أنا مرتبطة بشاب وبنحب بعض جدا والمفروض ييجي لأهلي بعد شهر بس أنا مخنوقة أوي وخايفة؛ لأن مستوانا أعلى من مستوى أهله لكن مستواه التعليمي والثقافي زينا، إنما معظم أهله مش متعلمين بس محترمين جدا؛ لأننا سألنا عليهم، طبعا ماما مش سايباني في حالي وكان نفسها في عريس أحسن، أنا مش بازعل منها؛ لأنها أم، وبكرة إن شاء الله هاكون زيها وأكتر، دي مشكلة، المشكلة التانية هي ظروفه الشخصية على قدّه وأنا خايفة بابا يرفضه وماما ممكن تشجع بابا على حاجة زي كده يمكن مش أكيد. المشكلة التالتة أني هاعيش في بيت عائلة ودي المشكلة الكبرى أنا ما أقبلش إن حد يعلق عليّ ولا أبقى قاعدة مش براحتي كل شوية حد ينزل لي ولو اتكلمت أبقى أنا الوحشة، وشغل الحموات اللي كلنا عارفينه ده، حاولت معاه إننا ناخد في مكان تاني بس مانفعش، أنا مش بحب المشاكل بس لو لقيت حاجة مش عاجباني ممكن أهدّ الدنيا، بس لو بابا له تعليق على المواضيع دي كلها أرد عليه إزاي؟ ولا أتناقش معاه إزاي؟ هو ولد محترم أوي وماما شافته وقالت نفس الكلام، بس الغالب إن الناس بقت تبص للمظاهر ومش بيهمها الأخلاق. A