كل سنة وأنتم طيبين.. بكره هنستقبل أول أيام عيد الأضحى المبارك، وعلشان تبقي مستعدة هنقدّم لك على "سفرة دايمة" طريقة الفتة بالصلصة والدقة، وكمان صينية الرقاق باللحمة المفرومة. فتة بالصلصة والدقة مقادير الفتة: كيلو ونص لحمة ضاني أو بتلو 2 كوب رز 6 أكواب ماء بصلة متوسطة الحجم 4 حبات قرنفل صحيح 3 ملاعق كبيرة سمنة عيش محمص مكسّر 2 ورق لاورا ملح وفلفل لعمل الدقة: 6 ملاعق كبيرة زيت 6 فص ثوم مفروم 1/ 4 كوب خل 1/ 2 كوب شوربة لعمل الصلصة: 3 ملاعق كبيرة صلصة طماطم (معجون) 1/ 4 كوب خل كوب شوربة لحمة الطريقة: 1- اغسلي اللحمة كويس، وسخّني الميه في حلة على نار متوسّطة، وضيفي لها اللحمة والبصل والبهارات والفلفل الأسود. 2- بعد ما الميه تغلي قللي النار، وسيبي اللحمة على نار هادية لمدة 45 دقيقة؛ لغاية ما اللحمة تستوي تماما، مع مراعاة إزالة الريم من سطح الشوربة كل ما يظهر، وأول ما اللحمة تدخل في التسوية تبّليها بالملح. 3- حطّي السمنة في حلة على نار متوسطة، وحمّري فيها الرز لمدة 3 دقائق أو لغاية ما يتشرّب تماما بالسمنة، وبعد كده ضيفي كوبين ونصف ميه أو شوربة، وتبّليه بالملح، وسيبيه على النار لغاية ما يغلي، وبعد كده هدّي النار، وغطّي الحلة، وسيبيه على نار هادية لمدة 20 دقيقة أو لغاية ما تتأكّدي إنه استوى تماما. 4- بعد كده اعملي الدقة؛ بإنك تسخّني زيت في طاسة على نار متوسطة، وضيفي عليه الثوم المفروم، وقلّبيه لمدة دقيقتين أو لغاية لونه ما يبقى دهبي، وبعد كده شيلي نصف كمية الثوم دي على جنب، وضيفي الخل، وبعدين الشوربة، وتبّليها بملح وفلفل، وسيبيها لحد ما تغلي، وارفعيها من على النار. 5- علشان تعملي الصلصة حطّي نصف كمية الثوم اللي شلتيها من التقلية في طاسة على نار متوسطة، وبعد كده ضيفي عليه صلصة الطماطم والخل والشوربة، وتبّليها بملح وفلفل مع التقليب، وبعد ما الصلصة تغلي هدّي النار وسيبيها لمدة 10 دقائق علشان تتسبّك. 6- بعد كده حضّري طبق الفتة.. في الأول حطي العيش المحمّص، وبعد كده رشّي عليه كمية صغيرة من الدقة اللي عملتيها، وسيبيه لمدة دقيقتين؛ علشان العيش يتشرّب منها، وبعد كده حطي طبقة من الأرز فوق العيش، وصبي عليه كوب شوربة، وبعد كده وزّعي قطع اللحمة فوق الوش، وآخر حاجة هتعمليها إنك تصبّي صلصة الطماطم على حسب الكمية اللي إنتي عايزاها.. وبالهنا والشفا.
**************************
رقاق باللحمة المفرومة رقاق باللحمة المفرومة المقادير: 1/ 2 كيلو رقاق 1/ 2 كيلو لحمة مفرومة معصّجة شوربة لحمة ساخنة سمنة أو زبدة ملح وفلفل الطريقة: 1- ادهني الصينية بالسمنة أو الزبدة على حسب الرغبة، وبعد كده اسقي الرقاق بالشوربة علشان يطرى، وابدئي في رصّ نصف كمية الرقاق في الصينية. 2- بعد كده افردي كمية اللحمة المعصجة على الرقاق، وبعدين رصّي باقي كمية الرقاق بعد ما تسقيهم بالشوربة، وادهني سطح الرقاق بكمية بسيطة من السمن أو الزبدة. 3- دخّلي الصينية في فرن ساخن، وبعد شوية قللي درجة الحرارة عليه، وسيبيه لغاية ما الوش يحمرّ، وبعد كده طلّعيه من الفرن، وسيبيه يبرد شوية، وبعدين قطّعيه وقدّميه.. وبالهنا والشفا.
خلصت وصفتنا النهارده.. جرّبيها وتابعينا كل يوم مع وصفاتنا الجامدة من أكلات العيد الشهية.. سلام،،،
