أنا مخطوبة من فترة لشخص بيحبني جدا، بس المشكلة إن أنا عاوزة أتأكد من حبه لي، فأحبيت أعمل اختبار بسيط بدأت أرن له وأبعت له رسايل من رقم تاني ما يعرفهوش بس اكتشفت إنه بدأ يرن على الرقم ده ويرسل رسايل ويكتب كلام حلو جدا"، ونفسه يتعرف على صاحب الرقم ده، سؤالي: أعمل إيه علشان أتأكد من حبه ليّ. tota الحل: صديقتنا العزيزة أنا مقدرة جدا اللي أنت فيه خصوصا وأن الاختبار اللي عملتيه لخطيبك فشل فيه بجدارة. بس أكيد أنت عملت الاختبار ده؛ لأن كان فيه شواهد على إنه مش مخلص مية في المية. طيب ليه ما اتكلمتيش معاه بصراحة بدل الاختبار ده. عموما لا يفيد الآن البكاء على ما فات.. لو أنت حاسة إن اللي حصل ده نزوة وتعدي يبقى خلاص ولو عاوزاه يتوب خالص المرة الجاية اللي يرن على النمرة دي افتحي عليه وكلميه وقولي له إن دي نمرتك الجديدة، وإنك كنت بتشوفي رد فعله وإنك متضايقة من تجاوبه معاك. لكن لو أنت حاسة إنه فعلا طبع فيه فده يتوقف عليكِ هل تتقبلي طبعه كده ولا لأ. وهو إيه مفهوم الحب عنده؟ هل هو كلام بس بيقوله ولا أفعال بيعملها وأول الأفعال دي مفروض يكون الإخلاص لك والمحافظة على مشاعرك وأحاسيسك، وده اللي هو ما عملوش. اللي عمله ممكن كتير من الشباب يكون بيعمله، وهو إنه لو لقي واحدة تشاغله حتى لو مرتبط ممكن يتجاوب معاها، لكن السؤال هل هو ده اللي أنت عاوزاه.. القرار قرارك بس خلي بالك إنك لو قررت الاستمرار فهيكون فيه شك دائم فيه في كل حركة وكل لفتة ونظرة ومكالمة تليفون، فهل أنت مستعدة لده وقادرة عليه؟ ده اختيارك إنت وربنا معاك.
