في البداية أشكر هذا الموقع الرائع والقائمين عليه، أنا حبيت أعرض مشكلتي على الموقع ده؛ لأني باثق جدا فيه. أنا عندي 22 سنة وارتبطت بشخص من 5 شهور تقريبا، وأهلي عارفين لأنه قابل زوج أختي واتكلم معاه إنه عايزني وإن الموضوع هيكون رسمي بعد ما ينزل من السفر في الصيف؛ لأنه ما كانش ينفع نعمل حاجة الصيف الماضي لضيق الوقت، المهم الشخص ده ما شاء الله مستواه المادي كويس جدا جدا بحكم إنه مسافر بلد أوروبي هو وعيلته بقى لهم 30سنة، أنا الأول ما كنتش موافقة لأني حاسة إني مش هاعرف أتعامل معاه وإن مستواه أعلى من مستواي، إحنا الحمد لله يعني أسرة متوسطة؛ يعني إحنا مثلاً من منطقة شعبية شوية، وهو وأهله ساكنين في مكان راقي؛ بس قبل ما يسافروا كانت حياتهم عادي جدا، كانوا في منطقة شعبية، وكانوا عكس اللي هما فيه دلوقتي؛ لكن المجتمع بينظر لدلوقتي مش قبل كده؛ بس أهلي مرحبين بيه جدا لأنه ولد مهذب جدا ومحترم كأخلاق وكوظيفة. المهم أنا حاسة إن كل لما المدة بتقرب علشان ييجي هو وأهله باقلق جدا جدا، خايفة إني ما اعرفش أتأقلم والفرق في المستوى المادي، ده قالقني جدا، وطبعا أنا مش عايزة أحسسه بكده لدرجة إني بقيت أضغط على أهلي بطلبات علشان ما احسسهوش إننا أقل منهم بس أنا عارفة إنه غلط؛ بس تصرفاتي وطلباتي لا إرادية، ساعات كتير باحس إني مخنوقة وباخد الموضوع على أعصابي وإني حطيت نفسي في وضع أنا مش قده لأن ما حدش هيتعب قدي؛ مع العلم إني مع الوقت عرفته أكتر هو طيب وحنين جدا، وبيحبني بس أخته رغم إنها طيبة بس بتاعة مظاهر، وأنا مش بحب كده، حاسة إني مش هاعرف أتأقلم مع حياتهم وخاصة إني مش اجتماعيه أوي، الموضوع ده مخليني مش عارفة أنام، أعمل إيه؟ وهل أنا صح ولا غلط؟ ولا ما احطش الموضوع ده في دماغي؟ وهل ده قلة ثقة في نفسي؟ خايفة جدا وما ينفعش أسيبه لأني بصراحة حبيته وخايفة أظلمه معاي لإنه مش بيحاول يزعلني خالص. (Y)