أنا عندي 21 سنة، مخطوبة لشاب من محافظة تانية غير محافظتي؛ بس ده مش فارق مع حد غير أمي؛ لكن بابا وأنا موافقين. ارتباطنا كان من حب حوالي 4 سنين وهو شاب ذكي وبيحبني جداً، بيننا تفاهم وصراحة لحد كبير جداً. المشكلة إني كل لما باقرب منه وأعرفه أكتر باكتشف حاجات فيه بتضايقني؛ زي إنه بيشرب سجائر، ومش متدين قوي؛ آي نعم يبصوم وبيصلي وعلاقته بربنا إلى حد ما كويسه؛ بس مش هي دي درجة التدين اللي أنا عايزاها، أنا بحبه ومتأكدة من حبه ليّ؛ بس أنا كمان في حياتي وقعات ومحتاجة حد يقويني ويقربني من ربنا أكتر، وهو مش كده؛ بيهزر كتير وواخد الدنيا بسهولة، من تربيته اتعود على الاعتماد على الآخرين، ومن يوم ما اتخطبنا بدء شوية يشيل مسئولية. اللي مصبرني حبنا وعلاقتنا القوية وإنه أحياناً بيسمع كلامي لأن -والحمد لله- بيننا حوار؛ لكن كل ده عندي صغير قدام إنه يكون مثلاً مش منتظم في الصلاة لأني متدينة وباحاول أتدين أكتر، كمان والدتي لأنها مش حابة حكاية جوازي في محافظة تانية بتزن على إنه مش مناسب، وعادتنا مختلفه جداً، وده مش مريّحني، وحاططني في مشاكل جامدة مع أهلي زي موضع سِلْوِنا وسِلْوهم في المناسبات وكده؛ فعايزة حد يرشدني. خايفة أكون غلطانة في حكمي مش عارفة أتصرف إزاي ...أرجو النصيحة لأني بجد بدأت أشك في حكم عقلي. kin