. يشويها ع الفحم .. يشوّحها مع شوية بصل وحتتين بطاطس وكام حبة بسلة .. يعني حتتاكل حتتاكل .. ويا سلام بقى لو معاها ورك فرخة بلدي من عند تيفة .. تبقى ليلتنا نجف .. وليلتك فل!!
