[تعبت من الخناق وكل محاولاتي خلصت معاه] تعبت من الخناق وكل محاولاتي خلصت معاه السلام عليكم أنا بعتّ لكم كذا مرة، وطبعا رديتم بس مافيش حد حياته بتخلى من المشاكل، بس الحمد لله.. المهم مش عايزة أطوّل عليكم؛ أنا مرتبطة بواحد بقالي أربع سنين ونص؛ هي دماغه قديمة شوية؛ لما حبيته كان عندي 17 سنة وكنت لسه صغيرة وعبيطة.
حاجات كتير كانت بتضايقني منه بس كنت باعدّي ومش باقول له علشان خايفة نتخانق، لما سنّي كبر شوية وبقيت بافهم وأفكر لقيته خلاص خد على البنت بتاعة زمان اللي بتسمع وبتقول حاضر وبس؛ بدأت أعترض وأتناقش هو مستغرب إني اتغيرت.
مش دي المشكلة الكبيرة؛ مشكلتي الأساسية إنه عنيد وقلبه قاسي عليّ شوية أو مش قاسي مش طيب وحنين زيي، وأكتر عيوبه إنه لما بيغلط بيحاول يجيب أي مبرر عشان ما يطلّعش نفسه غلط ويجيبها عليّ وأنا مش باعرف أتناقش معاه كتير؛ لأنه مُتعب والحاجة اللي بتضايقه ما يحبّنيش أعملها لكن هو يعملها عادي زي أي كلمة ممكن تتقال أو أي فعل.
أنا تعبت وكل محاولاتي خلصت معاه، أنا وهو اتخطبنا بقالنا أقل من شهر وفي خناق مستمر، أنا مش باعرف أحسسه بغلطه وحنينة عليه جدا، إحنا متخانقين بقالنا أسبوع رجعنا واتكلمنا عشان نتعاتب اختلفنا في الآراء، واتخانقنا جامد وقلت له عايزة أفسخ خطوبتي، قال لي إن شاء الله وماتكلمناش تاني مش عارفة أتعامل معاه إزاي؟
أختي وماما قالوا لي هو عاقل ورزين زيادة وإنتي مش ثابتة، حاولي تتقلي شوية وابعدي وخليه هو اللي يجري وراكي، لكن أنا غبية مش باعرف أعمل كده، بعد ما اتخانقنا تاني مرة أختي قالت لي امنعي نفسك عنه لحد ما تاخدي إنك تعيشي من غيره، وبعدها افسخي الخطوبة، أنا وهو بنحبّ بعض جدا وبنستحمل بعض بس الجانب السيئ اللي فيه تاعبني.
أعمل إيه معاه؟ تفتكروا أبعد وكفاية كده ولا أعمل إيه؟ وآسفة على الرغي الكتييييييير ده.
