الكترة تغلب الشجاعة: هكذا يتعامل التليفزيون المصري مع منافسيه في شهر رمضان. بدور علي إبرة في كوم قش: شعرت بذلك وأنا أبحث عن برنامج الكاتب الصحفي عمر طاهر «مصري أصلي» علي شاشة التليفزيون المصري ولم أجده. جيت أصلح البنطلون الجاكتة ضربت: أعتقد أن الوزير الفنان فاروق حسني يقولها لنفسه دائما. مصر هتختار طعمها: وبالفعل استطاعت قوي الشعب وأطيافه وفنانوه ومثقفيه وبائعوه ولاعبوه أن تتحد وتختار طعمها عقبال ما تتحد وتختار رئيسها. دوام الحال من المحال جملة يجب أن يضعها في الاعتبار كل صناع المسلسلات فقط ومحصورا في شهر رمضان.. أتوقع قريبا أن يسقط هذا الموسم المسلسلاتي الرمضاني السخيف.. زي اللي سايبين الشقة كلها وقاعدين في أوضه ما الشقة عندكو واسعة قصدي السنة كبيرة وأيام ربنا كتييرة.. الأوضه هتنفجر من اختناق مئات البشر فيها، ياللا اطلعوا برااااااااااااه. أي كلام فاضي معقول.. عنوان يصلح لتصريح الوزير الفنان بعودة لوحة زهرة الخشخاش اختر وصفا مناسبا لرمضان 2010 علي شاشة التليفزيون.. أ) المولد ب) شادر السمك ج) سوق الخضار.. زحمة يا دنيا زحمة، زحمة وتاهو الحبايب، زحمة ولا عادش رحمة مولد وصاحبه موجود وقاصد يتوهنا في المولد بتاعه رمضان بتاعنا أحلي من رمضان بتاعكووو.. لأن رمضان عندنا مش أي رمضان.. لأ بقي إحنا رمضانا غيييير.. لأ معلش معلش الطالعة دي بتاعتنا لامؤاخذه رمضان منورنا.. ما هي نيللي قالتها حكمة «اوعي سيبي اللعبة بتاعتي لأ دي بتاعتي يا سلام ياختي ماتشدش ماتشديش إنتي.. ما تشدش ماتشديش إنتي».. حيث المشاهد هو اللعبة التي لا حول لها ولا قوة المتمرمطة والمتشحططة بلا إرادة بين القنوات. فاصل قصير نلحق نلم فيه شوية فلوس بعد مادفعنا دم قلبنا، شكلها كده مش جايبة همها أموت وأعرف مين اللي زقني في الحفرة اللي مالهاش آخر دي.. القصد إستنوني أحط شوية إعلانات وأجيلكم تاني. قالوا مجنون اللي يصدق وزير لما يصرح إننا مستقرييييييين، قالوا مجنون اللي يصدق كيلو اللحمة بسبعين بدل تسعة وتلاتييييين، قالوا عنا وقال الريس اسمه جمال في وسط ناس رافضيييييييين، قالوا مجنون اللي يرجع للقرش تاني قيمته والوزرا بيقبضوا بالملايييييييين، قالوا معقولة حد يفكر الناس تفضل تتبرع وهما مش لاقيييييييييييييين، قالوا مجنون اللي يسوق للناس لبس مستورد وهما عريانييييييييين، قالوا النااااااااس مجانييييييييييين وبقينا تمانين مليون شحاتيييييييين. شفتوا رجعنالكم بسرعة إزاي أهم حاجة تفضلوا متنحين كده وتقعدوا تمسكوا إبرة وفتلة وتلضموا المسلسلات بالبرامج بالإعلانات في بعض.. أيوة كده إوعواحاجة تفوتكوا يا تري مين هيتحمس ويكتب مسلسل لغز سرقة لوحة زهرة الخشخاش من متحف محمود خليل للسنة الجاية؟ ياللا مصر مش حارماكم من حاجة كل الأكشن وكل الساسبنس عندنا.. إلي كل صناع وكتاب الدراما مش مضطر تقدح زناد فكرك ولا حاجة القصص الواقعية المثيرة موجوده بالعبط.. الخير كتير والحمد لله مش مضطر تعيد فيلم اتعمل في التسعينات ولا التمانينات ولا مضطر تعمل سيرة ذاتية لحد مشهور خلاص عملوهم كلهم.. افتح صفحة الحوادث وعيش، بس سرقة لوحة زهرة الخشخاش أنصحك تعمله كوميدي لأن مافيهوش أي أكشن.. بص هو ممكن يبقي مسلسل كرتون للأطفال أصل مافيهوش حبكة تقنع الكبار وماتقلقش من الإنتاج وزارة الثقافة ممكن تموله.. الوزير الفنان فاروق حسني يقدم تاتاتاتا: لغز سرقة زهرة الخشخاش. منتظرين في العام القادم مسلسل جديد من نوعه بقي، شوية تجديد لو سمحتوا عاوزين مسلسل يحكي قصة الأميرة فتحية أخت الملك فاروق.. كده شفنا العائلة المالكة من منظور الملك فاروق ومن منظور الملكة نازلي ناقص نشوفة بزاوية مختلفة 45 درجة من منظور الأميرة فتحية يعني نفس الأحداث ونفس الأشخاص ونفس الفساتين بس بممثلين مختلفين والسنة اللي بعدها عاوزين نشوف مسلسل يحكي قصة رياض غالي من منظوره هو. نفسي أبقي كوميدية أوووووووووووفر أصل دي موضة رمضان 2010 أنا.. بس خلاص.. آخر كلمة ممكن أتوقع في يوم من الأيام إنها تبقي عنوان لبرنامج. مجدي الجلاد.. آخر شخص ممكن أتخيل في يوم من الأيام إنه يبقي مذيع في برنامج ( يجذب المشاهد ).. مجدي مش البرنامج. الوزير الفنان فاروق حسني آخر شخص ممكن يخرج من وزارة الثقافة.
