وصفتنا النهارده هتكون عبارة عن رز بكرات الكفتة والكرنب، جرّبوها وابعتوا لنا رأيكم فيها، وماتنسوش تقولوا لنا كل الوصفات اللي عايزين تعرفوها. رز بكرات الكفتة والكرنب المقادير: * 3 أكواب رز بسمتي * 1/ 2 كيلو لحمة مفرومة * 3 فصوص ثوم مفروم * 1/ 3 كوب بقسماط * حبة كبيرة بصل * 3 أكواب ماء * 1/ 2 ملعقة صغيرة (كزبرة - كركم - حبهان مطحون - شطة - قرفة - زعفران) * 1/ 4 كوب دقيق * ملح وفلفل * بيضة
لعمل خليط الكرنب: * حبة كرنب صغيرة مفرومة * 1/ 2 كوب كزبرة مفرومة * 2 ملعقة كبيرة شبت مفروم * ملعقة صغيرة كركم * 2 حبة بصل مفروم * 2 ملعقة كبيرة زيت * ملعقة صغيرة كمون * 1/ 2 كوب زبدة * ملح وفلفل الطريقة: 1- اغسلي الرز كويس وانقعيه في ميه بملح لمدة ربع ساعة، وانقعي الزعفران في شوية ميه. 2- بعد كده جهّزي الكفتة؛ وده بإنك تخلطي اللحمة والبقسماط والبصل والثوم والبيضة والملح والفلفل والقرفة والكزبرة والكركم والحبهان والشطة، وتعجنيهم كويس أوي. 3- شكّلي الكفتة على شكل كرات صغيرة، وبعدين غطّيهم بطبقة خفيفة من الدقيق، واقليها في الزبدة عدة دقائق؛ لحد ما يبقى لونها دهبي، وبعدين ارفعيها. 4- في نفس الطاسة شوّحي البصل لحد ما يبقى لونه دهبي، وبعدين ضيفي الكرنب تدريجيا؛ علشان تعرفي تقلّبيه، وشوّحيه على النار لحد ما يدبل، وضيفي الكزبرة والشبت، وتبّليه بالملح والفلفل والكركم والكمون، وقلّبيهم كويس. 5- سخّني الميه في حلة، وضيفي عليها ملعقة كبيرة ملح وزيت وكركم، وسيبيها تغلي، وبعدين ضيفي عليها الرز، وسيبيه يغلي شوية لحد ما الرز يستوي نصف تسوية، وقبل ما يستوي تماما صفّيه من الميه. 6- اخلطي الزبدة ومية الزعفران، وحُطّي منهم شوية في حلة، وبعدين ضيفي عليهم طبقة من الرز، وبعدين طبقة من الكرنب وجزء من الكفتة، وعليها طبقة خفيفة من الرز، وبعدين طبقة الكرنب وباقي كمية الكفتة، وفي الآخر حُطّي باقي كمية الرز وباقي كمية خليط الزبدة والزعفران. 7- غطّي الحلة وسيبيها على نار عالية لمدة دقيقتين، وبعدين هدّي النار، وسيبيها لمدة 30 دقيقة لحد ما كل المكوّنات تستوي، حُطّي الرز في طبق التقديم.. وقدّميه بالهنا والشفا.
خلصت وصفتنا النهارده.. استنونا مع وصفات جديدة كل يوم.. سلام،،،