أعده للنشر: مها مصطفى أهلا بكل بنات "قمر 14" في حلقة جديدة من حلقات "جمالك من الطبيعة مع رانيا"، وحلقتنا النهارده هنستخدم فيها حاجة جديدة؛ وهي مكعبات الشمع علشان نعمل بها كريم لكل الناس اللي بيشتكوا من خشونة الإيدين والكعبين في فصل الشتاء... وهنبدأ حلقتنا النهارده بالكلام عن زيت اللوز المر اللي سألتوني كتير عنه الفترة اللي فاتت، وهنعرف فوايده الكتيرة للبشرة. زيت اللوز المر لبشرة من غير تجاعيد زيت اللوز المر بيكون لونه أصفر غامق أو فاتح شوية، وبتبقى ريحته فيها مرارة شوية، وسعره غالي نسبيا. الزيت ده مهم جدا لنضارة وتفتيح وترطيب البشرة، وممكن نستخدمه على بشره الوش والجسم، وهو بيعمل على تفتيح لون البقع الخفيفة، وبيُستخدم في شد تجاعيد البشرة البسيطة أو التجاعيد من الدرجة التانية؛ وعلشان نحصل على فايدته ممكن نستخدمه مرتين يوميا لمدة أسبوع.
ماسك لتفتيح البشرة بزيت اللوز المر المقادير: * ملعقة كبيرة زيت لوز مر * 1⁄4 ملعقة كبيرة زيت جنين القمح الطريقة: هنخلط المقادير مع بعضها، ونحتفظ بها في عبوة زجاجية لونها غامق علشان الزيت مايتأكسدش. الماسك ده ممكن نستخدمه لتفتيح البشرة وعلشان نرجع لها النضارة الحيوية، ولكن لفئة عمرية فوق ال30 سنة. أما بالنسبة للبنات اللي سنهم أصغر من كده؛ يعني من 18 إلى 25 سنة، ممكن تستخدم زيت اللوز المر لوحده على الوش كله فوق وتحت العين ولكن بكميات قليلة. لو كان سنك صغير وحاسة إن بشرتك باهتة ومافيهاش نضارة يبقى ممكن تستخدمي خليط زيت اللوز المر مع زيت جنين القمح، لكن ماتطوليش في استخدامه عن 3 شهور؛ لأن البشرة الصغيرة مش بتحتاج لزيت جنين القمح. ومع المواظبة على استخدام زيت اللوز المر يوميا هتحصلي على بشرة فاتحة ومتألقة، وكل ما تقدّمتي في العمر، ممكن تزوّدي نسبة زيت جنين القمح أو زيت الجوجوبا.
إضغط لمشاهدة الفيديو: كريم الشمع لنعومة الإيدين والقدمين المقادير: * مكعب شمع (هتلاقيه عند العطار) * ملعقة كبيرة زيت زيتون الطريقة: - ابشري مكعب الشمع، لغاية ما تحصلي على كمية تقريبا تساوي 3 ملاعق صغيرة، وحطّي الكمية دي على نار هادية. - ارفعي الشمع من على النار أول ما يسيح، وضيفي عليه زيت الزيتون أو زيت جوز الهند، وقلّبيهم كويس مع بعض، وصبّيهم في برطمان زجاجي وسيبيه ينشف شوية. - لو سنك فوق 45، ممكن تضيفي خليط من زيت جنين القمح وزيت الجوجوبا وزيت الزيتون وزيت جوز الهند. - استخدمي الكريم ده وهو دافي، وافرديه على إيديكي أو على كعب القدم، وسيبيه شوية، وبعد كده اشطفي بشرتك من غير صابون، واستخدمي أي كريم مرطب. الماسك ده بيدّي نضارة ونعومة، وممكن تستخدميه مرة أو مرتين في الأسبوع أو كل 10 أيام. ودلوقتي هجاوب على بعض الأسئلة اللي وصلت لنا من أصدقاء "قمر 14"...
هو ممكن أستخدم زيت اللوز الحلو المخصص للأطفال والمتواجد في الصيدليات؟ زيت اللوز الحلو فيه منه 3 أنواع؛ أول نوع بيكون مخلوط بأنواع زيوت تانية، وده أنا ما بانصحش به خالص، والنوع التاني وده اللي أنا باستخدمه دايما في ماسكات للبشرة والشعر وللأطفال كمان، وده بنشتريه من عند العطار وبيكون لونه أصفر فاتح، أما زيت اللوز المر فهو مخصص للبشرة فقط. ولو بتسألي عن استخدام زيت اللوز الحلو لشعر الأطفال؛ فإنتي ممكن تستخدمي نقطة من زيت اللوز بعد ما تستخدمي الشامبو المخصص للأطفال. إزاي بنستخدم حمام الزيت الثلاثي للشعر؟ حمام الزيت الثلاثي عبارة عن خليط من زيت التوم وزيت الجرجير وزيت جوز الهند، وبنستخدمه على الجذور فقط، وأي حاجة فيها توم أو بصل أو زنجبيل أو قرفة بنوزّعها على جذور الشعر بس. سؤالي بخصوص ماسك الرز وحبة البركة للتفتيح، هل ممكن نسيبه على بشرة الوجه لأكتر من ساعة ونصف؟ الماسك ده خشن شوية على البشرة؛ علشان كده يفضّل إننا نسيبه على البشرة من 45 : 60 دقيقة مش أكتر من كده.
إضغط لمشاهدة الفيديو:
وبكده تكون خلصت حلقتنا النهارده.. استنونا الحلقة الجاية مع مفاجآت وماسكات أكتر.. سلام،،،
