أنا بجد باشكر فريق "بص وطل"، وبجد ده الموقع المفضل عندي وبحبه جدا، مشكلتي يا جماعة إني زهقت أوي أوي من حياتي واتخنقت ومش عارفة أعمل إيه.. أنا مخطوبة وعندي 21 سنة وخطيبي 28 سنة ومكتوب كتابي وبحب خطيبي جدااااا وهو كمان بيحبني جدااا.. المشكلة إن هو مش بيحبني أخرج خالص وأنا باسمع كلامه عشان بحبه بس أنا خلاص ماعدتش قادرة، ولما يحصل بيننا مشاكل بتبقى بسبب الموضوع ده، وكتير من أصحابي يقولوا لي ده بيشكّ فيكي، فأنا بارجع وأقول له إنت بتشكّ فيّ؟ يقول لي لو كنت باشك فيكي ما كنتش خطبتك ومش بيرضى يخرجني إلا لازم أكون مع ماما، غير كده لا.. ومش ينفع أخرج يومين ورا بعض، لازم يوم واحد بس في الأسبوع ده لو خرجته كمان.. ده كمان لما بنخرج مع بعض مش بينزلني من العربية ولما يروح فرح مش بياخدني معاه، بيقول لي مش بحب حد يشوفك على العلم أنا مش حلوة للدرجة أنا مقبولة والحمد لله ما أعرفش ليه كده، أنا بجد مش عارفة أعمل إيه، وأنا حاسة إني وصّلته لكدا عشان باسمع كلامه فعشان خاطري ردوا عليّ وقولوا لي أعمل إيه عشان أستريح.. واحدة حيرانة