وزير التنمية الإدارية أصدر قراراً رقم «50»: لا يجوز الجمع بين حافزين. «إحنا كنا بناخد حافز جهود غير عادية 60% نظير العمل بعد الفترة. وكنا بناخد حافز إثابة 25% اترفع بقرار من رئيس الجمهورية إلي 75%، القرار «50» ده رجعنا ناخد 75% كله علي بعضه». هذه الجملة الطويلة كانت في حوار بيني وبين ممرض في مستشفي مركزي بإحدي المحافظات.. النسب المئوية التي قالها جعلت الكلام شكله مهم. لكن عندما صارحني بأن أساسي راتبه بعد 16 سنة من العمل في نفس المكان 230 جنيهاً، تأكدت أن شر البلية ما يضحك. سألته: «230 جنيهاً إزاي يعني؟ في الآخر خالص دخلك كام؟!». قال: «إجمالي الراتب 376 جنيهاً والحافز 150 جنيهاً، أنا تمريض منذ 16 سنة سيادتك». المفترض بهذه الأرقام ألا يتمكن من الحياة كمسئول عن أسرة وعن أب وأم وربما أخت وأخ أصغر، لكن الواقع أنه يستطيع. من اليوم الأول للعمل في المستشفي المركزي يبدأ البحث عن عمل آخر. سعيد الحظ هو من يجد عملاً في مستشفي أو عيادة. لكن من لا يجد لا يتمنع عن أي عمل بديل، المشكلة التي تواجه صديقنا الممرض، هي الخصومات. يقول: «النوبتجية ب175 قرشاً لكن اليوم بيتخصم منه 60 جنيهاً من القبض». يقصد أن من يلتزم بحضور النوبتجية المقررة عليه يزيد مقابل كل مرة 175 قرشاً لكن من يتغيب يخصم له 60 جنيهاً، ومدة النوبتجية 12 ساعة، وبالتالي فحضورها يمنع من مزاولة العمل الإضافي، وهنا تصبح الحسبة صعبة. سنة 2008.. وزير الصحة زار المستشفي عندنا، واشتكينا له.. أصدر أوامر بأن تكون النوبتجية ب10 جنيهات، لكن الأوامر دي لم تنفذ». سألته: «ليه ما طالبتوش بتنفيذ أوامر الوزير؟.. ليه ما قدمتوش شكوي؟!» يبدو أن كلامي أيضاً مضحك بالنسبة له. ضحك.. وقال: «أنا واحد من الناس عمري ما أسكت علي حقي، أنا بأقدم شكاوي وأعمل محاضر وأبعت فاكسات لوزير الداخلية وللسيد صفوت الشريف وللمحافظ، ولو عرفت أبعت لرئيس الجمهورية هأبعت.. لكن إيه الفايدة؟!»، سألته: «يعني خلاص استسلمت؟!» قال: «لأ.. عارفة ليه أنا مش ممكن أيأس لأني أحسن من غيري كتير.. أنا شايف كل حاجة بايظة.. الأطباء عندنا في المستشفي حالتهم كرب.. رواتبهم هزيلة وما عندهمش طريقة يزودوا بيها دخلهم». بلاش الأطباء.. أنا أحسن من المدرس اللي بيدرس لابني.. أحسن بكتير، لو كان حالي أسوأ حال يمكن كنت استسلمت عشان الديون بتكسر.. والواحد اللي ما يقدرش يكفي أهله بيتكسر.. أنا ولله الحمد عايش كويس، عشان كده ما أسيبش حقي ولو من الشرطة. أنا مرة واحد ظابط قال لي الأسبوع اللي فات: «أطلع أمر اعتقال».. قلت له: براحتك سيادتك!! حاولت بكل الطرق أن أعرف كيف يحصل علي دخل إضافي.. فشلت!! كان يخرسني بإجابة واحدة: «يا ستي الأرزاق علي الله»!! فأرد: «ونعم بالله»!!