مساء الخير لأحلي "بص وطل" وأحلى "قمر 14"، بما إن ملاذي الوحيد هو "بص وطل"، وبما انكم اتحتم لنا الفرصه احب اشارك معاكم بس يارب ماتزهقوش مني.. النهارده هاقدم لكم طريقة عمل المسقعة.. المقادير كيلو باذنجان مكبب. نصف كيلو لحمة مفرومة. 3صلصة طماطم. ملح و بهارات و فلفل اسود ونعناع. عدد 2 بصلة متوسطة الحجم. حبة بطاطس. 4 فلفل رومي. زيت للقلي. الطريقة 1- نغسل الباذنجان ونقطعه ونرش عليه ملح خفيف. 2- نغسل الفلفل ونقطعه لقطع صغيرة، ونقشر البطاطس ونقطعها صوابع صغيرة. 3- لتحضير العصاج بنقطع البصل صغير ونشوحه على النار في سمن أو زيت وبعد ما البصل يحمر شويه نحط اللحمة المفرومة والبهارات والملح ونسيبها لغاية ما تتعصج. 4- نقلي الباذنجان والفلفل والبطاطس. 5- نجهز صينية ونضع نصف الباذنجان والفلفل والبطاطس ونضع العصاج، وبعدين نكمل رص باقي الباذنجان ونضع فوقه صلصة الطماطم (وهي عبارة عن بصلة متوسطة الحجم نقوم بتحميرها حتي تصبح ذهبية اللون ونضع فوقها عصير الطماطم حتي تصبح غليظة القوام ويضاف اليها الملح والبهارات). 6- بعد كده نضيف ملعقة سمن علي وش الصينية وندخلها الفرن حتي يكتمل النضج. وبألف هنا وشفا.. وسلام يا أحلى بص وطل. وفي النهاية نحب نشكر "نانسي" الصديقة العزيزة جداً ل"بص وطل" على الوصفة الجميلة دي.. ونتمنى إنكم تجرّبوا الوصفة وتعجبكم.. وتبعتوا تقولوا لنا رأيكم إيه.. ولسه مستنيين وصفاتكم الجامدة جداً.. ياريت تبعتوها على لينك..