اشغل نفسك واهرب منك.. واتنقل من خدعة إلي أخري تضحك بيها علي نفسك.. وحاول أنك تنسي.. تنساك.. وتنسي بكرة.. وخليك عارف إنك اسوأ كداب في العالم.. بس قبل ما تنام.. لازم هتلاقي دقيقة صمت.. تأمل.. اسكت.. فكر.. أيوة فكر.. وواجه كل اللي مخوفك وبتهرب منه.. واعرف أنك بتهرب من نفسك.. لما تخاف منك..لما تخاف تكتشف هويتك.. تحدد فلسفتك في الحياة.. أنه أسوأ أنواع الخوف. تخاف من دماغك.. اللي متعرفش ممكن توصلك فين.. ممكن تنجيك أو تغرقك.. ممكن تطلعك سابع سما وتحلق بكل حرية وممكن تحبسك تحت سابع أرض وتقضي الباقي من عمرك محبوس خلف قضبان من أفكار. تخاف أكتر وأكتر من النصين اللي جواك.. نص الخير ونص الشر.. وتخاف أن الصراع ما بينهما ينتهي.. ما هي المشكلة كلها لما ينتهي.. وينتصر نص منهما.. فإذا أصبحت إنساناً مكوناً من خير صافي.. تبقي طيب ساذج «عبيط».. والنوع ده بياخد علي قفاه وميمشيش في الزمن ده وإذا أصبحت إنساناً مكونا من شر صافي.. تبقي شرير ظالم.. والنوع ده هو اللي بيدي غيره علي قفاه وده مشكلة أكبر لنفسه ولغيره. تخاف من قدراتك.. تخاف تتعرف عليك.. تقعد مع نفسك شوية.. تطور من روحك.. لأن ساعتها هتخاف من الفشل والنجاح.. لو فشلت هتخسر روحك ولو نجحت هتخسر مجتمعك اللي مش هيفهمك وهيشوفك مجنون أو مهرطق وكافر لأنك خرجت عن نواميسه.. وللأسف مش هيعرف ريادتك ونجاحك غير بعد كام ألف سنة. متخافش من نفسك.. بص أعمل rewind وpause صغيرة من الدنيا كلها.. اخطف نفسك وابدأ تتعرف عليها.. ودايماً افتكر اللي قالته ماريان ويليمسون: «ليس اعمق خوفنا هو أننا ناقصون، وإنما هو أننا أقوياء بما يتعدي كل المقاييس».