أنا عندي مشكلة بجد تعباني نفسيا أوي؛ أنا بنت عندي 20 سنة، مخطوبة من شهرين لواحد عنده 29 سنة، هو شايف إنه أحلى مني؛ علشان عينيه ملونة وكده، وأنا بنت عادية والحمد لله حلوة؛ بس هو دايما بيحسسني إني مش حلوة قدامه، وبيقول لي إن زمايله بيقولوا له "إنك أحلى منها". وكمان هو قال لمامته تقول لي أحط مكياج، مع العلم إنه أول يوم شافني ماكنتش حاطة حاجة؛ عشان يشوفني على طبيعتي، وآخر مرة شافني حاطة مكياج قال لي: "قومي اغسلي وشك إيه القرف ده؟!"، وأنا في وشي حب الشباب بس بسيط جداااا برضه بيقول لي هي الحاجات دي مش هتروح، ويقعد يتريق عليّ قدام إخواتي وأنا باتحرج. مع العلم إني فاضل سنة واتخرج وأبقى مهندسة، وهو بيشتغل كاشير في محل بيتزا، بس هو خريج كلية آداب، وكمان لما بيكلمني وأقول له إن بابا مش في البيت بيقول لي لفظ مش كويس على بابا. عايزة أعرف اعمل إيه؟؟ ويا ترى أسيبه ولا أكمل معاه؟؟ بس أنا بجد زهقت منه؛ عشان شايف نفسه عليّ. nour