أهلا بكل بنات "قمر 14" في حلقة جديدة، واللي هنكمل فيها كلامنا مع خبيرة الكيراتين بسمة الحسيني، علشان تعرّفنا معلومات كتير عن منتجات الكيراتين والخطوات الصحيحة لعمله، وكمان إزاي نحافظ على الشعر بعد كده.. اختاري نوع الكيراتين المناسب لشعرك بنات كتير ماتعرفش إن طبيعة شعرها بتتحكم في نوع الكيراتين اللي هتستخدمه، علشان كده لازم قبل ما تاخدي قرار إنك تعملي كيراتين تعرفي كل حاجة عن أنواعه المختلفة. لكن قبل ما نتكلم عن الأنواع المختلفة لازم تكوني واثقة إن الكيراتين اللي بتستخدميه أصلي، وده بإنك تشتريه من شركة موثوق فيها ولها اسم، مش أي منتج للكيراتين وخلاص، علشان ممكن نسبة الفورمالين فيه تكون عالية، ودي هي المادة اللي بتؤذي الشعر.
وزي ما قلنا فيه أنواع مختلفة من الكيراتين اللي بتناسب أنواع الشعر المختلفة، ومنها: كيراتين الكولاجين: وده كيراتين مضاف عليه مادة الكولاجين، وبتكون نتيجته هايلة وبتنعم الشعر، ودي طبعا أهم حاجة عند معظم البنات إنها تحصل على شعر ناعم، وده بيكون مناسب للشعر الخفيف والخشن والشعر اللي بيكون فيه تشابك عند الأطراف. كيراتين ماء الذهب: الذهب له فوائد كتيرة للبشرة والجسم والشعر، والنوع ده من الكيراتين بيفيد الشعر في إنه بيضفي عليه لمعان طبيعي وشكل صحي، لكن النوع ده مش كتير من الشركات بتعمله. كيراتين الصلصال الأبيض: النوع ده مفيد جدا في فرد الشعر، لأنه بيبقى مضاف عليه كمان نسبة فورمالين بسيطة جدا، وبيعمل نتيجة فرد بتوصل إلى 80%، علشان كده النوع ده مناسب للشعر المجعّد. كيراتين الأورجانك: كيراتين مضاف إليه مجموعة من الأحماض الأمينية، وبيكون آمن جدا لدرجة إنه بيُستخدم على شعر الأطفال والحوامل، وكمان مفيد في فرد التمويجات البسيطة للشعر الناعم. كيراتين الكاكاو: الكيراتين المضاف عليه زيت الكاكاو، وده بيفيد في علاج الشعر الهايش والمقصّف. أهم حاجة إننا نكون عارفين إن كل نوع كيراتين له طريقة استخدام مختلفة، كمان المادة اللي بيتغسل بها الشعر قبل عمل الكيراتين بتختلف حسب طبيعة الشعر، يعني فيه مواد مثلا مش بتكون مناسبة مع الشعر المصبوغ أو اللي معمول فرد كتير. كمان فيه أنواع من الكيراتين بتبقى محتاجة تجفيف للشعر بالسيشوار قبلها، وفيه أنوع تانية مش بتكون محتاجة سيشوار.
إضغط لمشاهدة الفيديو: أسعار الكيراتين الكيراتين يُعتبر خدمة وليس منتج للبيع، لأننا بنروح للكوافير علشان نعمله، وده معناه إننا بندفع الفلوس مقابل الكيراتين والخدمة. عموما زجاجة الكيراتين اللي ممكن تكفي لأكثر من شخص سعرها بيتراوح من 2000 : 5000 جنيه، علشان كده أنا بافضّل إننا نبعد عن أي مكان بيعمل الكيراتين بأسعار قليلة، 300 و400 جنيه، لأن ده هيبقى كيراتين لبناني وكمان هتحصلي على خدمة سيئة للشعر. كمان الأسعار المُبالغ فيها زي 3000 و4000 دي أنا باعتبرها غالية أوي، خصوصا إن تأثير الكيراتين مش بيكون دائم على الشعر، ومدته بتتراوح من 2 : 6 شهور. إزاي تحافظي على شعرك بعد ما تعملي الكيراتين؟ الكلور والأملاح هما أكتر حاجات ممكن تؤثر على شعرك، وخصوصا لو عاملاه بالكيراتين، وللأسف الكلور بيبقى موجود في المياه الطبيعية، علشان كده لازم نغسل شعرنا بحد أقصى مرتين في الأسبوع، كمان الأملاح بتبقى موجودة في منتجات العناية بالشعر، علشان كده لازم نتأكد إن المنتج اللي هتشتريه سواء الشامبو أو البلسم يكون خالي من الأملاح، ويفضّل إنه يكون فيه نسبة كيراتين. في النهاية لازم نعرف إن نجاح عملية علاج الشعر بالكيراتين بتعتمد على عدة خطوات، لو خطوة منهم اتعملت غلط بتكون النتيجة مش مُرضية، بداية من نوع الكيراتين الجيد وحتى طريقة العمل، ونهاية بالحفاظ على الشعر والتعامل معاه بشكل صحي. إضغط لمشاهدة الفيديو: لحد هنا خلصت حلقتنا النهارده.. استنونا الحلقة الجاية علشان نكمل كلامنا عن الكيراتين،،،