عندي مشكلة هي إني كنت بحب واحد قريبي ومع الوقت كنت بتعلق بيه أكتر، ومع الوقت حسيت إن الموضوع بيكبر معايا وحسيت إنه بقى مشكلة لأني ماكنتش أعرف هو مشاعره إيه من ناحيتي وأنا فكرت إني أروح وأكلمه بعد سنة ونص تقريبا ولقيت إن رد فعله كان حادّ جدا وكان رفضه فيه قلة ذوق، ولحد دلوقتي أنا مش قادرة أنسى ولا كلمة من الكلام اللي قاله ومش قادرة أعيش حياتي. أنا باعترف إني غلطت في حق نفسي؛ لأنه ماكانش يستحق إني أعمل كده علشانه، ولأن ده أصلا ماكانش ينفع إن واحدة تقول لواحد بس أنا مش قادرة أعيش حياتي، ولا أنسى الإهانة يمكن علشان باشوفه دايما وعارفة كل حاجة عنه مش عارفة إذا ماكنتش قادرة أنساه ولا مش قادرة أنسى الإهانة نفسها.. أنا ثقتي بنفسي قلّت كتير لدرجة إني مش عايزة ومش قادرة إني أتعامل مع شباب أصلا ولو حد حاول يرتبط بي أو معجب بي ده بيفرحني لفترة قصيرة يمكن علشان كرامتي لكن دايما باحط في دماغي إني لازم أرتبط بحد أحسن منه ماديا واجتماعيا يمكن عشان كبريائي أنا مش بانجح في أي علاقة دايما بانهي أي موضوع.. أنا أي كلام عن الارتباط أو الحب بتتعبني أقل حاجة بتفكرني باللي حصل مش قادرة أعيش حياتي، أنا مركزة في حياته هو وباعرف أخباره دايما يمكن غصب عني عشان ظروفنا كقرايب وعرفت من فترة إنه بيحب واحدة وعايز يتقدم لها وأهلها رافضين وهو بيحاول يتحداهم علشانها؛ لأنه المفروض إنه بيحبها أوي وعنده مشاكل كتير، دلوقتي أنا باحس إن ده انتقام ربنا منه؛ لأنه جرّب يحب ويتألم لأنه جرحني بكلامه في يوم من الأيام بكلامه الصعب مش برفضه ليّ؛ لأني كنت مهيأة نفسي لاحتمال زي ده. تينا