مش عارف ليه حاسس إننا دخلنا غسالة فول أتوماتيك وخرجنا منها كده .. القميص شابك فى الفوطه والبنطلون جوه الجلابيه والشراب جواه الفانلة وهكذا .. وده طبعاً جنب إحساسى بإن عملية الغسيل افتقدت الحرفة والمهارة بل مبادئ الغسيل الأولية ، وكله دخل الغسالة مرة واحدة الأبيض مع الألوان والصوف مع القطن مع البولى استر وبرنامج واحد للكل ، فاللى بهت بهت واللى كش كش وده غير اللى اترهل واللى اتقطع .. يا ترى عندكم نفس الإحساس ؟! كان نفسى ندخل الخلاط مع بعض عشان نطلع خليط واحد متحد ويبقى فعلاً الكل فى واحد بمذاق خاص لا يمكن الحصول عليه إلا بخلط كل الفئات والأعمار .. ياه حلم جميل قوى .. ياريت نجرب الخلاط يا جماعة . ومن تجربة الغسالة اللى شوهتنا بنشوف العجب ، حالة شيزوفرينيا عجيبة مش عارف جت منين .. يمكن عشان القميص افتكر نفسه بوكسر والبنطلون شايف نفسه سموكن فاختلطت الأدوار .. يمكن .. والشيزوفرينيا دى انتجت لنا حالة ملهاش مثيل ربما فى الدنيا كلها ، يعنى احنا مش عاوزين المجلس العسكرى يطول فى الحكم وفى نفس الوقت مش عاوزين نعمل إنتخابات دلوقت لإننا محتاجين وقت رغم إهدار 7 شهور فى التشتت والإنفكاك واللف والدوران فى الميدان الذى فى رأيى المتواضع جداً فقد رونقه وتأثيره بمجرد بدء محاكمة مبارك وبطانته حتى لم يعد المجلس العسكرى ولا الحكومة ولا طوائف كثيرة من الشعب تهتم بالمليونيات .. ما علينا .. المهم ضاعت الشهور وبقينا فى عرض الدقائق وفاضل فسوة ونقع فى عرض الثوانى ثم الفيمتو ثانية ، نفس فكرة المذاكرة ليلة الإمتحان والجون بتاع الوقت الضايع واجرى عشان تلحق القطار.. أيييييييييييه ثقافة . وتزداد الشيزوفرينيا مع الطلبات الفئوية كل واحد عاوز حقه دلوقتى .. الليله يا عمده .. ومن مين ؟ من حكومة مؤقتة جايه تمشى البلد لغاية الإنتخابات بأمان .. يعنى حكومة إحنا نفسنا مش عاوزين نديها صلاحيات كبيرة وبننتقد مناقشتها لأى حاجة محتاجة وقت ونقول هما مالهم هما عاوزين يلصقوا فى الكراسى ولا أيه ؟ لكن نيجى عند الطلبات الفئوية وتبقى هى دى الحكومة الدائمة والمطلوب منها تنفيذ كل حاجة زى ما يكون زيادة المرتبات والحد الأدنى والأقصى وبدلات الدكاترة وحوافز الموظفين وإضافى العمال ومشكلة البطالة والعنوسة والإسكان وحاجات تانية كتير وكلها طلبات فى صميم خطط البلد طويلة الأجل ومؤثرة طبعاً على الميزانية والموازنة ، وأضف كمان يا سيدى المُبَجَّل حقوق الشُهداء وتعويضاتهم ومعاشاتهم .. حاجة تلخبط والله يعنى عاوزين الحكومة دى مؤقتة ولا دائمة .. مش فاهم برضه ... نيجى بقى للسؤال المهم ألا وهو أحنا ليه اعتبرنا أن الثورة خلصت خلاص خالص خلوصة ونازلين طلبات ؟ يا أخوة الخير احنا لسه فى عز الثورة وفى أهم مرحلة للثورة مرحلة التنظيم والترتيب والتنقية .. بالظبط زى تنقية الرز بحيث نمسك بأيدنا لامؤخذة الوساخة ونرميها بره الصينية .. الله يرحمك يا أمى .. مش عارف ليه احنا اللى مُصرين نشتت نفسنا ونلخم بعض ونتصارع على كيكه لسه مخرجتش من الفُرن ، ليه مصممين على إننا نوزع جوايز الثورة قبل أن نُنهيها وأن نُحسمها بالشكل اللى كلنا كنا بنحلم بيه .. حلم كل محبي مصر الجميل الممتع اللى يستاهل ألف ثورة ، يا جماعة د حتى المحاكمات لسه مخلصتش .. أفهموا الموضوع كويس واستوعبوه . طلبتنا دلوقتى بالظبط هى طلبات مِن مَن لا يملك لمن لا يستحق .. فلا واحد منا يستحق أى ثمرة إلا بعد أن يكد ويتعب بجد ونلاقى الثورة طرحت أجمل ثمارها ، يا جماعة محتاجين الصبر والعرق والجهد ، محتاجين نكمل مشوار الثورة اللى يا دوب وصلنا لنصه .. ولا برضه فى أهم حدث فى حياتنا ح نبتدى بداية عظيمة وننهى بدون تشطيب وبدون اتقان .. يا ناس والله حرام . يا ريت نمسك بإيد بعض وندخل الخلاط تحت قيادة شيف واحد مشهود له بالرجاحة وحب مصر ، أرجوكم بلاش شيزوفرينيا لحسن المشوار طويل ومش ناقص عطله ولا جنان ولا فهلوة ولا خلافات . تعالوا نحافظ على أجمل حاجة حصلت فى تاريخنا ونُخلص النية لله والوطن ، وأرجع وأكرر اللى عمل الثورة عشان بيكره مبارك يبقى شكراً كده خلصت أما اللى عملها عشان بيحب مصر يبقى لازم يكمل ويكمل صح .
