يعني إيه مستقبل؟! بصراحة مش عارفة.. كل اللي أعرفه أن الكلمة دي بكل تفاصيلها في إيد ربنا، ودي حاجة مستحيل نقدر نغيرها، لكن اللي بإيدينا ونقدر نغيره فعلا، هو تصرفاتنا وطريقة تفكيرنا وحياتنا، ولما نقدر نعمل ده، ساعتها هنكون نجحنا إننا نغير حاضرنا وجزءاً من مستقبلنا.. يعني سلوكياتنا وتصرفاتنا اليومية، لو اتغيرت، معناها إن المستقبل هيتغير بشكل كبير، ويارب السنة الجديدة دي تكون هي بداية التغيير.. يعني أنا أتمني مثلا إن سلوكيات الشارع تتغير وتختفي العشوائية الموجودة في كل حياتنا ويظهر معدن الشعب المصري المتحضر بتاع السبعتلاف سنة بجد.. يعني اللي خبط عربية واحد تاني.. يعرف أن اعتذاره عن الخبطة ممكن يفرق قوي معاه في الوقت ده، مش هتبقي أقوي وأعظم إنسان لو ضربت اللي خبط عربيتك.. اللي بيتحرش ببنت أو بيعاكسها لمجرد إن لبسها مش عاجبه، لو فكر للحظة إن اللي بيعمله ده كارثة تانية، ومش دي الوسيلة اللي ينصحها بيها أبدا، وقتها ده هايغير حاجات كتير.. اللي بيحكم علي الناس من مظهرها وشكلها الخارجي لازم يعرف أن جوه كل إنسان مننا حاجة جميلة جدا مستخبية ورا لبسه ومظهره، بجد إحنا لازم نبطل حكاية محاكمة الناس علي كل تصرف عمال علي بطال، وأتمني كمان من كل الناس إنهم يخرجوا كل المشاعر اللي جواهم زي ما بيموتوا نفسهم علشان يطلعوا عيوب الناس، وكأن اللي يكتشف عيب جديد في حد هياخد جايزة.. أتمني أن الناس تستغل العقل اللي ربنا ميزنا بيه عن باقي الكائنات اللي خلقها علي الأرض في التفكير في كل اللي حوالينا وفهمه واستغلال كل نعم ربنا في تحسين حاضرنا ومستقبلنا.. وعندي حاجة مهمة بتمس أي فنان وبتوجعه وبتجرحه.. ياريت الناس تفصل بين أدوارنا كممثلين وشخصياتنا اللي بنقدمها علي الشاشة، لأن حياتنا كبشر عاديين حاجة وشغلنا وأدوارنا في الأفلام والمسلسلات حاجة مختلفة خالص.. الممثلة اللي بتعمل دور واحدة صايعة.. مش صايعة في الحقيقة، والممثل اللي بيقدم دور دكتور وقور، مش بالضرورة يكون كده في الحقيقة.. ممكن يكون أحسن من كده بكتير، وأكيد الممثل اللي بيتاجر في المخدرات في فيلم، مش بيشتغل تاجر مخدرات بعد الضهر.. افتكر إننا لو حاولنا نعمل الكلام ده في حياتنا هنلاقي شكل مختلف تماما للحاضر اللي بنعيشه وللمستقبل اللي إحنا خايفين منه ومن اللي جايبه لنا، ويارب يكفينا ويكفيكم شر المستخبي، ويخلي حياتنا أجمل بينا ولينا.
