أنا عندي مشكلة محتاجة أسمع ردكم بجد فيها، أنا اتخطبت الحمد لله واشتغلت، ولما اشتغلت ابتدت المشاكل بيني وبين خطيبي، هو بيخاف عليّ أوي وبيقعد كل شوية يتصل بيّ. وعشان أنا اتجنب أي مشاكل تحصل لي في الشغل اقترحت عليه إنه يشتغل معايا، وفعلا طلبت كده من المدير ووافق واشتغلنا لمدة شهر مع بعض.. بعد الشهر ده المدير ما اتبسطش منه وقفل حسابه وهو عايزني أنا كمان أمشي من الشغل؛ علشان هو سابه وأنا بحب شغلي جدا رغم إنه هو لما هيمشي هيرجع شغله اللي بيحبه واللي قريب من بيته. أنا موقفي وحش جدا ومش عارفة أعمل إيه، وهو بيتهمني إني حبيت الكام ملطوش آخر الشهر وفضّلتهم عنه، وإني رخيصة وبحب الفلوس، مع إني مش كده خالص، أنا بحبه أوي وفي نفس الوقت نفسي أشتغل وأحقق ذاتي. مش قادرة أوصف لكم لحظة وهو بيمشي كانت صعبة عليّ أوي، وكمان وهو بيقول للمدير إنه يقفل حسابي أنا كمان؛ لأنه مش عايزني أشتغل، حصلت فضايح كتيرة أوي في اللحظة دي. أرجوكم قولوا لي أسيب شغلي زي ما هو عايز ولا أكمل ولا أعمل إيه؟ أرجوكم ردوا عليّ في أقرب وقت محتاجة أسمع رأيكم لأني باثق فيه جدا. t7rmny.leh.mnak