السلام عليكم ورحمة الله وبركاته.. أنا بحب الموقع ده أوي، وبجد دايما بابعت أي مشكلة بتقابلني، وبالاقي الحل الصح هنا دايما، ويا ريت ألاقيه المرة دي. أنا بحب واحدة وكنا مرتبطين ومتفقين على الخطوبة، أنا في أولى جامعة وهي كمان، إحنا بقالنا أربع سنين مع بعض؛ بس حصل مشكلة بيننا من حوالي ثلاثة أشهر وسبنا بعض، وأنا فضلت تعبان أوي، وعايز أكلمها بس كرامتي مش جايباني، فحبيت أعمل فيها أي حاجة؛ علشان أنا كنت متضايق منها علشان هي عايشة حياتها وعادي، وأنا اللي تعبان ومتضايق؛ فكلمت باباها من موبايل تاني غير بتاعي، وقلت له اسم تاني غير اسمي، وقلت له إن بنتك بتكلم ناس وكده وكانت مرتبطة. هو طبعا عمل مشكلات كبيرة عندهم، وهي كلمتني وعرفت إن أنا اللي عملت كده؛ ففضلت تعاتبني وتقول لي إنها كانت بتفكر فيّ بس مش عارفة أنا عملت كده ليه وإزاي؟!! فصعبت علي هي ومامتها من اللي حصل فيهم، وفضلت تكلمني كل يوم لمدة 5 أيام، وتسألني أنا ناوي على إيه أو عايز منها إيه؛ علشان ماكلمش باباها تاني، وأنا ماكنتش عارف أقول إيه.. أنا ماكنتش عايز أعمل فيها حاجة؛ لأني بحبها لكن ساعتها ماكنتش قادر أقول لها إني عملت كده علشان عايزها. فبعد خمس أيام وكانت آخر مكالمة بيننا قالت لي: "أنا خلاص سلمت أمري لله.. واعمل اللي أنت عايزه، وربنا اللي هيحاسبك مش أنا"، وقفلت وماتكلمتش تاني بقالها فترة، وأنا مش عارف أعمل إيه؟!! أكلمها ولا أكلم أبوها تاني، وأقول له على حاجة تانية!! ما هو أنا دلوقتي في نفس الوضع ومش عارف أعمل إيه؟؟ وناس قالت لي ما دام بتحبها أوي كده كلم باباها واخطبها منه وتبقى كده حليت الموضوع، والفكرة دي عجبتني فعلا؛ بس أنا متردد مش عارف إيه اللي ممكن يحصل بعد الموقف ده منها أو من مامتها اللي ماكنتش طايقاني بعد اللي حصل. فأنا عايز الحل منكم، وعايز أعرف أهم حاجة أكلمه ولا لأ؟؟ ولو لأ.. إيه الحل في اللي أنا فيه ده، أنا بحبها وعايز أبقى معاها بأي طريقة، وفي نفس الوقت أكون محافظ على كرامتي معاها؛ يعني ماكلمهاش أنا ولا أقول لها ارجعي لي وكده. أنا منتظر الرد في أقرب وقت. manlook