مشكلتي إني خلاص بدأت ييجي لي اكتئاب من خطيبتي، والمشكلة إني حاسس إن العيب فيّ أنا أصلا. إحنا ارتباطنا وكان عن حب، وبحبها جدا وباغير عليها جدا، وهي دي أسباب المشكلة.. فأي حاجة بتحصل منها مهما كانت صغيرة بتحرق لي دمي جدا؛ سواء كلامها مع حد أو لبسها، والمشكلة إنه بيكون كلام خفيف جدا ونادر أصلا، أو حتى كمان كومنت على الفيسبوك على بيدج؛ لأنها ماعندهاش أولاد على بروفايلها.
هي محترمة جدا.. بس اللبس مشكلة عاملة لي أزمة كبيرة جدا كمان، مش عارف ساعات باحس إني تافه، أو باحس إنها رخمة؛ لأنها ساعات بتعمل حاجات مخصوص عند فيّ.
بس هي ساعات بيبقى ليها سقطات غريبة أصلا، المشكلة إني باجي عليها جدا ومابقيتش باعرف أقولها حتى كلمة حلوة، وبنتخانق مع بعض؛ لدرجة إننا ساعات مابنبقاش طايقين بعض.
أنا بادور وراها كتير جدا، وممكن أقعد بالساعات أشوف هي عملت إيه، وكلمت مين، وإزاي.. ولو راحت في أي مكان من غير ما تقول لي، دي مشكلة المشكلات بالنسبة ليّ؛ بس ده لأني بحبها، ومش عايزها تغلط خالص.