أوقات كتيرة ما باطيقش نفسي بابقى عايز أروح لدكتور نفسي. مش طايق أقعد في البيت.. على طوووول بره ما بارجعش البيت على طول كل يوم إلا الساعة 2 بالليل وطبعا في البيت بيزعلوا مني علشان باسهر بره كتير، وما باستحملش منهم كل ده. اليوم اللي أنا زعلت من نفسي أوي في يوم عليت صوتي على أمي وأبويا واتنرفزت عليهم علشان حاجة ما تستاهلش.. حاجات كتير بتشغل بالي، أنا طالب بالفرقة تانية هندسة وبحب واحدة زميلتي من أيام ثانوي وباخاف أوي لتضيع مني علشان أنا هاخلّص تعليم قبلها بسنة، ويا سلام بقى لو دخلت جيش هاتاخر كمان 3 سنين ولما أكون نفسي، شقة وكده، يعني هاكون بقى عندي كام سنة ويا ترى هتكون لسه موجودة ولا اتخطبت ولا اتجوزت، أنا مش متخيل إنها تتجوز واحد تاني، أنا مش عارف أنا هيكون شعوري إيه وقتها. أنا معايا رقم تليفونها المحمول وكل ما آجي أكلمها أتردد أقول أكوّن نفسي الأول، وبعد كده أتقدم بقلب شجاع، هاكون باشمهندس بقى ماحدش هيرفضني، وأوقات أنا علشان بحبها مش راضي لها نفسي علشان أوقات كتير ما باطيقش نفسي......... قولوا لي أعمل إيه؟ وشكرا محمد