مصر دوبت في ثلاث سنوات 3 رؤساء وخمس حكومات، غيرت فيهم وزراء أكتر ما بنتي الصغيرة غيرت بامبرز في هذا الشتاء البارد ، ومع ذلك لا أعرف على وجه اليقين، مصر ماشية ازاي؟ منذ اندلاع ما كان يسمى بثورة 25 يناير2011 وحتى الآن. قرأت وشاهدت وسمعت وجلست وتناقشت مع ألوان مختلفة من البشر. جلست إلى الإخوان الربعاوية، والفلول والسيساوية ، والنشطاء، والاشتراكيين الثوريين ، وبعض من المحسوبين على حزب الكنبة والإعلاميين والأمنجية ، بخلاف أصدقائي وصديقاتي الكيوت جداً اللي ملهموش في أي حاجة في المتسابة على رأي الفريق شفيق. تقريباً لم أترك أحداً إلا وطرحت عليه سؤالي ، ولو كنت وجدت الوقت لطرحته على ركاب الأطباق الطائرة الذين هبطوا من السماء على أرض الغردقة ، أو طرحته على الحمام الذي عاد إلى السماء وفي أقدامه بقايا ميكروفيلم التخابر والخيانة عن طريق العميلة السرية "أبلة فاهيتا".
قصر الكلام ، هذه حصيلة متفرقة من إجابات بعض المصريين عن سؤالي: مصر ماشية ازاي؟!
- ماشية ببركة دعاء الوالدين.
- ماشية بظهرها وعلى حل شعرها.
- ماشية بالبركة والقدرة ، دي مذكورة في القرآن يا عم قول باسط ، بلدنا عمرها ما هتقع، مصر تمرض ولا تموت.
- ماشية والسلام أنت مال أهلك.. تٌشكر يا ذوووووق!
- ماشية بقوة الدفع الذاتي.
- ماشية إيه يا عم الحاج، البلد حالها واقف، بالعربي مشلولة من يوم الهباب الثورة.
- ماشية ع الرصيف، وخايفة لحد يعاكسها أو يتحرش بيها أو يثبتها ويخطفها.
- ماشية مشوار لحد الستينيات وما أدراك ما الستينيات ومش راجعة.
- ماشية بتوفيق عكاشة والست لميس ومحمود سعد وأحمد موسى ومولانا عبرحيم علي، وهي بلدنا إيه غير شوية قنوات على شوية مذيعين ومذيعات، ومعاهم شوية فضايح وتسريبات فوق بعض!
- ماشية بنور عين السيسي.. حد ليه شوق في حاجة.
- ماشية بتجار الدم والدين وشيوخ الضلال الخوارج والمخطوفين ذهنياً.
- ماشية بالقمع والإرهاب والفوضى والتخريب والقتل والدم وتكميم الأفواه وقبضة الأمن الغليظة زي ما كانت ماشية ب قال الله وقال الرسول، واللي هيفتح بوءه بالجزمة.
- ماشية بأحمد زبايدر وآبلة فاهيتا والواد سوكة ، التطور الطبيعي للواد مرسي، اللي كان بيشد سكينة الكهرباء بعشرين جنيه أيام عمك مرسي؟!
- ماشية بالدين والشحاتة والتسول والقروض والمعونات ، من ريالات قطر والشيخة موزة تحديداً ، إلى دراهم الإمارات وملابسها المستعملة ، ووصولاً لمساعدات ونفحات السعودية والكويت والبحرين.
- ماشية بالزيت والسكر والرز الميري، مش بتاع الإخوان الإرهابيين ..تفرق يا مؤمن.
- ماشية بالدراع والصوت العالي والبلطجة وقلة الأدب.
- ماشية بتسلم الأيادي، وبقولك إيه ..احنا شعب وانتو شعب !
- ماشية بالضحك ع الدقون أو حبسها أو حرقها وحتى حلقها ..أحلق يا سيدي ، لو بطلنا نحلق نموت !
ماشية بالقاعدة بالساعات أمام الشاشات وبرامج التوك شوز المليئة بالمتمولين والمتلونين والمتحولين، عبيد المرشد ولاحسي البيادة ، من الخبراء الاستراتيجيين والمحللين السياسيين، والنشطاء وأعضاء الأحزاب والائتلافات والحركات والبركات.
- ماشية بالرغي واللوكلوك والهري طول الليل على الفيس بوك وتويتر.
- ماشية بفلوس سوزان مبارك وألاعيب رجالة أحمد عز وكل رجالة الحزن الوطني.
- ماشية ب 50% على الحركرك قضاة ومستشارين ووكلاء نيابة وضباط شرطة ، عشان اللي جايبين فوق 95 % بيعيدوا السنة أوبيحسنوا مجاميعهم في السجون!
- ماشية بقضاء شامخ على نفسه وريحته فايحة ولازم له تغيير فوري!
- ماشية ببركة سيف الدين قدس..أقصد كتس ..قصدي قطز، والغزو المغوري ، ونهر دلجا.. "سيف الدين قدس" لمن لا يعرفه ، هو القائد العظيم الذي انتصر على " لولاكو" ابن شاروخان في موقعة "حط الطين" ، لكن للأسف قتله بعد ذلك " المطاهر" بيبرس!
