السلام عليكم.. في بداية كلامي أحب أشكر موقع "بص وطل"؛ وخصوصاً باب "فضفضة" لأنه بجد بيساعد في حل مشاكل كتير. مشكلتي إني بحب واحد جداً من أيام ثانوي، وهو كمان بيحبني جداً.. في بداية قصة الحب كنت حاسة إني أسعد إنسانة في الدنيا، وبعدين بدأ الملل يدخل حبنا، وبدأ اهتمامه بيّ وبمشاعري يقلّ؛ مع إني عارفة ومتأكدة إنه بيحبني؛ بقى كل ما نتكلم سوا يقعد يتكلم عن أصحابه البنات وعملوا إيه وخرجوا فين، من غير ما يراعي إني ممكن أتضايق من الكلام ده.. وكذا مرة حاولت أفهّمه إني باتضايق، كان بيقول لي مش إنتِ اللي طلبتي إني أقول لك كل حاجة باعملها. وفضل على الحال ده فترة؛ لدرجة إني خلاص تقريباً اتعودت على كده.. ومن فترة اتعرفت على شاب معايا في الجامعة، كنا في الأول مجرد أصحاب، وبعدين من فترة قريبة اعترف لي بحبه؛ بس هو مايعرفش إني مرتبطة. أنا حاسة إني مشدودة ليه لأنه بدأ يهتمّ بيّ وبمشاعري، بدأت أحس إنه بيحبني بجد؛ بس في نفس الوقت أنا بحب حبيبي الأولاني، ومش هاقدر أسيبه، ومش هاقدر أحب الاتنين. أنا محتارة بجد، محتاجة حد يقول لي أعمل إيه، وشكراً، وآسفة إني طوّلت في الكلام.