مش قاعدين تقولوا نفسنا نشوف حاجة واحدة بس عملها مرسي تبل ريقنا .. وتخلينا نحس اننا بدأنا بجد عصر النهضة ، وبدا القطر يمشى لسكته اللي حتخلينا في مصاف الدول العظمى .. مش قاعدين تقولوا كل اللي وعد بيه مرسي متحققش منه ولا حاجة .. قال لنا الحياة حتبقى ورد وحناكل الشهد ، قام قرر 3 ارغفة لكل واحد مننا في اليوم .. قال لنا دم الشهداء اللي ماتوا في الثورة في رقبتي .. قام هو بذات نفسه قتل له يجي 150 .. فتح صدره في ميدان التحرير عشان يورينا شجاعته ..أتاريه تحت القميص كان مخبي سيوف وخناجر .. قال لنا الأمن حيرجع تاني واحسن من الأول .. اتاريه كان يقصد ان الأمن حيرجع له هو ويحافظ على الكرسي بتاعه هو ، وملعون ابو الي خلفونا واحد واحد .. المهم ينام ويحط راسه على المخدة وهو مطمن ان وراه سفاحين يجزروا اى نفر يقرب منه او يقلق منام جنابه.
بس انتوا برضه مفترين ع الراجل جامد .. ونسيتوا انه رجع لنا الدوري تاني ، وادينا داخلين ع الأسبوع التاني منه .. فبلاش نشوف كل حاجة سودا .. واهي عودة الدوري تدّينا أمل في اللي جي ، ورحلة الألف ميل تبدا ب " شوطة " .. ولازم ناخد بالنا من تصريح عصام العريان .. الراجل ده على فكرة احنا فاهمينه غلط .. ده راجل طيب وبيحب مصر زي عينيه ، وفرحته باستعادة مصر لهيبتها بقدرتها على إعادة الدوري العام خلّت الدمعة ياحبة عين امه تفر من عينيه .. كان خايف ع البلد ان الشهر يفوت ورا الشهر ومفيش لعب كورة .. ولا أهلي ولا زمالك ولا شوبير ولا مدحت شلبي ، ولا البت بندقة " الكميلة " .. كان خايف اوي يموت من غير مايشوف بعينه المستطيل الأخضر ، واللعيبة بتجري فيه ، والجمهور فرحان وبيشجع مرسي مرسي والله زمان .. رجعت لنا الدوري تمام ".
.. شوفتوا احنا ظالمين العريان ازاى .. عشان كده قال لنا وبثقة المحبين لمصر.. العاشقين لترابها: الآن.. والآن فقط ..استطيع ان أقول لكم لقد بدأنا البداية الفعلية لعصر النهضة .. بعد ان - والحمد لله رب العالمين - استطاع الرئيس محمد مرسي بحنكته السياسية وإحساسه بهموم شعبه وناسه " مش عشيرته بس " ان يعيد الدوري العام مرة أخرى ، ليثبت أمام العالم كله ان مصر قادرة بأمر الله وحده على تجاوز كل المحن وإعادة الحياة لملاعب الكرة ، بعد توقف دام أكثر من عامين .. لقد عاد الدوري العام متجاوزا كل جراحه وآلامه ، مصمما على ان يعيد لمصر قوتها وهيبتها التي تكاد تكون قد تلاشت ، لولا ان عاد الدوري ، ليعود نيلها يجري ، وأهرامها تقف شامخة تحدّث التاريخ بفخر واعتزاز أن في مصر رئيسا أعاد لشعبها مسابقة هي الأهم عنده .. هى الماء والهواء .. هى البهجة والفرحة .. هى العلو والشموخ .. هى القيمة والقامة .. هى مسابقة الدوري العام ، فلتهنأ يا شعب مصر العظيم برئيسك الأعظم الذي وعدكم بعودة لعب الكورة وها هو قد صدق وعده. ... مش مفترض أبدا ان حد يضحك لمّا يقرا الكلام ده .. والله العظيم انا بكتب المقال وقلبي بيتقطع .. لا بهزر ولا بتمسخر .. بس حتجيني " نقطة " من تصريح العريان الغبي ، ان قرار عودة الدوري اثبت اننا تجاوزنا أوجاعنا ونستطيع الآن ان نبدا على نضافة. اختصر هذا الرجل الماسخ والمُسخة في نفس الوقت بلاوي سودا ورماها ورا ضهره ، ومتصور المتخلف عقليا اننا فعلا بعودة الدوري العام قد بدأنا المشوار الحقيقي لمشروع النهضة .. بتاعت سي مرسي!.
نزعل ليه بقى على كريستي وعمرو سعد ومحمد الجندي اللي ماتوا في يومين .. مادام الدوري رجع تاني .. والست المحروقة اللي كانت في جنازة الجندي وبتضرب نفسها بالجزمة انها انتخبت مرسي .. محدش لحقها ليه قبل ما تبهدل نفسها بالشكل ده ، وقال لها افرحي ياحاجة .. ربنا عوّضك عن اللي مات ، والدوري رجع تاني .. عشان تعرفي انك مغلطيش لمّا اخترت مرسي .. وام الشهيد عمرو اللي قاعدة تصوّت .. هاتولي ابني .. حبة عيني من جوه .. عمل لكم ايه عشان تقتلوه .. محدش لحقها ليه قبل ما تحزن على ابنها وضناها وقال لها : مرسي قتل ابنك صحيح .. بس أحيا الدوري تاني .. مش يمكن كانت سكتت وحست زي العريان اننا بدأنا فعلا اولى خطوات النهضة .. ودم ابنها مرحش هدر؟!
ولا الراجل المسحول اللي اسمه حمادة اللي بكّاني وبكّى مصر كلها وهو بيقول لوائل الإبراشي ودموعه تسيل .. " ابوس ايديكم عشان خاطر ربنا ، بلاش تذيعوا تاني الفيديو اللي اتعريت فيه واتمسح بكرامتي الأرض .. اعتبروني أخوكم .. أبوكم .. ابنكم .. متبهدلوش كرامتي اكتر من كده" .. مش عارف فاتت على الإبراشي ازاى انه يمسح دموع الراجل ويمسح من ذاكرته إلى الابد شريط السحل ويقول له : بس ربك كبير يا حمادة .. مرسي رجّع الدوري تاني!
الدكتورة منال عمر واحدة من ستات مصر العظام اللي بجد بمليون راجل ، وهى بتحاول تحلل نفسيا كلام حمادة لمّا أنكر اتهامه للشرطة وهى تبكي ضعفه وكسرة نفسه .. فيعلّق ضيف معها في برنامج " منى الشاذلي " : بس الشرطة اتأسفت له .. فتقول بانفعال غير مسبوق : اوكيه .. انا حنزل دلوقتي يا منى .. وخلّي 20 عسكري وضابط يقلّعوني هدومي ، واظهر عريانة قصاد العالم كله .. وبعدين يطلع وزير الداخلية يقول لي احنا اسفين يا ست منال .. يبقى كده خلصت .. ارد واقوله كتر خير جنابك انك تنازلت واتأسفت عن فعل وسخ امرت رجالتك يعملوه؟! .. عذر الدكتورة منال الوحيد في انفعالها الزائد والدموع المتحجرة في عينيها ، أنها لم تكن تعلم ان مرسي رجّع الدوري تاني!! .
... شوف يا مرسي .. انت فتحت باب جهنم .. امبارح .. واحد صاحب الشهيد محمد الجندي قال بالحرف الواحد : " اذا مرسي مجبش حق صاحبي .. حاروح لحد بيته .. وحاقتل ابنه " .. العيار فلت يا مرسي .. وخالتي " سلمية " ماتت برصاص داخليتك .. وانت اللي بدأت .. والبادي أظلم.
